Zahinuły biełaruski dobraachvotnik pracavaŭ dalnabojščykam u Polščy i pakinuŭ pracu, kab abaraniać Ukrainu
Biełaruski dobraachvotnik Źmicier Apanasovič — pazyŭny «Teror» — vajavaŭ za Ukrainu. 26 sakavika jon atrymaŭ ciažkaje ranieńnie ŭ supraćstajańni z rasijskimi vojskami pad Irpieniem. Vyratavać jaho žyćcio miedykam nie ŭdałosia. Heta ŭžo treciaja śmierć biełaruskich dobraachvotnikaŭ na vajnie va Ukrainie ŭ 2022 hodzie.
Źmicier pracavaŭ dalnabojščykam u Polščy. Jaho siabry raspaviadajuć Mostmedia, jakim jon byŭ i čamu vyrašyŭ pajechać na vajnu va Ukrainu.
Jon rodam sa Smarhoni. U 2013-2014 hadach słužyŭ u 38-j desantna-šturmavoj bryhadzie ŭ Breście. Apošnija čatyry hady žyŭ u Polščy, pracavaŭ dalnabojščykam. Źmicier pryniaŭ rašeńnie jechać va Ukrainu 25 lutaha, na nastupny dzień paśla pačatku poŭnamaštabnaj vajny. Zahinuŭ ad ranieńnia ŭ bajach za Irpień.
Słužyŭ u PDV
Ivan Straškievič — siabar Źmitra. Jany abodva sa Smarhoni, słužyli ŭ adnoj bryhadzie ŭ Breście. Potym pierajechali ŭ Polšču: Źmicier — u Varšavu, a Ivan — u Biełastok.
— My paznajomilisia ŭ 2013 hodzie, chadzili ŭ adnu trenažornuju zału, zajmalisia rukapašnymi bajami. U tym ža hodzie jaho zabrali słužyć u desanturu ŭ Brest, praź niekalki miesiacaŭ i ja tudy trapiŭ. My jašče razam pasłužyli. Dzima byŭ dobrym sałdatam, na takich bajcach biełaruskaja armija i trymajecca. Jon dembielnuŭsia na paŭhoda raniej, potym jašče mianie sustrakaŭ. Na Dzień PDV my razam vychodzili.
Toje, što Źmicier pajechaŭ vajavać va Ukrainu, dla Ivana nie stała navinoj. Jon pierad adjezdam napisaŭ Ivanu i prapanavaŭ jechać razam. Ivan padumaŭ i admoviŭsia.
— Mnie było što hublać. A Dzima ŭsio kinuŭ i pajechaŭ na vajnu abaraniać Ukrainu. Vyjazdžaŭ jon z Varšavy ź inšymi dobraachvotnikami.
Siamji ŭ jaho nie było, navat baćkam ničoha nie skazaŭ pra vajnu. Skazaŭ, što pajechaŭ u čarhovy rejs. Dzima byŭ vielmi dobrym čałaviekam sa svajoj kankretnaj pazicyjaj: słabaha nie čapaŭ, dziorzkaha karaŭ.
Jon byŭ pahancam i vieryŭ u mnostva bahoŭ. Vieru, što jon adpraviŭsia ŭ Valchału.
Z rejsa — na vajnu va Ukrainu
Inšy siabar Źmitra — bajavy tavaryš pad pazyŭnym «Bort». Jany razam adpravilisia na vajnu va Ukrainu. «Bort» taksama pracavaŭ dalnabojščykam ŭ Polščy. Pra znajomstva i siabroŭstva jon raspavioŭ Siarhieju Biaspałavu.
— Ź Dzimam my paznajomilisia ŭ 2020 hodzie padčas pratestaŭ u Biełarusi. Jon paru razoŭ pryjazdžaŭ u Minsk. U nas ź im byli ahulnyja siabry i mety. Sapraŭdny brat. Jon słužyŭ u 38-j bryhadzie, viedaŭ snajpierskuju spravu. Jon nastolki voin, što ja nie mahu tak prosta rastłumačyć. Kali pačałasia vajna, Dzima byŭ u rejsie ŭ Łatvii, praź niekalki dzion jon viarnuŭsia ŭ Varšavu i my vyrašyli pajechać va Ukrainu.
Biełarusy ŭ składzie Dobraachvotnickaha atrada vyjechali ŭ Polšču ŭ kancy lutaha. U 20-ch čysłach sakavika ich padraździaleńnie amal tydzień udzielničała ŭ bajach za Irpień.
— Heta byŭ pieršy naš surjozny boj. Jon doŭžyŭsia šeść dzion. Vyvodzili mirnych žycharoŭ z-pad abstrełaŭ. Dzima byŭ kamandziram i dušoj svajho padraździaleńnia.
Daktary abiacali vyciahnuć
Źmicier Apanasovič atrymaŭ ranieńnie 26 sakavika. Paplečniki apieratyŭna vyciahnuli jaho z akopa i zanieśli ŭ dom. Praź niekalki chvilin pryjechali miedyki i zabrali jaho.
— My adbili ataku ruskich, na nas nastupała piachota. Pačaŭsia abstreł, Dzima źniaŭ padraździaleńnie ŭ schovišča, a sam zastaŭsia. Tam stralali jašče tank i BMP. Praciŭnik vieŭ ahoń pa našych pazicyjach. U Dzimu prylacieŭ askołak u pravuju łapatku. Jaho vyciahnuli z akopa i evakujavali na praciahu piaci chvilin, — raspavioŭ «Bort».
«Bort» da apošniaha dumaŭ, što Dzima vyžyvie. Biełarusa ekstranna dastavili ŭ špital, ale daktary nie zmahli vyratavać jamu žyćcio.
— Naš miedyk akazaŭ jamu kvalifikavanuju dapamohu, i kali pieradavali daktaram, [Dzima] navat pryjšoŭ u siabie. Daktary skazali, što surjoznaje ranieńnie, ale jaho vyciahniem. Tak atrymałasia, što nie vyciahnuli.
Źmitra pachavali va Ukrainie 29 sakavika. Na jaho pachavańni prysutničali jahonyja paplečniki — bajcy biełaruskaha bataljona imia Kastusia Kalinoŭskaha. Źmicier Apanasovič staŭ trecim biełarusam, jaki zahinuŭ z pačatku vajny va Ukrainie ŭ 2022 hodzie.
Bataljon imia Kastusia Kalinoŭskaha byŭ stvorany na pačatku poŭnamaštabnaha ŭvarvańnia Rasii va Ukrainu. U im vajujuć biełaruskija dobraachvotniki. 25 sakavika bataljon uvajšoŭ u skład Uzbrojenych sił Ukrainy (USU), a bajcy pryniali ŭkrainskuju prysiahu na biełaruskaj movie.
30 sakavika stała viadoma, što ŭ Varšavie farmujecca čarhovaje biełaruskaje vajskovaje farmavańnie — połk «Pahonia», jaki ŭvojdzie ŭ skład internacyjanalnaha lehijona USU.
Kamientary