Školnik «zaminiravaŭ» samalot, na jakim siabra lacieŭ na adpačynak. Jaho baćki doraha zapłacili za žart
Letaś u Biełarusi była zafiksavanaja rekordnaja kolkaść paviedamleńniaŭ ab iłžeminiravańni. Pik atak byŭ na dzień nastaŭnika — tady amal 300 škoł pa ŭsioj krainie atrymali sihnały. Na kožny vyklik vyjazdžali siłaviki — ludziej evakujavali, śpiecyjalisty ahladali abjekty — nivodnaje paviedmaleńnie nie paćvierdziłasia. Aproč taho, masava pastupali sihnały ab «miniravańni» handlovych centraŭ i dziaržustanovaŭ. Ni pa adnym z faktaŭ tak i nie znajšli parušalnikaŭ.
Ale časam siłavikam usio ž udajecca złavić takich złačyncaŭ. Jak praviła, heta školniki i studenty, jakija takim čynam chočuć sarvać zaniatki abo adpomścić vykładčykam ci studentam. Letaś vyjavili niekalki hrup dziaciej-iłžeminioraŭ, samamu małodšamu było 12 hod.
Načalnik upraŭleńnia pa supraćdziańniu kibierzłačynnaści MUS Andrej Kavaloŭ pryvioŭ dva prykłady.
Letaś student u Breście vyrašyŭ naškodzić vykładčykam i adnakurśnikam, adpraviŭ pry dapamozie mesendžara ananimnaje paviedamleńnie ab miniravańni.
Kali na miesca pryjechali siłaviki, jon jašče pahladzieŭ, jak jany ačapili budynak i vyvodzili inšych studentaŭ. Znajšli jaho, dziakujučy mižnarodnamu supracoŭnictvu.
Kraina, jakaja mieła dostup da jaho asabistych danych, pieradała ich u milicyju, užo praź dźvie hadziny chłopca zatrymali. Biełaruś supracoŭničaje pa hetym pytańni z 89 krainami śvietu.
A voś jašče adna historyja. U Minsku školnik vyrašyŭ pažartavać ź siabra, jaki z baćkami źbiraŭsia palacieć na adpačynak. Chłopiec «zaminiravaŭ» samalot.
Pasažyry ŭžo prajšli na pasadku, samalot pačaŭ ruchacca, i tut jaho daviałosia viartać nazad, a ŭsich turystaŭ evakujavać i praviarać. Žart kaštavaŭ baćkam školnika 60 tysiač rubloŭ — takuju niaŭstojku naličyła avijakampanija. Kolki kaštuje vyjezd śpiecyjalistaŭ na vyklik ab miniravańni, u MUS nie raskryvajuć.
Taksama niaredkaść, kali iłžyvyja paviedamleńni ab miniravańni robiać napadpitku. Tak, minčuk paprasiŭ siabra padvieźci jaho dadomu, toj admoviŭ, bo jechaŭ u balnicu. Tady mužčyna pazvaniŭ u milicyju i skazaŭ, što ŭ balnicy zakładzienaja bomba. Cikava, što raniej jaho ŭžo sudzili za takoje ž złačynstva.
Što tyčycca «miniravańnia» handlovych centraŭ i dziaržaŭnych arhanizacyj u Minsku, to ni śledčyja, ni milicyja nie paviedamlali pra toje, što atrymałasia znajści choć adnaho złačyncu. Miž tym, kolkaść takich iłžyvych paviedamleńniaŭ letaś vyrasła.
Jak adznačali siłaviki, takija sihnały źjaŭlalisia napiaredadni značnych dziaržaŭnych mierapryjemstvaŭ, čaściej za ŭsio jany pastupali na elektronnuju poštu arhanizacyj z-za miažy.
Iłžyvaje paviedamleńnie ab miniravańni abo padpale — kryminalnaje złačynstva (art. 340 KK), adkaznaść nastupaje z 14 hod, pakarańnie — štraf, aryšt, «chimija» na termin da 3 hod ci navat pazbaŭleńnie svabody da 5 hod. A kali paviedamleńnie pryviało da ŭronu ŭ bujnym pamiery i ciažkich nastupstvaŭ — pazbaŭleńnie svabody možna być užo da 7 hod.
Pad bujnym pamieram škody majuć na ŭvazie straty na sumu, jakaja ŭ 250 i bolš razoŭ pieravyšaje adnu bazavuju vieličyniu. Pad ciažkimi nastupstvami razumiejecca parušeńnie raboty vakzałaŭ, hramadskaha transpartu, aeraportaŭ, zryŭ masavaha mierapryjemstva.
Masavyja evakuacyi pa krainie: «zaminiravany» ŭniviersitety, škoły, pradpryjemstvy
Šviejcarski Proton: Mejł pra miniravańnie samalota Ryanair dasłali paśla taho, jak łajnier paviarnuŭ u bok Minska
Maładuju supracoŭnicu «Pielenha» aryštavali za «zakliki da naniasieńnia škody Biełarusi». Joj pahražaje da 12 hadoŭ3
Kamientary