«Chadajničaju vydalić z suda Hładkuju»: pačaŭsia sud nad anarchistam Mikałajem Dziadkom

Dziadka zatrymali jašče 11 listapada — jon chavaŭsia na kanśpiratyŭnaj kvatery ŭ Asipovickim rajonie.

Paśla siłaviki vykłali videa z «pryznańniami» Mikałaja. Na zapisie chłopiec vyhladaje vielmi kiepska, padobna, što da jaho ŭžyvali siłu i śpiecsrodki.

Čytajcie taksama:

Na kanśpiratyŭnaj kvatery ŭziali lidara anarchistaŭ Dziadka. Pahladzicie, u jakim jon stanie paśla zatrymańnia VIDEA

Dziadok zajaviŭ, što jaho mocna pabili pry zatrymańni, advakat patrabuje sudova-miedycynskaj ekśpiertyzy

«Heta biesčałaviečna», — baćka palitviaźnia Mikałaja Dziadka źviarnuŭsia da ŭładaŭ

Mikołu Dziadka źmiaścili ŭ karcar za vyhuk «Žyvie Biełaruś!»

Ciapier Dziadka vinavaciać pa troch artykułach KK: u arhanizacyi dziejańniaŭ, jakija parušajuć hramadski paradak; niezakonnych dziejańniach u dačynieńni da ahniastrelnaj zbroi, bojeprypasaŭ i vybuchovych rečyvaŭ; u zaklikach da dziejańniaŭ, skiravanych na pryčynieńnie škody nacyjanalnaj biaśpiecy Respubliki Biełaruś. 

Mikołu Dziadku pahražaje da 7 hadoŭ.

Na pačatku pasiadžeńnia padavalisia chadajnictvy. Dziadok paprasiŭ vydalić žurnalistku Ludmiłu Hładkuju, bo jana raniej dapytvałasia ŭ jakaści śviedki pa kryminalnaj spravie (pa jakoj, praŭda, nie ŭdakładniŭ) i puścić u zału jaho baćku, Alaksandra Dziadka, u jakaści abaroncy syna.

Abodva chadajnictvy sud adchiliŭ: maŭlaŭ, Hładkaja maje prava prysutničać, a Alaksandr Dziadok raniej dapytvaŭsia śviedkam pa hetaj spravie i da taho ž abvinavačanaha abaraniaje advakat Jaŭhien Masłaŭ.

Prakuror začytaŭ abvinavačvańnie: Dziadok «publična padstrakaŭ da destruktyŭnych dziejańniaŭ», «uździejničaŭ na śviadomaść hramadzian, naŭmysna raspaŭsiudžvajučy praź internet zakliki, nakiravanyja na pryčynieńnie škody Respublicy Biełaruś» i hetak dalej.

Majucca na ŭvazie pasty, jakija Dziadok raźmiaščaŭ u svaim telehram-kanale.

Akramia taho, Mikałaja vinavaciać i ŭ tym, što ŭ žniŭni jon sam udzielničaŭ u «niezakonnych masavych mierapryjemstvach», dzie «publična vykrykvaŭ łozunhi, ažyćciaŭlaŭ chłapki rukami» i «vychodziŭ na prajeznuju častku, što pryviało da parušeńniaŭ u ruchu haradskoha transpartu».

Taksama, pa viersii abvinavačvańnia, padčas pieratrusu ŭ Dziadka znajšli niekalki butelek z kaktejlem Mołatava.

Mikoła Dziadok nie pryznaŭ vinu.

Zatym vysłuchali pakazańni śviedak.

Heta susiedzi pa domie, dzie chavaŭsia Dziadok, žychary pasiołka Sasnovy Asipovickaha rajona. Pieršy — piensijanier Alaksandr Astapovič. Mužčyna raspavioŭ, što byŭ susiedam Dziadka. Kaža, časam bačyŭ chłopca, vitaŭsia i ŭsio. A paźniej Astapovič u jakaści paniatoha prysutničaŭ pry pieratrusie ŭ kvatery Dziadka. Da jaho «kala 12-j nočy pryjšli rabotniki orhanaŭ».

Śviedka skazaŭ, što cialesnych paškodžańniaŭ padčas pieratrusu na Dziadku nie bačyŭ:

«Byŭ čyścieńki, nidzie nie pabity, ničoha, u kajdankach. Rabotniki milicyi pavodzili siabie vietliva, i jon [Dziadok] taksama siabie dobra pavodziŭ».

Śviedka zhadaŭ, što padčas pieratrusu ŭ adnym z pakojaŭ znajšli «fotakamieru, nož, šmat kanviertaŭ z hrašyma. Pra hrošy jon [Dziadok] skazaŭ spačatku, što nie viedaje, adkul jany, a paśla skazaŭ: heta maje źbieražeńni. Hrošy byli jeŭra, złotyja, zdajecca, i baksy».

Na kuchni znajšli «try butelki ź niejkaj vadkaściu». Butelki byli zatknutyja niejkimi anučkami, kaža Astapovič, vadkaść mieła pach bienzina.

Druhi śviedka Uładzimir Palakoŭ taksama piensijanier. Jon taksama byŭ paniatym padčas pieratrusu. 

Palakoŭ raspavioŭ toje ž, što i minuły śviedka: tak, u kvatery Dziadka znajšli kanvierty z valutaj. Na kuchni byli butelki, kali adnu ŭskryli, to pach byŭ kierasina ci niejkaha paliva. Śladoŭ źbićcia u Mikoły bačna nie było.

Jašče adna śviedka — Volha Radzijonava, maładaja žančyna, jakoj naležyć kvatera, dzie chavaŭsia Dziadok.

Jana raspaviała, što siabruje ź Mikołam, niejak u pierapiscy ź im jana zhadała, što maje pustuju kvateru. U vyniku, niedzie z červienia ci lipienia u hetuju kvateru z dazvołu haspadyni ŭjechaŭ Mikoła Dziadok. Razoŭ 5 jaho naviedvała i sama Radzijonava.

Jana kaža: bačyła videa SK, dzie pakazvajuć šafu na kuchni, dzie nibyta znajšli butelki. Ale ž raniej padčas svaich vizitaŭ jana časam adčyniała tuju šafu i butelek nikoli nie bačyła, kaža śviedka.

Pierad pieratrusam ci padčas jaho ani samu dziaŭčynu, ani jaje baćku (jany razam vałodajuć žyłym pamiaškańniem) u viadomaść pra heta nie stavili. Paśla pieratrusu kvateru nie apiačatali — jana prosta stajała adkrytaj sa złamanymi dźviaryma.

• 0
• 0
• 0
• 0
• 0
• 0
• 0
• 0