«My razumieli, što heta budzie adrazu paśla Alimpijady». Hałoŭred rasijskaj «Novaj haziety» tłumačyć łohiku Pucina

Zanatavali asnoŭnaje ź jaho intervju jutub-kanału «Skažy Hardziejevaj».

Pavialičyć

Pra pradčuvańnie vajny

My [u redakcyi] razumieli, što heta budzie adrazu paśla Alimpijady. Było zrazumieła bo ŭ niekatorych vystupach Pucin pieraličvaŭ usie kryŭdy, naniesienyja Rasii ŭ jaho piersonie. Było zrazumieła pa leksicy, kali tam uvieś čas uźnikali fašysty, nacysty, Vialikaja Ajčynnaja, podźvihi prodkaŭ. Było zrazumieła, što Vialikaja Ajčynnaja vajna dla jaho nie skončyłasia. Pucin ciapier sprabuje atrymać svaju pieramohu ŭ Druhoj Suśvietnaj vajnie.

Pra ludziej vakoł Pucina

Ja nie chaču nazyvać ich elitaj, ale chaču skazać, što nikoli jany nie byli nastolki adzinyja, jany całkam padzialajuć śvietapohlad Pucina. Rasija — heta krepaść, kraina bahataja na vykapni, joj nichto nie patrebny, jana pavinna zrazumieć, što Zachad — heta vorah, śviet — heta vorah.

Pra toje, kali ŭsio pačałosia

Da 2006 hoda Rasija ŭtrymlivała pasolstva pry NATA, Pucin surjozna prapanoŭvaŭ razhledzieć pytańnie ab dałučeńni Rasii da NATA i vielmi ździviŭsia, kali jamu adkazali, što dla hetaha patrebny vyprabavaŭčy termin, padrychtoŭka dakumientaŭ. Jon byŭ pierakanany, što ad takoj unikalnaj prapanovy nie admaŭlajucca. Kali ŭ jaho ŭźnikła adčuvańnie, što Zachad jaho padmanvaje, była ahučanaja Miunchienskaja pramova. Hetaja pramova nie była ŭspryniataja jeŭrapiejskimi palitykami surjozna. A praz hod pačałasia vajna ŭ Hruzii. Heta byŭ pierałomny momant. Kalektyŭnaja ŭłada pakryŭdziłasia na Zachad.

Pucin raptam zrazumieŭ, što palityki, jakija havorać ź im pra kaštoŭnaści, nasamreč havorać pra košty, im niama davieru i jany razumiejuć tolki siłu.

Adbyłasia jašče adna reč — Pucin bujnym optam skupiŭ vielmi pradstaŭničych zachodnich palitykaŭ, uklučyŭšy ich u saviety dyrektaraŭ rasijskich dziaržaŭnych kampanij. Jon śmiajecca: hetyja ludzi kažuć mnie pra kaštoŭnaści?

Pucin nie ŭsprymaje zachodnich lidaraŭ jak roŭnych, bo za toj čas, što jon pry ŭładzie, źmianiłasia niekalki kancleraŭ Niamieččyny, niekalki prezidentaŭ ZŠA, z paŭtuzina premjeraŭ Italii. Z kim damaŭlacca — jany ž uvieś čas mianiajucca?

U Pucina jość kryŭda na toje, što Zachad nie zaŭvažaŭ źviaržeńnie Janukoviča, vosiem hod Danbasa, niepryznańnie Kryma, a tam, maŭlaŭ, narod prahałasavaŭ. U jaho jość adčuvańnie svajoj absalutnaj racyi. Pakul racyja była słaboj — heta nakapleńnie kryŭdaŭ, a kali źjavilisia «Iskandery», «Bułavy» i «Cyrkony», stała zrazumieła, što hetyja kryŭdy možna i pradjavić.

Ab prapahandzie

Naša ŭłada zamaŭlaje svajmu telebačańniu prapahandu dla nasielnictva i hladzić, jak TB spraŭlajecca z pastaŭlenaj zadačaj. I pastupova sama hetaja ŭłada pačynaje vieryć u toje, što jana prydumała, ale ciapier joj heta pakazali pa telebačańni. U psichałohii jość taki termin — samaindukcyja. Jany abžerlisia svajoj prapahandaj i realna pavieryli ŭ toje, što sami i prydumali.

Pra armiju

Jość dźvie armii. Adna — tradycyjnaja rasijskaja, a druhaja — armija Kadyrava, pryvučanaja zabivać, heta sprava ich žyćcia, jany dobra ekipiravanaja, jany prajšli vajnu. Heta ludzi, jakija ź dziacinstva pryvučanyja da zbroi. Pa vialikim rachunku, Kadyraŭ nie ŭsprymaje svaju krainu jak maleńki datacyjny rehijon Rasii, jon usprymaje jaje jak armiju, a siabie jak hałoŭnakamandujučaha. U ich matyŭ jość — vajavać. U inšaj armii matyvu niama. Jany nie razumiejuć, čamu pavinny vajavać z ukraincami, ale jość zahady, strach pierad trybunałam honić ich napierad. A matyvu abaraniać radzimu ŭ ich niama, a ŭ Pucina jość. Pa jaho pierakanańniach, kali b Rasija nie napała na Ukrainu, Ukraina b napała na Danbas.

Pra Danbas

Heta była kvitniejučaja terytoryja. Možna zhadać čempijanat Jeŭropy pa futbole. Možna paraŭnać ciapierašni Danbas i toj, jaki byŭ za niekalki hod da taho, jak pryjšła ideja «ruskaha miru». Cudoŭny stadyjon, handlovyja centry, parki… I pahladzicie ciapier. Heta vynik.

Strałkoŭ uvajšoŭ u Słaviansk, dzie da siońnia katajuć na tanku ŭkryžavanaha chłopčyka, jakoha nie było. My tudy ŭvajšli ci nie my? Uźnikaje pytańnie: a što my tam rabili? Navošta my tudy pryjšli? A my tudy pryjšli, i ŭ hetym usia pryčyna siońniašniaj vajny, tamu, što Zachad nie pryznaŭ Krym, a kali vy nie pryznajecie Krym, my dašlem Strałkova i telebačańnie, jakoje budzie ŭkryžoŭvać chłopčyka sa Słavianska.

Pra biznes

Šmatlikija aliharchi, stvaryŭšy svaje ahramadnyja vytvorčaści biez usialakich aŭkcyjonaŭ, maŭčać, bo cudoŭna razumiejuć, što ciapier moža być nacyjanalizavana ŭsio, što nie stvaraje strataŭ.

Pra nastroi ŭ hramadstvie

Pa aficyjnych apytańniach bolšaść rasijan padtrymlivajuć «vajennuju apieracyju», ale apytańni pravodzić VCIOM — heta dziaržava. To-bok dziaržava apytvaje praź dziaržaŭnuju strukturu nasielnictva, dla taho, kab padmacavać svaju pazicyju. Ale navat VCIOM kaža, što tracina nasielnictva Rasii suprać vajny. I heta vielizarnaja ličba.

Apytańni Levada-centra dajuć inšyja danyja: suprać vajny 70%, i pryblizna takaja ž ličba padtrymki Pucina jak prezidenta.

Pra pieramirje

Što takoje pieramirje? Heta spynieńnie ahniu. Što heta za dziŭnyja pieramovy na Homielščynie, kali ŭ hety samy čas iduć samyja žorstkija abstreły Charkava?

Kali inšaje niemahčyma — nichto nie adkliča pryznańnie DNR, ŁNR, nichto ź siońniašniaj ułady nie budzie viartać Krym — zastajecca tolki mahčymaść taho, kab nie źniščali ludziej.

Spynieńnie ahniu, humanitarnyja kalidory, ratavańnie paranienych, abmien pałonnymi i mahčymaść pachavać zabitych — bolš ni ab čym damovicca nielha.

Pra moładź

Bolšaść moładzi kateharyčna nie prymaje vajnu. Ludzi maryli pra budučyniu, dzie Rasiju buduć lubić, śviet budzie adkryty Rasii, a Rasija dla śvietu, miežy buduć umoŭnyja, što tut budzie poŭna turystaŭ, što tut budzie atmaśfiera, jakaja była padčas Čempijanata śvietu pa futbole. Voś pra jaki śviet maryła maładoje pakaleńnie, a nie pra śviet, u jakim treba zakupić leki dla babuli napierad, bo paśla buduć tolki dženieryki.

Pra dabro i zło

Vielmi vyrazna stała bačnaje dabro i zło. Heta bačna pa tym, chto padtrymaŭ Rasiju ŭ AAN, a chto nie. Para-trojka dyktataraŭ z nami, a inšy śviet, dzie ludzi žyvuć bolš ščaśliva, čym u Paŭnočnaj Karei — jany na druhim baku. Heta vielmi šmat aznačaje.

• 0
• 0
• 0
• 0
• 0
• 0