U červieni 2020 hoda ŭ Kramianiovaj dalinie była stvorana moŭnaja sistema na asnovie štučnaha intelektu GPT-3, jakaja moža samastojna pisać teksty. GPT-3 byŭ raspracavany kampanijaj OpenAI u San-Francyska.
Štučny intelekt praanalizavaŭ miljardy słoŭ z knih, artykułaŭ i veb-sajtaŭ, u vyniku čaho GPT-3 viedaje kala 200 miljardaŭ słoŭ. Navučańnie mašyny piśmu kaštavała dziasiatki miljonaŭ dalaraŭ, piša The Nature.
GPT-3 źjaŭlajecca najbolš mocnaj i daskanałaj moŭnaj sistemaj štučnaha intelektu. Čałavieku patrabujecca ŭsiaho tolki dać nakirunak mašynie — i jana sama napiša tekst, jaki, pa jaje mierkavańni, adpaviadaje hetamu nakirunku. Štučny intelekt moža napisać pieśniu, apaviadańnie, artykuł, intervju, ese, techničnyja instrukcyi i šmat inšaha.
Kamanda OpenAI paviedamlaje, što GPT-3 nastolki daskanały, što ludziam było składana adroźnić jaho teksty ad tekstaŭ, napisanych čałaviekam. Štučny intelekt taksama moža davać piśmovyja adkazy na pytańni, vypraŭlać hramatyčnyja pamyłki, rašać matematyčnyja zadačy i navat stvarać kampjutarny kod, kali karystalniki prosiać jaho vykanać zadaču pa prahramavańni. Papiarednija sistemy štučnaha intelekty taksama mahli vykonvać hetyja zadačy, adnak tolki paśla admysłovaj padrychtoŭki sistemy dla kožnaj asobnaj zadačy.
Padobnyja moŭnyja sistemy — heta pierš za ŭsio biznes-prapanovy dla bujnych technałahičnych kampanij. Naprykład, takija technałohii vykarystoŭvaje Google, kab palepšyć vyniki pošukavaj sistemy i jakaść mašynnaha pierakładu. U hetych sistemach zacikaŭlenyja taksama Facebook, Microsoft i Nvidia.
OpenAI taksama prapanoŭvaje GPT-3 jak kamiercyjnuju pasłuhu. Ciapier raspracoŭščyki teścirujuć zdolnaść GPT-3 abahulvać jurydyčnyja dakumienty, adkazvać na zapyty karystalnikaŭ, prapanoŭvać kampjutarny kod i navat identyfikavać emacyjny stan ludziej pa ich paviedamleńniach.
Adnak, niahledziačy na svaju ŭniviersalnaść, GPT-3 sutykajecca z tymi ž prablemami, ź jakimi sutykalisia papiarednija prahramy dla hienieracyi tekstu. Štučny intelekt časam dapuskaje niedarečnyja pamyłki, bo jon analizuje statystyku spałučeńnia słoŭ i słovazłučeńniaŭ, jakija mašyna pračytała, ale biez razumieńnia ich značeńnia.
I choć daśledčyki pracujuć nad tym, kab moŭnyja sistemy nie rabili sensavych pamyłak, navučyć štučny intelekt budavać pryčynna-vynikovyja suviazi ŭsio jašče zastajecca niepieraadolnaj zadačaj.
Moŭnyja sistemy štučnaha intelektu ŭjaŭlajuć saboj niejronnyja sietki. Jany trenirujucca spačatku šlacham padstanoŭki prapuščanych słoŭ u tekst, što ŭzmacniaje suviazi pamiž ich vyličalnymi elemientami, ci niejronami. Čym bolš uzmacniajucca suviazi, tym mienšaj stanovicca vierahodnaść pamyłak. Takija madeli stanoviacca bolš składanymi pa miery raźvićcia vyličalnych technałohij.
Pamier niejronnaj sietki vyznačaje jaje mahčymaści. Čym bolš niejronaŭ i bolš suviaziaŭ pamiž imi, tym bolš paramietraŭ maje moŭnaja sistema. GPT-3 maje 175 miljardaŭ niejronaŭ, što robić jaje najvialikšaj niejronnaj sietkaj u śviecie. Nastupnaja pa vieličyni maje ŭsiaho tolki 17 miljardaŭ vyličalnych elemientaŭ.
Takaja kolkaść niejronaŭ dapamahaje sistemie raspaznavać hramatyku, strukturu i žanr taho, što treba napisać. Štučnamu intelektu možna dać prykład zadačy abo zadać pytańnie, a GPT-3 užo samastojna praciahnie hetu temu.
Pry hetym sistema adaptuje svoj adkaz da stylu i źmiestu taho tekstu, jaki ŭvodzić karystalnik. Heta prykład chutkaha prahramavańnia, u vyniku čaho atrymlivajucca adnosna jakasnyja teksty.
Adroźnieńnie GPT-3 ad papiarednich madelaŭ u tym, što jon paśpiachova spraŭlajecca z zadačami, da jakich štučny intelekt nie rychtujuć zahadzia. Sprava ŭ tym, što sistemu vučyli vučycca samastojna vykonvać novyja dla jaje zadačy. Mienavita tamu technałohija vielmi hnutkaja, kab praanalizavać dadzieny joj kirunak i napisać na hetaj asnovie łahičny tekst.
Kamientary