«Heta nie značyć, što ja nie patryjot». Zahadčyca kafiedry žurfaka BDU apraŭdvajecca za adpačynak u Jeŭropie
Letam zahadčyca kafiedry telebačańnia i radyjoviaščańnia žurfaka BDU Alesia Kuźminava pajechała ŭ Jeŭropu — u Italiju i Aŭstryju. Zdavałasia b, ničoha dziŭnaha ŭ takim adpačynku. Ale ŭ hetaj historyi jość paru cikavych detalaŭ.
«Kali ja vyjechała na 7 dzion u Jeŭropu, heta nie značyć, što ja nie patryjot svajoj krainy. Heta ŭsio, što ja vam chacieła skazać. Pryvitańnie błohieram. Kali ščyra, ašałomlenaja. Musić, čas paznajomicca asabista. Skažycie mnie heta ŭsio ŭ tvar», — apraŭdvałasia vykładčyca ŭ sacsietkach za vandroŭku.
Cikava, što raniej Kuźminava vykładała post, u jakim pisała: «Nie treba nam Nica, nie treba nam Kany, u nas jość stalica i teleekrany! «Televiaršynia» — skancentravanaja enierhija. Jak ža rada była ŭsich bačyć!»
Čamu dla adpačynku zahadčyca kafiedry nie abrała stalicu Biełarusi — zastajecca zdahadvacca.
Viadomy vypadki, kali ŭ 2020-m vykładčyca cisnuła na studentaŭ, jakija adkryta vykazvali svaju pazicyju ab tym, što adbyvajecca ŭ krainie, pahražała adličeńniem.
«U 2020-m spačatku zahavaryła ab tym, što nichto z datyčnych da pratestaŭ nie znojdzie pracu, potym užo i na prablemy va ŭniviersitecie stała namiakać, — raskazvaje adzin ź jaje byłych studentaŭ. — Kali studenty na samim žurfaku pratestavali, jana z našaj hrupaj vychavaŭčuju hutarku pravodziła i pahražała, što ŭ jaje jość śpis tych, chto pajšoŭ na zabastoŭku 1 vieraśnia i ŭ ich buduć składanaści na siesii, kali jany «nie voźmucca za hałavu».
Potym adkrytym tekstam kazała, što maje historyi ŭ instahram hladziać «tam, dzie treba», a ŭ mianie jašče raźmierkavańnie, treba maŭčać, a to sašluć u viosku. Potym na parach pačała rehularna za BT zastupacca».
U 2022-m Kuźminava, kažuć, prymušała studentaŭ hałasavać na refierendumie. Adnamu ź ich pastaviła ŭmovu: ci jon hałasuje daterminova, ci ŭ jaho buduć prablemy z raźmierkavańniem. Chłopiec doŭha adpiraŭsia, paśla čaho zahadčyca kafiedry skinuła jamu sełfi z dekanam fakulteta sa słovami «dumajem pra vas».
«Kali mianie z-za antyvajennych navinaŭ zvolnili z radyjo, jana vyklikała na hutarku i pačała kazać, što ŭ mianie nie budzie narmalnaha raźmierkavańnia, što za mnoj i tak «sačyli», a zaraz naohuł treba chadzić i ahladacca, što mnie treba adličvacca, kab ja «nie hańbiŭ BDU».
Jašče ja ŭsie kursavyja pisaŭ pra «Jeŭrabačańnie» i źbiraŭsia dypłom ab im rabić. Ale jana mnie zabaraniła, bo heta jeŭrapiejski prajekt, jaki, pa jaje słovach, «vystupaje suprać Biełarusi». I dała temu naratyvaŭ na BT, kab ja pisaŭ, jaki tam cudoŭny storytelinh i jakija tam prafiesijanały», — padzialiŭsia były student.
Kamientary
My pra heta vam chłusim z ekranaŭ
Nu a sami kanajem u Kany,
Pokul heta nie bačać pachany.