Vidavočcy raskazali pra masavaje zasialeńnie padazronych mužčyn u chosteły Minska
U chosteły ŭ centry Minska apošnija niekalki tydniaŭ masava zasialajucca hrupami maładyja dužyja mužčyny z Rasii. Pra heta raskazali vidavočcy sajtu Reform.by.
Havorka idzie pra chosteł «Trynici» na Staravilenskaj, 12 (u Trajeckim pradmieści) i Urban Hostel na vulicy Zaborskaha, 3 (kala Suvoraŭskaha vučylišča).
Hetyja ludzi pryjazdžajuć na taksi hrupami pa niekalki čałaviek. Jak praviła, maładyja ludzi słavianskaj źniešnaści, ale sustrakajucca pa vyhladzie i vychadcy z paŭdniovych rehijonaŭ.
Viečarami ich možna sustreć u charčovych kramach pablizu. Pierasoŭvajucca nievialikimi hrupami. Taksama ich bačyli na prahułcy kala Ministerstva abarony na vulicy Kamunistyčnaj.
Čytač Reform.by zmoh pahavaryć z adnym ź ich. Jon šukaŭ chosteł «Trynici» i raskazaŭ, što pryjechaŭ z Uładzivastoka. Na pramoje pytańnie «A dalej kudy? Na vajnu, va Ukrainu?», mužčyna advioŭ vočy i adkazaŭ: «Nie, pa inšych spravach», dzielicca ŭražańniami čytač.
Žurnalist Reform.by źviazaŭsia z administracyjami nazvanych chostełaŭ. U Urban Hostel pradstaŭnica administracyi pa imieni Anastasija skazała, što nijakija «dužyja maładyja mužčyny z Rasii» ŭ ich chosteł nie zasialajucca i «ničoha takoha ŭ ich niama».
Chosteł «Trynici» na zapyt pakul ničoha nie adkazaŭ.
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»10
Kamientary