«Biełaruskaja prapahanda bje niaŭład». Raspytali rasijskaha palitołaha, ci varta čakać reakcyj na kpiny ŭ adras Pucina ź dziaržTB
Na biełaruskim dziaržaŭnym telebačańni patrolili Uładzimira Pucina: u efiry namiaknuli, što jon razam ź inšymi prezidentami, u adroźnieńnie ad Łukašenki, chavaŭsia padčas COVID ad naroda «pa bunkierach» i karystaŭsia botaksam. Vielmi chutka aŭtar vykazvańniaŭ Jaŭhien Pustavy pačaŭ apraŭdvacca tym, što nibita mieŭ na ŭvazie Bajdena, a nie Pucina i ŭvohule «topić za siabroŭstva z Rasijaj». Ale heta ŭžo nie pieršaja pierapałka pamiž rasijskaj i biełaruskaj prapahandaj, dzie kožny bok imkniecca pakrytykavać ci patrolić apanienta.
Paprasili rasijskaha palitołaha Ivana Preabraženskaha prakamientavać, ci ciahnie heta na miedyjaskandał i ci čakać nastupstvaŭ (ci chacia b novych «sieryj» z uzajemnymi kpinami).
Ekśpiert ličyć, što rasijskaja prapahanda atrymała kart-błanš na krytyku Łukašenki ŭ ŚMI akurat paśla situacyi z zakryćciom «Kamsamołki» i zatrymańniem žurnalista vydańnia Hienadzia Mažejki.
«Da 2020 hoda ŭ Rasii byŭ poŭny dazvoł na krytyku Łukašenki. Paśla taho ž, jak u kancy 2020-ha Pucin kančatkova zrabiŭ staŭku na Łukašenku, z Kramla byli vyčyščanyja ludzi, jakija vystupali za toje, kab rabić niejkija alternatyŭnyja staŭki ŭ Biełarusi, stvarać chaj prarasijskuju, ale apazicyju. Adpaviedna była ŭviedzienaja zabarona na krytyku Łukašenki, i jana dosyć vyrazna vykonvałasia. Ciapier ža na ŭzroŭni kiraŭnictva rasijskaj prapahandy hetaja zabarona nanova źniataja.
Situacyja z «KP» vyklikała vialikaje razdražnieńnie: adna sprava — sumiesna zatrymlivać apazicyjanieraŭ u Maskvie, a zusim inšaja, kali Łukašenka i jaho siłaviki napramuju damaŭlajucca z rasijskimi śpiecsłužbami, abychodziačy Kreml. Heta naniesła škodu, pierš za ŭsio, błoku kramloŭskaj prapahandy: uskładniła adnosiny z tym ža Uładzimiram Sunhorkinym i ahułam z «Kamsamołkaj», jakaja źjaŭlajecca vielmi ŭpłyvovym i važnym vydańniem u Rasii».
Na dumku Ivana Preabraženskaha, mienavita žadańnie abaranić intaresy svajho vydańnia, adpomścić za jaho dasiažnym šlacham pryviało da porcyi krytyki na adras Łukašenki ŭ rasijskich ŚMI:
«Na ŭzroŭni kaardynatara rasijskaj prapahandy (chutčej za ŭsio, Alaksieja Hromava, pieršaha namieśnika kiraŭnika administracyi prezidenta), jość pamknieńni vykanać niefarmalnyja abaviazki pierad «Kamsamołkaj» — vielmi čytanaj rasijskaj haziety, važnaj dla prapahandy, jakuju ŭ tym liku čytaje Pucin. Praz vystupy ŭ ŚMI jany imknucca niejak abaranić intaresy Sunhorkina.
Biełaruskaja prapahanda, jakaja drenna sčytvaje sihnał i nie razumieje, adkul idzie ŭdar (jana, vidavočna, nie vieryć, što rasijskaja prapahandysckaja sistema moža pracavać sama, biez kamandy z samaha vierchu), pačynaje adkazvać. Ale adkazvaje i bje niaŭład, zanadta vysoka: «Kali vy siabie pavodzicie drenna, my pra Pucina možam voś takija brydoty skazać!» U vyniku atrymlivajecca pierakryžavanaja łajanka».
Dadatkovym faktaram infarmacyjnych atak, na dumku ekśpierta, moža być niezadavolenaść rasijskaha ŭrada palitykaj Łukašenki pa intehracyi: niahledziačy na padpisańnie ŭsich pahadnieńniaŭ, u realnaści jany pakul nie pracujuć.
Čamu situacyja z «Kamsamołkaj» nie mieła bolš žorstkaj reakcyi, kali jana zakranuła intaresy Kramla?
«Mnie padajecca, tut Pucin prosta vykonvaje svaju tradycyjnuju rolu: maderatara, jaki vychodzić na arenu tolki ŭ apošni krytyčny momant. Na siońnia Łukašenka i siłaviki — heta adzin umoŭny kłan, druhi — Sunhorkin, Hromaŭ i inšyja bačnyja prapahandysty.
U vypadku, kali pad Pucinym adbyvajecca kanflikt roznych kłanaŭ i situacyja nie krytyčnaja, jon nie budzie ŭmiešvacca i skaža: raźbirajciesia sami. Chutčej za ŭsio, tak i adbyłosia. Ën moh vykazać niejkuju niezadavolenaść Łukašenku asabista, toj patłumačyŭ matyvacyju, a paśla Pucin dystancyjavaŭsia.
Siońnia znoŭ možna napadać na Łukašenku, ale žorstkaj reakcyi na jaho dziejańni nie budzie da taho času, pakul niechta nie patłumačyć Pucinu, čamu jany pahražajuć asabista jamu. Hetaja situacyja, vidavočna, jamu piersanalna nie pahražaje».
Toje samaje, ličyć surazmoŭca, budzie i z kpinami na adras Pucina ź biełaruskaha telebačańnia: naŭrad ci na ich vyrašać źviartać uvahu, bo ŭ ich adsutničaje vidavočnaja pahroza (samomu Pucinu naŭrad ci daniasuć pra heta).
«Pakul my prosta nazirajem razborki pamiž peŭnymi kłanami. Tearetyčna možna ŭjavić, što asabistyja svarki piarojduć na miždziaržaŭny ŭzrovień, ale vyklučna tady, kali Łukašenka i Pucin nie damoviacca na asabistym uzroŭni. Kali my kažam pra piersanalisckija aŭtarytarnyja (kali navat nie tatalitarnyja) režymy, to kanflikt dziaržaŭ mahčymy tolki na ŭzroŭni kanfliktaŭ dziejnych lidaraŭ. Na žal, tolki ich mierkavańni pracujuć na palapšeńnie ci paharšeńnie adnosin dźviuch dziaržaŭ», — reziumuje Ivan Preabraženski.
Analityk Arciom Šrajbman vykazaŭsia pra kiejs z telekanałam STB, viadoŭca jakoha niečakana pačaŭ kpić z Pucina
«Jeździli-jeździli, a potym ich nie vypuścili». Biełarusy sutykajucca ź jašče adnym vidam represijaŭ3
Kamientary