ABSIE: Biełaruś nie źjaŭlajecca bokam mižnarodnaha ŭzbrojenaha kanfliktu
Ekśpierty Arhanizacyi pa biaśpiecy i supracoŭnictvie ŭ Jeŭropie pryznali bakami ŭzbrojenaha kanfliktu Rasiju i Ukrainu, adnak nie stali nadzialać takim statusam Biełaruś. Pra heta havorycca ŭ dakładzie Maskoŭskaha miechanizmu ABSIE, apublikavanym na sajcie arhanizacyi.
«Choć Biełaruś dazvalaje vykarystoŭvać svaju terytoryju dla napadaŭ Rasii na Ukrainu, misija [ABSIE] ličyć, što pa stanie na 1 krasavika jana nie źjaŭlajecca bokam mižnarodnaha ŭzbrojenaha kanfliktu, pakul nie ździajśniaje akty hvałtu ci inšyja dziejańni, jakija ŭjaŭlajuć saboj niepasredny ŭdzieł u vajennych dziejańniach», — adznačajecca ŭ dakładzie.
Taksama ABSIE admaŭlajecca ličyć bakami kanfliktu krainy NATA «tolki na padstavie faktu pastavak zbroi abo abmienu raźviedvalnaj infarmacyjaj».
Razam z tym, na dumku ABSIE, i Biełaruś, i NATA pavinny nieści «pavyšanuju adkaznaść» u suviazi z tym, što padtrymlivajuć baki, jakija ŭdzielničajuć u bajavych dziejańniach, havorycca ŭ dakumiencie.
Adznačajecca taksama, što vajnu Rasii z Ukrainaj varta razhladać u kantekście humanitarnaha prava ŭ dačynieńni da mižnarodnych uzbrojenych kanfliktaŭ, u pryvatnaści, čatyroch Ženieŭskich kanviencyj i dadatkovych pratakołaŭ da ich, jakija abiedźvie krainy padpisali.
Ekśpierty pryjšli da vysnovy, što rasijskija vajskoŭcy niasuć adkaznaść za abstreł radzilni i dramatyčnaha teatra ŭ Maryupali. U abodvuch vypadkach, na dumku pradstaŭnikoŭ arhanizacyi, ludzi, adkaznyja za heta, ździejśnili vajennyja złačynstvy. Abstreł teatra, u vyniku jakoha zahinuli kala 300 čałaviek, ekśpierty ABSIE nazvali «aburalnym parušeńniem» mižnarodnaha humanitarnaha prava.
Aŭtary dakłada ličać, što «metanakiravanyja zabojstvy» i «hvałtoŭnyja źniknieńni abo vykradańni hramadzianskich asob», u tym liku žurnalistaŭ i čynoŭnikaŭ, jakija ździejśnili pradstaŭniki Rasiei, vierahodna, možna kvalifikavać jak złačynstvy suprać čałaviečnaści.
Pra złačynstvy ŭ Bučy i inšych miascovaściach na poŭnačy Ukrainy ŭ dakładzie ničoha niama, bo jahonyja chranałahičnyja ramki — z 24 lutaha pa 1 krasavika. Tady pra trahiedyju hetych miaścin jašče nie miełasia šmat infarmacyi.
Kamientary