«Nie baču mahčymaści ŭzhadnić padatkovyja kodeksy, kab nie stracić suvierenitetu». Što kažuć ekśpierty pra sustreču Pucina i Łukašenki
Adbyłasia čarhovaja sustreča Łukašenki i Pucina sa spravazdačaj ab uzhadnieńni usich 28 sajuznych prahram intehracyi (raniej było bolš za 30 darožnych kart). Ale ŭsiaho taho asnoŭnaha, što Łukašenka prosić u Rasii, učora zdabyta nie było: ni kampiensacyi padatkovaha manieŭru, ni hazu pa canie jak dla Smalenskaj vobłaści.
«Naša Niva» pahavaryła z pradstaŭnikami biznesu, dypłamatami, palitykami i ekanamistami. Jak varta aceńvać vyniki sustrečy?
«U vyniku sustrečy Pucin čarhovy raz prademanstravaŭ, što kantraluje Biełaruś»
Analizujučy palityčnyja aśpiekty sustrečy, pamočnik Śviatłany Cichanoŭskaj Valeryj Kavaleŭski ličyć, što ŭsio heta — destruktyŭna i nie adpaviadaje nacyjanalnym intaresam.
«U vyniku sustrečy Pucin čarhovy raz prademanstravaŭ, što kantraluje Biełaruś i prymaje losavyznačalnyja rašeńni, a Łukašenka pakazaŭ čynoŭnikam i siłavikam, što ŭ jaho ŭsio jašče jość sajuźnik.
Fota: dw.com
Sustrečami z Pucinym i abmierkavańniem kart, jakija vyciakajuć z antykanstytucyjnaj damovy ab hetak zvanaj «sajuznaj dziaržavie», nadańniem hetamu nibyta «značnaści» Łukašenka taksama adciahvaje rašeńnie sapraŭdy značnych dla biełaruskaha hramadstva prablem.
A Rasija praciahvaje zajmacca palityčnym avanturyzmam, anansujučy niejkija damoŭlenaści z tym, chto nie pryznany ŭnutry krainy i za miežami.
Tym samym Rasija nasupierak słovaŭ taho ž Pucina i Łaŭrova ab tym, što «biełarusy pavinny sami vyrašyć unutranyja supiarečnaści», nie daje biełarusam ich vyrašyć samim, bo jany, abiacajučy niejkija kredytnyja hrošy, tym samym padtrymlivajuć adzin z bakoŭ.
Ale sens u tym, što z padpisańniem hetych damovaŭ Łukašenka stanie niepatrebny Rasii.
Ich hałoŭnaja zadača — uzmacnić kantrol nad Biełaruśsiu, pry hetym nie šlacham darahoj i niebiaśpiečnaj vajennaj akupacyi, a nibyta bolš doŭhim, ale i bolš nadziejnym šlacham «intehracyi», — skazaŭ Kavaleŭski.
«Jak pakazvaje praktyka, nijakaha kantrolu za vykanańniami damoŭlenaściaŭ u našym rehijonie niama»
Adzin ź biełaruskich dypłamataŭ na ŭmovach ananimnaści prakamientavaŭ sustreču tak:
«Łukašenka ŭ 2020 hodzie paśladoŭna razburyŭ źniešniuju i ŭnutranuju palityku Biełarusi, zamacavaŭšy krainu ŭ śfiery rasijskaha ŭpłyvu z metaj zastacca pry ŭładzie.
Aficyjnaja rytoryka jaho spatkańniaŭ z Pucinym nahadvaje pachod za haryzont — vyniki niby addalajucca, kali da ich nabližaješsia.
Ale realnyja nastupstvy «intehracyi» pakul što nie pierahukvajucca z «darožnymi kartami» — za hod Łukašenka pahadziŭsia na raźmiaščeńnie ŭ Biełarusi rasijskich vajskovych abjektaŭ i ŭzbrajeńnia, pieranakiravańnie ekspartu ź litoŭskich partoŭ na rasijskija, užyvańnie Rashvardyi dla padaŭleńnia pratestaŭ.
Pra stupień źlićcia vojskaŭ možna mierkavać pa słovach Łukašenki ab «adnoj armii» i źniščeńni biełaruskaj kultury na karyść rasijskaj — taki vynik pakidaje moładzi čałaviek, mocnym bokam jakoha ŭsiaho dva hady tamu ličyłasia abarona niezaležnaści.
Što datyčyć samich «darožnych kart», to ŭ bytnaść u Biełarusi Babiča, kali hetyja pracesy aktyvizavalisia, sens naviazvańnia hetych pahadnieńniaŭ tłumačyŭsia tym, što rasijan vielmi mocna razdražniała rola Biełarusi jak chaba pa pastaŭcy šerych tavaraŭ u Rasiju.
Niešta, naprykład, admienu ŭkaza ab nulavoj rastamožcy, ruskim udałosia admianić i bieź intehracyjnych kart, ja dumaju, što i bolšaść inšych pytańniaŭ možna było vyrašyć, prynamsi, u ramkach JEAES.
Zrešty, jak pakazvaje praktyka, nijakaha kantrolu za vykanańniami damoŭlenaściaŭ u našym rehijonie niama — nu była ŭ nas damova ab readmisii ź ES, i što, my jaje vykonvali? Dumaju, rasijanie taksama heta ŭsio razumiejuć», — kaža dypłamat.
«Adzinaja valuta bieź biudžetnaha abjadnańnia moža vyklikać surjoznyja kryzisy»
Z ekanamičnaj častkaj hetych acenak zhodna navukovy supracoŭnik BEROC (Kijeŭ) Kaciaryna Barnukova.
Fota: onliner.by.
«Adzinaja hrašova-kredytnaja palityka» — heta pra staŭku refinansavańnia, pra tarhietavańnie inflacyi, pra pamiery hrašovaj masy — u hetych pytańniach składana intehravacca na pryncypach hetak zvanaj «sajuznaj dziaržavy», dzie praduhledžany nibyta roŭny ŭdzieł Biełarusi i Rasii, bo dla hetaha treba abo adna valuta, abo abo adzin rehulatar, jaki heta budzie vyznačać, i voś tut — tupik.
Jak pakazvaje dośvied jeŭrazony, navat adzinaja valuta bieź biudžetnaha abjadnańnia moža vyklikać surjoznyja kryzisy, kali ŭ ekanomik roznyja trendy — Hiermanii, naprykład, treba mocny jeŭra, a Hrecyi słaby.
Abodva centrabanki — i biełaruski, i rasijski, — nie chočuć adzinaj valuty, bo hublajecca efiektyŭnaść hrašovaj palityki, jakaja nie moža adpaviadać patrebam kožnaj ekanomiki paasobku.
«Ahulnyja płaciežnyja sistemy i płaciežnaja prastora» — hučyć zyčna, ale najchutčej havorka pra toje, što karty «Mir» i «Biełkart» buduć pracavać na terytoryi dźviuch krain. PayPal, naprykład, pracuje ŭ 200 krainach śvietu.
Pakul što straty suvierennaści ekanamičnaj palityki nie vidać. Navat u administravańni padatkaŭ abmiežavalisia ŭskosnymi, dzie najčaściej byvajuć złoŭžyvańni i sproby vykarystoŭvać Biełaruś jak afšor. Možna zhadać schiemy z reekspartam i rastvaralnikami. Ja tak razumieju, Rasii, jakaja niedaatrymlivała padatki, heta mocna nie padabałasia», — kaža Barnukova.
«Navat ES nie patrabuje padatkovaj harmanizacyi»
My taksama spytali mierkavańnie pra sustreču ŭ adnaho z zaŭvažnych biznesmienaŭ na ŭmovach ananimnaści.
«Ja nie baču realnych mahčymaściaŭ uzhadnić padatkovyja kodeksy, kab nie vyklikać chaos finansavaj sistemy, nie stać pry hetym padatkovym rehijonam RF i nie stracić suvierenitet.
Navat ES nie patrabuje padatkovaj harmanizacyi, u roznych štatach ZŠA dziejničajuć roznyja padatkovyja režymy. Kali ŭjavić, što nam u śniežni skažuć, što sa studzienia pierachodzim na rasijskija padatki — heta katastrofa dla buchhałteryi, heta kaniec mnohim isnym biznes-schiemam, kaniec svabodnym ekanamičnym zonam i PVT.
U krain roznyja struktury ekanomiki: jany zarablajuć na vuhlevadarodach, my zarablajem na inšym, u ich małym biznesam ličycca adno, u nas inšaje. Słovam, ja nie dumaju, što tut niešta možna zrabić adnamomantava, dumaju, što hetaja «harmanizacyja» ŭ ciapierašnim vyhladzie, a značyć nijakim, moža ciahnucca biaskonca.
Ale samaja važnaja maja dumka ŭ tym, što ŭsie hetyja «ekanamičnyja karty» ŭ realnaści zusim nie toje, čym treba lačyć prablemy našaj ekanomiki. Našy realnyja prablemy zusim inšyja i damovami z Rasijaj nie vyrašajucca — heta pytańnie ŭnutranaj ekanamičnaj palityki», — skazaŭ «Našaj Nivie» biełaruski biznesmien.
«Pazvaniŭ ministr: Anžalika, kudy ty lezieš?» Byłaja top «Koka-Koły» raskazvaje, jak stała śpikierkaj Kaardynacyjnaj rady19
Kamientary