Uznačalvali rabočy ruch jašče ŭ 90-ch. Kaho zatrymali ŭ spravie niezaležnych prafsajuzaŭ

 U minułym namenklaturščyk, ciapier adstojvaje pravy biełaruskich rabočych u Mižnarodnaj arhanizacyi pracy

Alaksandar Jarašuk — staršynia Biełaruskaha Kanhresu demakratyčnych prafsajuzaŭ. U 1990-ch dasiahnuŭ vysokich namenklaturnych pasadaŭ. U 2001 hodzie vyłučaŭsia kandydatam na prezydenta, ale nie sabraŭ dastatkovaj kolkaści podpisaŭ. Pastajanna adstojvaje intaresy pracoŭnych u Mižnarodnaj arhanizacyi pracy.

Alaksandar Jarašuk naradziŭsia ŭ 1951 hodzie ŭ vioscy Ŭnučki Kamianieckaha rajonu. Skončyŭ Kurski sielskahaspadarčy instytut, paźniej — Mienskuju vyšejšuju partyjnuju škołu. Pracavać pačaŭ u 1973 hodzie — ahranomam u saŭhasie imia Dzimitrava Kamianieckaha rajonu. Dva hady adsłužyŭ u vojsku. Bolš za 15 hadoŭ adpracavaŭ na roznych pasadach u haspadarkach Bieraściejščyny.

Na pačatku 1990-ch zrabiŭ paśpiachovuju namenklaturnuju karjeru: byŭ zahadčykam adździełu ahrarnaj palityki CK KPB, 5 hadoŭ adpracavaŭ namieśnikam načalnika ŭpraŭleńnia ŭ Ministerstvie sielskaj haspadarki i charčavańnia Biełarusi.

U 1996—1998 hadach byŭ pieršym namieśnikam staršyni Mienskaha abłvykankamu. U 1998—1999 hadach — staršyniom Mienskaha abłasnoha kamitetu pryrodnych resursaŭ.

U 1999 hodzie Alaksandar Jarašuk uznačaliŭ Respublikanski kamitet Biełaruskaha prafsajuzu rabotnikaŭ ahrapramysłovaha kompleksu, što ŭvachodziŭ u skład FPB.

Pavialičyć

Z 2002 hodu — staršynia niezaležnaha Biełaruskaha kanhresu demakratyčnych prafsajuzaŭ.

Jarašuk braŭ udzieł u prezydenckaj kampanii 2001 hodu, ale nia byŭ zarehistravany kandydatam, bo sabraŭ zamała podpisaŭ.

U červieni 2011 hodu abrany siabram Administracyjnaj rady Mižnarodnaj arhanizacyi pracy. Pastajanna pradstaŭlaŭ Biełaruś u MAP.

28 hadoŭ ačolvaŭ prafsajuz REP, jaki niadaŭna pryznany «ekstremisckim farmavańniem»

Hienadź Fiadynič za aktyŭnuju prafsajuznuju dziejnaść u 2018 hodzie atrymaŭ 4 hady «chimii» i zabaronu zajmać kiroŭnyja pasady — pravaabaroncy pryznali spravu palityčna matyvavanaj.

Hienadź Fiadynič naradziŭsia ŭ 1957 hodzie ŭ Žabinkaŭskim rajonie Bieraściejskaj vobłaści. Skončyŭ Biełaruski politechničny instytut, pa adukacyi inžyner-mechanik. U 1980-ja hady pracavaŭ na viadučych pradpryjemstvach elektronnaj pramysłovaści: 8 hadoŭ u Kanstruktarskim biuro dakładnaha elektronnaha mašynabudavańnia, jašče 2 hady ŭ chołdynhu «Płanar».

U 1990 hodzie Fiadynič zasnavaŭ i ačoliŭ niezaležny prafsajuz rabotnikaŭ radyjoelektronnaj pramysłovaści. Prafsajuz REP abjadnaŭ tady 275 tysiač siabroŭ i ŭvajšoŭ u skład Federacyi prafsajuzaŭ Biełarusi (FPB). Ź inicyjatyvy Fiadyniča i pry niepasrednym udziele prafsajuzu REP u 1990-ch hadach adbylisia šmattysiačnyja akcyi pratestu «Nie — źbiadnieńniu narodu» na płoščy Svabody i kala Pałaca sportu.

Pavialičyć

U 1990—1994 hadach Fiadynič byŭ deputatam Mienskaha haradzkoha Savietu deputataŭ.

U 2017 hodzie mienavita prafsajuz REP byŭ adnym ź inicyjataraŭ «Maršaŭ niedarmajedaŭ». Tady suprać prafsajuznaha lidera Hienadzia Fiadyniča i buchhaltara Ihara Komlika raspačali kryminalnuju spravu «za niaspłatu padatkaŭ». Pravaabaroncy pryznali spravu palityčna matyvavanaj. U žniŭni 2018 hodu sud Savieckaha rajonu Miensku asudziŭ kiraŭnikoŭ prafsajuzu REP Ihara Komlika i Hienadzia Fiadyniča na 4 hady abmiežavańnia voli biez nakiravańnia va ŭstanovy adkrytaha typu z zabaronaj zajmać kiroŭnyja pasady ciaham 5 hadoŭ.

11 krasavika KDB pryznaŭ Niezaležny prafsajuz rabotnikaŭ radyjoelektronnaj pramysłovaści (REP) «ekstremisckim farmavańniem».

 Byŭ arhanizataram pieršaha strajku 26 krasavika 1990 hodu na «Homsielmašy», aŭtar zbornikaŭ publicystyki

Alaksandar Buchvostaŭ — staršynia Svabodnaha prafsajuzu metalistaŭ. Inicyjavaŭ na pačatku 1990-ch pieršyja strajki rabočych u Homli i Miensku. Byŭ staršyniom Biełaruskaj partyi pracy i deputatam Viarchoŭnaha Savietu CHIII sklikańnia.

Z 1980 pa 1990 hady Buchvostaŭ pracavaŭ na roznych pasadach na «Homsielmašy», ciaham 5 hadoŭ byŭ staršyniom prafkamu. U 1989—1990 hadach prafsajuzny lider staŭ arhanizataram zabastovačnaha čarnobylskaha ruchu, «Maršaŭ za vyžyvańnie» z Homla ŭ Maskvu (lipień 1990 hodu), z Homla ŭ Miensk (vierasień 1990-ha). Alaksandar Buchvostaŭ byŭ inicyjataram i pieršaha strajku na «Homsielmašy» 26 krasavika 1990 hodu.

Voś jak jon uzhadvaje toj strajk u svaim artykule «Psychoz u ludziej pačynajecca, kali ad ich chavajuć praŭdu»:

«26 krasavika 1990 hodu ŭ 7:30 pieršaja źmiena pryjšła na zavod, pieraapranułasia, vyjšła da stankoŭ, ale da pracy nie prystupiła.

U 10:00 pačaŭsia ahulnazavodzki mitynh. Jon prachodziŭ na hałaŭnym zavodzie, zavodzie samachodnych kambajnaŭ i zavodzie lićcia i narmalaŭ. Hiendyrektar Drozd zaklikaŭ ludziej prystupić da pracy, maŭlaŭ, «vy ŭžo pakazali siłu, i chopić», ale ja zapiarečyŭ i skazaŭ, što treba praciahvać zabastoŭku. I ludzi padtrymali mianie.

Z pracoŭnych miescaŭ biez dazvołu strajkavaha kamitetu nichto nie sychodziŭ. Pjanych nie było. U 16:00 bolš za 5000 sielmašaŭcaŭ pad praliŭnym daždžom kalonaj pajšli na haradzki mitynh, pryśviečany čaćviortaj hadavinie Čarnobylskaj trahiedyi. Ja vystupiŭ na mitynhu. Druhaja źmiena taksama da pracy nie prystupała. Ludzi stali sychodzić z cechaŭ paśla 23 hadziny z dazvołu strajkamu».

U 1993—2004 hadach Alaksandar Buchvostaŭ byŭ staršyniom Biełaruskaj partyi pracy, jakuju ŭłady źlikvidavali.

Jon byŭ deputatam Viarchoŭnaha Savietu CHIII sklikańnia. Nie pryznaŭ vyniki referendumu 1996 hodu.

Pavialičyć

Nieadnarazova adbyvaŭ administracyjnyja aryšty. U kastryčniku 2003 hodu Buchvostaŭ pravioŭ pikiet na Kastryčnickaj płoščy Miensku, pratestujučy suprać parušeńnia pravoŭ pracoŭnych. Byŭ aryštavany na 15 dzion. Razam sa staršyniom PKB Siarhiejem Kalakinym byŭ aryštavany na 15 dzion u krasaviku 2006 hodu za praviadzieńnie niesankcyjanavanaha pikietu kala Akademii navuk. Arhanizacyja Amnesty International pryznała tady Buchvostava viaźniem sumleńnia.

Na prezydenckich vybarach 2006 hodu Buchvostaŭ byŭ kiraŭnikom inicyjatyŭnaj hrupy Alaksandra Milinkieviča, adzinaha kandydata ŭ prezydenty ad demakratyčnych sił.

Z 2012 hodu Alaksandar Buchvostaŭ — staršynia Svabodnaha prafsajuzu metalistaŭ.

Na pačatku sakavika 2022 hodu ŭ ofisie prafsajuzu metalistaŭ adbyŭsia pieratrus. 19 krasavika siłaviki pryjšli ŭ ofis znoŭ i zatrymali prafsajuznych aktyvistaŭ.

Publicystyčnyja artykuły Alaksandra Buchvostava vychodzili zbornikami «Bułyžnik poka ležit na mostovoj» (1998), «Pod ležačij kamień voda nie tiečiet» (1999), «O profsojuznom i rabočiem dvižienii» (2000).

Ačolvaŭ niezaležny prafsajuz «Hrodna Azotu», damohsia zachavańnia piarvički

Siarhiej Antusievič — namieśnik staršyni Biełaruskaha kanhresu demakratyčnych prafsajuzaŭ. Doŭhi čas ačolvaŭ niezaležny prafsajuz na pradpryjemstvie «Hrodna Azot». Zatrymany 19 krasavika, źmieščany ŭ SIZA KDB.

Siarhiej Antusievič naradziŭsia ŭ 1973 hodzie ŭ Bieraści. Byŭ staršyniom bazavaj arhanizacyi rabočych Biełaruskaha niezaležnaha prafsajuzu «Hrodna Azot».

Ź jahonaj inicyjatyvy ŭ Biełaruś tady pryjechała Kamisija pa raśśledavańni Mižnarodnaj arhanizacyi pracy i vyjaviła ceły šerah parušeńniaŭ, jakija dahetul nia vypraŭlenyja. Tady dziakujučy kantrolnym mechanizmam Mižnarodnaj arhanizacyi pracy ŭdałosia praduchilić dyskryminacyju niezaležnaha prafsajuzu na «Hrodna Azocie» i adstajać piarvičnuju arhanizacyju, jakuju kiraŭnictva pahražała likvidavać.

Z 2003 pa 2007 hady Siarhiej Antusievič byŭ deputatam Horadzienskaha haradzkoha Savietu.

Z 2012 hodu — namieśnik staršyni Biełaruskaha Kanhresu demakratyčnych prafsajuzaŭ.

19 krasavika ŭ ofisie BKDP i ŭ kvatery Siarhieja Antusieviča adbylisia pieratrusy. Jaho zatrymali, unačy jamu dazvolili patelefanavać žoncy. Antusievič paviedamiŭ, što źmieščany ŭ SIZA KDB.

Začystka niezaležnych prafsajuzaŭ: prajšli pieratrusy ŭ ofisach i na kvaterach aktyvistaŭ

• 0
• 0
• 1
• 0
• 0
• 1
• 5
• 0