Pamior były prezident Filipinaŭ Fidel Ramas — siłavik, jaki, vybirajučy pamiž narodam i dyktataram, abraŭ narod
Va ŭzroście 94 hadoŭ pamior były prezident Filipinaŭ Fidel Valdes Ramas. Pra heta paviedamiła kiraŭnica ŭpraŭleńnia pa suviaziach z hramadskaściu pry kiraŭniku dziaržavy Tryksi Krus-Anchieles.
Na svajoj staroncy ŭ sacyjalnych sietkach čynoŭnica napisała, što navinu ab śmierci byłoha kiraŭnika dziaržavy jany pryniali z hłybokim smutkam. «Jon pakidaje paśla siabie jarkuju spadčynu i nadziejnaje miesca ŭ historyi dziakujučy svajmu ŭdziełu ŭ vialikich pieramienach u našaj krainie jak u jakaści vajskoŭca, tak i ŭ roli kiraŭnika vykanaŭčaj ułady», — havorycca ŭ apublikavanym paviedamleńni.
Fidel Ramas viadomy tym, što jon źjaŭlaŭsia kiraŭnikom Słužby kansteblaŭ Filipinaŭ (anałah pasady ministra ŭnutranych spraŭ) u 1981-1986 hadach, u apošnija hady kiravańnia krainaj dyktatara Fierdynanda Markasa. Kali Markas niespadziavana prajhraŭ vybary svajoj žančynie-kankurentcy Karason Akina, Ramas nie staŭ dušyć pratesty, a razam ź inšymi siłavikami pierajšoŭ na bok naroda. Paśla hetaha jon staŭ pry novaj uładzie načalnikam Hienieralnaha štaba i ministram abarony, a praz šeść hadoŭ zamianiŭ Akina na pasadzie kiraŭnika dziaržavy.
Fidel Ramas uznačalvaŭ dziaržavu z 1992 pa 1998 hod. Jaho administracyja atrymała viadomaść dziakujučy svajoj prahramie «Filipiny-2000», hałoŭnaj metaj jakoj było pramysłovaje raźvićcio krainy da 2000 hoda. Mnohija ličać, što mienavita dziakujučy hetaj prahramie adbyłosia ažyŭleńnie ekanomiki krainy.
Kamientary