Zdymki biełaruskaj viersii «Što? Dzie? Kali?» pieranieśli na niavyznačany termin. Raźbirajemsia, što zdaryłasia

Jašče ŭ kastryčniku ŭ čatach i supołkach źjaviłasia infarmacyja, što vosieńskija i zimovyja hulni biełaruskaha intelektualnaha kłuba «Što? Dzie? Kali?» nie adbuducca. Pryčyna — nibyta hulcy nie zachacieli zdymacca dla telekanała ANT. Ale ž u kłubie heta rašuča abviarhajuć. Što ž adbyłosia nasamreč?

«Što? Dzie? Kali?» — davoli zakrytaja tusoŭka, bolšaść znaŭcaŭ i kapitanaŭ admaŭlajecca razmaŭlać sa starońnimi. Adnak abryvistaja infarmacyja ŭsio adno prasočvajecca.

Pavialičyć

Pa infarmacyi «Našaj Nivy», pytańnie nakont zdymkaŭ vosieńskich i zimovych hulniaŭ abmiarkoŭvałasia ŭ kancy žniŭnia. Bolšaść znaŭcaŭ vystupiła suprać vychadu pieradačy na ANT, bo, maŭlaŭ, na telekanale pačali źjaŭlacca zusim niepryhožyja palityčnyja rečy. Ale byli i tyja, chto zachavaŭ niejtralitet u hetym pytańni.

Niekalki hulcoŭ raspaviali, što zdymki abmiarkoŭvalisia pa videakanfierencyjach u kancy žniŭnia i ŭ kancy vieraśnia.

«Znaŭcy chacieli praciahvać hulać, ale nie chacieli, kab pieradača vychodziła na ANT. Ludzi adkryta kazali, što nie chočuć, kab ich asacyjavali z hetym kanałam. Abmiarkoŭvali, jakija jość varyjanty. Tady Aleś Muchin skazaŭ, što, moža, pasprabuje znajści inšy kanał. Važna adznačyć: hutarka była cyvilizavanaj, Muchin pahadziŭsia z našaj pazicyjaj i paabiacaŭ pašukać varyjanty», — raspaviali «Našaj Nivie» znaŭcy.

Sam Aleś Muchin trymaŭ niejtralitet u pytańni z ANT, ale hulcam nie vykazvaŭ nijakich pahroz, nie pałochaŭ nastupstvami. Znaŭcy danieśli jamu svaju pazicyju, abmierkavali, jak lepš zrabić, kab zachavać prahramu. Muchin pavodziŭ siabie absalutna hodna, kažuć ludzi.

Darečy, paśla 9 žniŭnia vyjšaŭ adkryty list hulcoŭ «Što? Dzie? Kali?» z asudžeńniem hvałtu. Surazmoŭcy kažuć, što i tady Aleś Muchin prajaviŭ siabie adekvatna.

«Jon paprasiŭ, kab ź lista prybrali nazvu televizijnaha kłuba, kab nie było prablem. Bo hety list byŭ nie ad udzielnikaŭ pieradačy, a ad hulcoŭ u spartyŭnaje «Što? Dzie? Kali?», jaho padpisvali i hulcy ź inšych krainaŭ, nie tolki ź Biełarusi. Heta nie byŭ niejki ŭltymatum ci list z umovami — prosta našaje vykazvańnie suprać hvałtu i pa situacyi z vybarami.

Kažuć, što kahości z hulcoŭ prasili adklikać svoj podpis — nie viedaju, nakolki heta praŭda. Da mianie asabista z takoj prapanovaj nichto nie źviartaŭsia», — kaža adzin z surazmoŭcaŭ.

U kastryčniku pytańnie zdymkaŭ abmiarkoŭvałasia znoŭ.

«Ahulnaj videakanfierencyi ŭžo nie było, razmaŭlali tolki z kapitanami. Im paviedamili, što zdymki pieradačy mohuć być tolki dla ANT, inšych varyjantaŭ niama», — raspaviali «Našaj Nivie» znaŭcy. Paśla hetaha bolšaść nibyta admoviłasia ad udziełu ŭ zdymkach.

Kab udakładnić hetuju infarmacyju, «Naša Niva» źviazałasia z Maryjaj Piatroŭskaj, pres-ataše kłuba znaŭcaŭ. Jana kateharyčna abviarhaje viersiju, ahučanuju vyšej. Pa jaje słovach, zdymki admianili praz karanavirus.

«Na hety momant zdymki adkłali na niavyznačany termin. Pryčyna — składanaja pandemičnaja situacyja. Try kapitany z vaśmi žyvuć za miažoj, niekatoryja znaŭcy taksama. Biez častki hulcoŭ prablematyčna pravieści siezon, a biez kapitanaŭ — niemahčyma. 

Inicyjatyva ab pieranosie sychodziła ad zdymačnaj hrupy. Apytvali ludziej jašče ŭ žniŭni, tyja, chto za miažoj, fizična nie mahli pryjechać, a kali b i pryjechali, to nie fakt, što zmahli b paśla vyjechać. Padstaŭlać ludziej my nie možam.

Plus, dzie b ni pravodzilisia zdymki, my siońnia nie možam harantavać biaśpieku dla zdaroŭja ludziej. Usie astatnija abmierkavańni — unutrykłubnyja razmovy, jakija nie majuć dačynieńnia da pryniataha rašeńnia», — paviedamiła Piatroŭskaja.

«Naša Niva» naŭprost pacikaviłasia: dyk ci admaŭlalisia znaŭcy zdymacca dla ANT?

«Heta ŭnutranaja sprava, jakaja nie maje dačynieńnia da pryniataha rašeńnia ab pieranosie zdymak», — paŭtaryła Maryja Piatroŭskaja.

Jana padkreśliła: pakul situacyja z pandemijaj takaja, jakaja jość, adnavić zdymki niemahčyma.

Pavialičyć

Tady «Naša Niva» źviazałasia z Alesiem Muchinym, znaŭcam i viadučym biełaruskaj pieradačy «Što? Dzie? Kali?». Jon patłumačyŭ: zdymki sapraŭdy pieraniesienyja, ale pryčynaj stała nie kankretna «karona» ci palityka, a sukupnaść faktaraŭ.

«Na siońnia zdymki vosieńskich i zimovych hulniaŭ «Što? Dzie? Kali?» nie admienienyja, a pieraniesienyja. My płanujem i chočam źniać kaniec siezona, a adbudziecca heta ci nie — užo budziem hladzieć, — kaža Aleś Muchin. — Nam pašancavała, što viasnovuju i letniuju sieryi my paśpieli źniać u sakaviku. Zdymki hulniaŭ «vosień-zima» byli ŭ płanach na žnivień i vierasień. Ale hetamu pieraškodzili niekalki pryčyn».

Muchin padrabiazna rastłumačyŭ usie niuansy:

«Častka znaŭcaŭ pracuje ŭ mižnarodnych kampanijach. I ciapier jany znachodziacca na dobraachvotna-prymusovaj samaizalacyi, to-bok, pracadaŭca płacić im hrošy z umovaj siadzieć doma i pracavać z doma. U nas jość cełaja takaja kamanda moładzi, naprykład. I kali ich pracadaŭcy pabačać, što pa budniach rabotniki siadziać doma, a na vychodnych źbirajucca ŭ studyi, jakaja zapoŭnienaja ludźmi… Mahli b być pytańni.

Častka znaŭcaŭ znachodzicca za miažoj. I heta ciapier pačali latać samaloty z toj ža Rasii, jeździć aŭtobusy, a raniej u hulcoŭ uvohule amal nie było šancaŭ trapić u Biełaruś. Da taho ž, kali b jany ŭsio ž pryjechali, to ich puścili b siudy jak hramadzian Biełarusi, ale jany nie mahli b viarnucca ŭ Rasiju. Heta druhaja častka prablemy.

Treciaja častka ŭ tym, što niekatoryja členy kłuba sapraŭdy ličać, što siońnia nie toj čas, kab vychodzić na palityzavanym telekanale. Pytańnie było nie kankretna da ANT, razmova išła pra toje, što siońnia situacyja ŭ krainie vielmi palityzavanaja, i zdymacca na kanałach, u jakich palityčny składnik asnoŭny, nie chaciełasia b. Voś jak ludzi farmulavali».

Pa słovach Muchina, kankretna da niejkaha kanała ni ŭ kaho pretenzij nie było.

«Na tym ža ANT my zdymalisia 12 hadoŭ i bačyli ad kanała tolki dobraje, — padkreślivaje Aleś Muchin. — U biełaruskaha prajekta «Što? Dzie? Kali?» da kanała ANT pytańniaŭ niama, jość pytańni ŭ častki členaŭ kłuba. Heta nie ŭvieś kłub. Hulcy zapaŭniali ankiety, u jakich ukazvali, ci buduć jany zdymacca i pry jakich umovach. I ja dakładna mahu skazać, što na toj momant pieršaja častka znaŭcaŭ skazała, što nie moža pryjechać praz karanavirus, druhaja — što nie moža źjaŭlacca ŭ publičnaj prastory, bo buduć prablemy z pracadaŭcami, a treciaja — što nie moža zdymacca, bo nie choča asacyjavacca z palityčnymi zajavami.

Ale jość i častka členaŭ kłuba, jakija hatovyja hulać u lubych situacyjach, choć u žniŭni, choć u vieraśni. Im i kavid nie strašny, i našyja sacyjalna-palityčnyja pytańni nie pieraškadžajuć, bo ludzi vielmi lubiać pieradaču i chočuć, kab jana vychodziła. My ž nie prosta dajom piensijanieram zarablać hrošy, a jašče i niasiom niejkaje śviatło viedaŭ, pakazvajem, što ŭ Biełarusi jość ludzi ź intelektam. Prynamsi ja svajo zadačaj baču mienavita hetaje».

Muchin adznačaje: pryčynaj pieranosu zdymak stała adrazu ŭsio vyšejzhadanaje.

Navat kolkasna ŭ svaich adkazach, čamu zaraz varta ci nie varta zdymacca, ludzi padzialalisia prykładna adnolkava na hetyja čatyry častki, kaža jon.

«Tak, niekatoryja znaŭcy prasili: davajcie znojdziem niejki čysta zabaŭlalny kanał. My abmiarkoŭvali heta, — nie admaŭlaje Aleś Muchin. — Ale na siońnia ŭ Biełarusi niama rejtynhavych zabaŭlalnych kanałaŭ, jakija b mieli dastatkovy biudžet dla zdymak našaj pieradačy. «Što? Dzie? Kali?» zaŭsiody była najbolš składanaj pieradačaj u techničnym płanie na našym telebačańni, bo treba pabudavać studyju, u jakoj na kvadratny mietr najbolšaja kolkaść mikrafonaŭ, stoł z padśvietkaj, lustra, jakaja padymajecca…

Pavialičyć

Dy i apierataraŭ treba vieźci ŭ Maskvu, vučyć, jak zdymać, bo «Što? Dzie? Kali?» — usio ž śpiecyfičnaja prahrama… Usie hetyja techničnyja i technałahičnyja niuansy vylivajucca ŭ dastatkova kruhłuju sumu pry abstalavańni novaj studyi. I tut, akramia dobraj voli luboha kanała, patrabujucca jašče i vialikija finansavyja vydatki. Na žal, heta na siońnia niemahčyma.

I da taho ž, pakul my heta abmiarkoŭvali, pajšła i druhaja chvala karanavirusa. Tamu zdymki ŭ lubym vypadku byli b pieraniesienyja, što i adbyłosia».

Akramia taho, pieradača «Što? Dzie? Kali?» pryncypova znachodzicca pa-za palitykaj, adznačaje Muchin.

«Heta toje, što dziasiacihodździami kažuć u Maskvie, i toje, što vy bačycie ŭ našaj viersii pieradačy. Akramia lubovi da radzimy, nijakich inšych sacyjalna-palityčnych aśpiektaŭ my nikoli nie prapahandujem.

Kali byli b tolki sacyjalna-palityčnyja pryčyny, to, moža b, my i zdymali b hulni, ale prosta biez častki kłuba… Ale kali ŭsie vyšej ahučanyja pryčyny razam — to jak tady rabić pieradaču?

Dy i ŭsio ž my kłub, heta vielmi važna. U Maskvie, moža, trochi inšy padychod, ale ŭ Biełarusi heta sapraŭdy niejkaja supołka ludziej, i našaja bieskampramisnaść prajaŭlajecca tolki na zapisie žyvych efiraŭ, kali ja «mučaju» znaŭcaŭ. U inšych ža momantach my starajemsia znachodzić kampramisy», — kaža Aleś Muchin.

U vyniku, kali kankretna projduć zdymki — skazać pakul ciažka.

«Jašče ž i častka biełarusaŭ — ja sam, naprykład, — zdymajecca ŭ rasijskim «Što? Dzie? Kali?». I treba, kab zdymki biełaruskaj pieradačy nie nakłalisia na zdymki ŭ Maskvie, bo inakš ci to naša pieradača zastaniecca bieź niekatorych hulcoŭ, ci to rasijskaja, — tłumačyć Aleś Muchin. — Ciapier my nie paśpieli adźniać našyja hulni da pačatku zdymak u Maskvie. Reziervnyja daty dla zdymak biełaruskaj pieradačy byli ŭ śniežni, ale ciapier i maja kamanda, i kamanda Alony Povyšavaj udzielničajem u rasijskich hulniach. Tamu, na žal, my fizična nie zmožam zdymać biełaruskuju pieradaču ŭ śniežni.

Adpaviedna, zdymki dakładna pieranosiacca na 2021 hod».

• 0
• 0
• 0
• 0
• 0
• 0
• 0
• 0