Učora stała viadoma, što šaściora kalinoŭcaŭ nie viarnulisia z bajavoha zadańnia. Siarod ich — Jan Dziurbiejka, videa ź jakim apublikavaŭ adzin z rasijskich telehram-kanałaŭ.
Fota: sacsietki
Chłopiec naradziŭsia ŭ 1996 hodzie ŭ pasiołku Lasny, jaki znachodzicca kala Baraŭlanaŭ. Vučyŭsia ŭ baraŭlanskaj škole, a paśla pastupiŭ u Biełaruskuju dziaržaŭnuju akademiju avijacyi na śpiecyjalnaść «Techničnaja ekspłuatacyja avijacyjnaha abstalavańnia». Padčas vučoby padpracoŭvaŭ u KFC, a apošnim miescam pracy chłopca staŭ Minski miechaničny zavod imia Vaviłava — heta aptyčny zavod, jaki ŭvachodzić u strukturu BiełOMA.
U intervju radyjo «Unet» chłopiec pryznavaŭsia, što Łukašenku nie lubiŭ z maładości, ale da 2020 hoda Jan nie ŭdzielničaŭ u pratestach. U 2020 jon uklučyŭsia ŭ ruch za źmieny ŭ krainie.
Fota: sacsietki
Jana zatrymali na Dziady, 1 listapada 2020 hoda, asudzili na 15 sutak i zaviali suprać jaho kryminalnuju spravu. I ŭžo 29 listapada, paśla pieratrusu i ŭhavoraŭ maci, jon vyjechaŭ ź Biełarusi va Ukrainu i žyŭ u Kijevie. Pracavaŭ achoŭnikam i malarom.
Pa jaho słovach, pačatak vajny staŭ dla jaho šokam — pasiarod nočy pazvaniła maci i skazała: «U vas pačałasia vajna!» Spačatku chłopiec vahaŭsia, ale vyrašyŭ, što zastaniecca baranić Ukrainu, i 28 lutaha zapisaŭsia ŭ terabaronu.
«Dla mianie matyvacyja dosyć prostaja, — kazaŭ Jan ukrainskamu 24-mu kanału. — Mała taho, što ja zastaŭsia biez radzimy, dyk ciapier vorah rujnuje i novy dom. Rasija rujnuje Ukrainu. Ciapier pačałasia vajna, i mnie zrazumieła, što biełarusy dałučacca da vajny va Ukrainie suprać rasijskaj ahresii. U mianie zastalisia znajomyja ŭ Biełarusi. Vajavać suprać Ukrainy ź ich nichto nie choča. Nakolki mnie viadoma, u biełaruskaj armii nizki maralny duch i ŭ ich niama nijakaha žadańnia jechać va Ukrainu na vajnu».
«Baranić svoj dom — heta śviaty abaviazak kožnaha, — kazaŭ jon Radyjo «Unet». — Tamu tym, chto pryjšoŭ siudy z bojem, ja dam boj. Chaciełasia b, kab vajna skončyłasia jak maha raniej, ale ja hatovy da zaciažnoha kanfliktu. Chaču viarnucca na ajčynu i spadziavajusia, što, kali vajna skončycca, heta ŭdasca».
U videa z pałonu Jan vyhladaje zdarovym fizična i trymajecca hodna. Jon kaža vidavočna zahadzia padrychtavany tekst pra toje, što «śpiecsłužby Zachadu i Ukrainy šantažujuć biełarusaŭ zamiežža vydačaj u Biełaruś, kab jany išli vajavać u Połk Kalinoŭskaha».
Z-pad Lisičanska nie viarnulisia šeść biełarusaŭ-kalinoŭcaŭ. Apošnim paviedamleńniem było: «Na nas jedzie tank. Adpracavaŭ pa im»
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA27
Kamientary