Aryštavany aficer Hienštaba, jaki raskryŭ płany siłavikoŭ na Dzień Voli
U płanie achovy budynkaŭ nie było ničoha važnaha dla apazicyi. Cam fakt aryštu, adnak, dadatkovaje śviedčańnie taho, što ruch za hramadzianskija pravy maje padtrymku siarod aficerstva.
Jak paviedamiŭ telekanał ANT, aryštavany kapitan Dzianis Urad, jaki 14 sakavika na dziažurstvie na pastu śpiecsuviazi Hienštaba sfatahrafavaŭ sakretnaje piśmo ad ministra ŭnutranych spraŭ ministru abarony — možna mierkavać, što heta dakumient ab achovie siłavych budynkaŭ na 25 Sakavika.
Telekanał paviedamlaje, što kopiju dakumienta aficer «adpraviŭ polskamu telehram-kanału».
Tak dziaržaŭnyja ŚMI nazyvajuć adzin z apazicyjnych kanałaŭ, jaki ŭ Biełarusi pryznany ekstremisckim.
Telekanał nie paviedamiŭ, jakim čynam biełaruskija śpiecsłužby vyjavili krynicu hetaj infarmacyi. Mahčyma, dadzieny telehram-kanał apublikavaŭ dakumient całkam, a dostup da jaho mieła abmiežavanaje koła ludziej, što palehčyła vyjaŭleńnie aŭtara.
Raniej za miažu vyjechaŭ vysokapastaŭleny aficer HUBAZiK Stanisłaŭ Łupanosaŭ, jaki pieradaŭ «BajPołu» vialiki masiŭ infarmacyi, u tym liku aŭdyjazapisy. Łupanosaŭ paviedamiŭ, što ŭ centralnym aparacie MUS kala 400 čałaviek pastavili podpisy za Viktara Babaryku. A adnačasova ź infarmacyjaj pra kapitana Urada stała viadomaje imia padpałkoŭnika KDB, jaki pieradavaŭ infarmacyju zamiežnym apazicyjnym asiarodkam, — heta Alaksiej Chrałovič.
Pavodle infarmacyi ANT, suprać kapitana Urada zaviedzienaja kryminalnaja sprava pa artykule ab zdradzie radzimie, jamu pahražaje da 20 hadoŭ pazbaŭleńnia voli, jon znachodzicca ŭ SIZA KDB.
Ad advakata i siamji zatrymanaha infarmacyi pakul niama. Pakolki nieviadoma, kamu mienavita i što jon pieradaŭ, to niemahčyma skazać, jakoje abvinavačvańnie dojdzie da suda. Kali havorka tolki pra apublikavańnie dakumienta pad hryfam «sakretna», to naŭrad ci heta moža kvalifikavacca jak «zdrada radzimie».
Kamientary