«Sankcyi davajennyja paspryjali tamu, što ruskija akupavali Biełaruś». Paźniak iznoŭ krytykuje apazicyju i Zachad

Zianon Paźniak u efiry ŭkrainskaha «5 kanała» vykazaŭ mierkavańnie, što Łukašenka supraciŭlajecca cisku Pucina, bo maje raźvituju intuicyju i niepakoicca vyklučna ab zachavańni svajoj ułady.

«My zaraz žyviom faktyčna ŭ kancłahiery. Źniščana ŭsio, usia hramadzianskaja supolnaść. Navat «Achova ptušak Baćkaŭščyny», fiłatelisty — usio zakryta. 300 arhanizacyj! Ludziej chapajuć zondarkamandy prosta na vulicach. Tych, chto ŭdzielničaŭ u demanstracyjach, chto niapravilna apranuty, nie ŭ tyja kolery. Tamu vielmi ciažka padniać hałavu.

I tym nie mienš, u hramadstvie hałavu padymajuć. Voś niadobraja navina — padstrelili troch našych partyzan na čyhuncy. Praŭda, usie žyvyja, ale adzin ciažka paranieny. Idzie vajna — spalvajuć ščytki, zamykajuć puci, kab nie prapuścić rasijskija vojski na Ukrainu. Niahledziačy na toje, što na kožnym pierahonie stajać kadebisty, u pavietry dzień i noč snujuć drony, videakamiery — čyhunka vielmi achoŭvajecca. I tym nie mienš ludzi iduć na achviary, iduć na zmahańnie. Heta pašyrajecca. I Łukašenka heta bačyć. Heta bačać ludzi ŭ vojsku.

Akramia taho, aficery ŭ vojsku viedajuć naš zaklik — što kali ich prymusiać pajści na Ukrainu, to jość dva vychady. Pieršy vychad — paviarnuć zbroju suprać akupantaŭ, zmahacca z rasiejskimi akupantami, jakija zasieli na Biełarusi. I druhi vychad — heta ŭsimi adździełami zdavacca ŭ pałon ukraincam i vajavać na ich baku. Inšaha vychadu ŭ ich niama.

Hetaje maradziorstva, što jany [rasiejskija vajskoŭcy] utvaryli, biełarusam lišni raz pakazała, što za armija pryjšła i akupavała ichnuju krainu, što heta bandyty, biesy. Biełarusy viedajuć, što zdaryłasia ŭ Bučy, što adbyvajecca ŭ Maryupali, i kropla za kroplaj napaŭniajucca narodnym hnievam. Ja dumaju, što dalej akupantam u Biełarusi nie budzie nijakaj pierśpiektyvy.

Ja dumaju, što nieŭzabavie nastanie toj čas, kali jany buduć źniesieny i ŭ Biełarusi. Hety čas pastupova nabližajecca. Takoje majo pierakanańnie».

Kamientujučy sankcyi suprać biełaruskaha režymu, Zianon Paźniak kaža:

«Tyja sankcyi, jakija byli ŭviedzieny da vajny, paspryjali tamu, što Łukašenka poŭnaściu pajšoŭ pad amafor Kramla. Tyja sankcyi nielha było ŭvodzić! Heta absurd!

Pakolki ŭ jaho adkrytyja dźviery ŭ Kreml. Voś jon pajšoŭ pad poŭnaje padparadkavańnie, i hetyja sankcyi davajennyja paspryjali tamu, što ruskija ŭviali svaje vojski ŭ Biełaruś, akupavali krainu. Heta budziem nazyvać pamyłkaj zachodniaj, chacia nie dumaju, što heta pamyłka — heta peŭnaja palityka», — ličyć Zianon Paźniak.

Pry hetym Paźniak praciahvaje raspaŭsiudžvać stvorany łukašenkaŭskaj prapahandaj pierad vybarami 2020 hoda fejk, što biełaruskaja apazicyja, a taksama Cichanoŭskaja, Babaryka i Łatuška — prarasijskija elemienty, śćviardžeńnie, jakoje nie maje pad saboj nijakich faktaŭ.

«U Biełarusi ruskija zmahli stvaryć, i Łukašenka hetamu niejak spryjaŭ, prarasijskuju apazicyju. I voś hetaja prarasijskaja apazicyja, jakaja vystaŭlaje napierad Cichanoŭskuju, Łatušku, voś jany i staralisia, kab takija sankcyi ŭviali. Ciapier kali pačałasia vajna, hetyja sankcyi ničoha novaha nie dadajuć, jany tolki ŭmacoŭvajuć sajuz Pucina i Łukašenki, — śćviardžaje Paźniak. —

Jašče chaču dadać, što na Zachadzie miarkujuć tak: voś jany ŭviaduć sankcyi suprać Rasii, narodu ŭ Rasii stanie vielmi ciažka žyć, i jany pačnuć vykazvać niezadavalnieńnie, paŭstavać suprać Pucina, kab Pucina źmianić, kab źmieści hetuju ŭładu. Heta vialikaja iluzija.

Heta śviedčyć ab tym, što Zachad prosta nie razumieje, što takoje Rasija. Sankcyi, jakija ŭvioŭ Zachad, kansalidavali ŭsio rasijskaje hramadstva kala Pucina — 86% za jaho!»

Pry hetym, treba adznačyć, navat praŭładnyja sacyjołahi ŭ Rasii śviedčać, što padtrymka napadu na Ukrainu mienšaja, čym była padčas anieksii Kryma ŭ 2014 hoda, a antyvajennyja nastroi značnyja, niahledziačy na zabaronu nazyvać vajnu «vajnoj».

Zianon Paźniak taksama vykazaŭ padtrymku i spačuvańnie ŭkraincam i adznačyŭ, što padziei, jakija ciapier adbyvajucca tam, źjaŭlajucca Chałakostam ukrainskaha narodu.

• 62
• 0
• 6
• 86
• 4
• 2
• 7
• 0