Cichanoŭskaja ŭ Viciebsku. Na sustreču sabralisia 8000 čałaviek VIDEA
Kandydat u prezidenty Śviatłana Cichanoŭskaja praciahvaje jeździć pa krainie i vystupać na mitynhach. Paśla fienamienalnych sustreč z vybarščykami ŭ Hłybokim i Navapołacku abjadnany štab alternatyŭnaha kandydata dabraŭsia da Viciebska. I ŭ abłasnym centry ŭ park, dzie ŭłady dazvolili sustreču, pryjšli tysiačy ludziej. Karespandent «Našaj Nivy» acaniŭ kolkaść prysutnych u 8 tysiač. Takoha mitynhu ŭ Viciebsku jašče nie byvała ŭ najnoŭšaj historyi.
Čytajcie taksama: Emacyjny mitynh z udziełam Cichanoŭskaj u Viciebsku FOTAREPARTAŽ
Viadučy pačaŭ svoj vystup pa-biełarusku, ale paźniej pierajšoŭ na ruskuju movu.
«Vierym, možam, pieramožam!» — padbadziorvaje viadučy ludziej.
U Viciebsku atmaśfiera, padobnaja da mitynhaŭ u papiarednich haradach: ludziej šmat, jość nacyjanalnaja simvolika. Vystupajuć muzykanty na razahrevie.
Viadučy sa sceny prosić ludziej karystacca mabilnym telefonam pa-minimumu, bo mabilnaja suviaź u rajonie mitynhu pracuje ź pierabojami.
Ruskamoŭnaja «Stieny ruchnut» hučyć z dynamikaŭ.
U 19:30 Cichanoŭskaja, Kaleśnikava i Capkała vyjšli na scenu.
«Śvieta, Śvieta», — amal užo firmiennaje pryvitańnie hučyć i ŭ Viciebsku.
Cichanoŭskuju ašałamiła kolkaść ludziej, jakija pryjšli jaje padtrymać. Jana spytała ŭ zadnich radoŭ: «Vy mianie dobra čujecie?»
Jana pačała svaju pramovu z raskazam pra svajho muža, Siarhieja Cichanoŭskaha.
U paraŭnańni z papiarednimi vystupami, Cichanoŭskaja ŭžo bolš impravizuje i idzie na kantakt z hramadzianami. «Vierym, možam, pieramožam», — zavodzić kandydatka natoŭp.
Cichanoŭskaja źviarnuła ŭvahu na ciažkaje stanovišča palitviaźniaŭ.
«Svabodu, svabodu», — kryčać ludzi.
Cichanoŭskaja kaža pra važnaść abjadnańnia apazicyjnych štaboŭ, kab možna było pravieści sumlennyja vybary ŭ budučyni, dzie los Biełarusi vyrašać jaje hramadzianie.
Cichanoŭskaja šmat razoŭ paŭtaraje, što jana nie palityk i što ŭ jaje nikoli nie było takich płanaŭ.
Ludzi aśvistali proźvišča Łukašenki, kali Cichanoŭskaja vymaviła jaho. Ad ludziej tam-siam hučać łozunhi «Stop tarakan!»
«Žyvie Biełaruś» — patryjatyčnyja łozunhi taksama łunajuć u pavietry.
Paśla słova ŭziała Maryja Kaleśnikava. Jana nahadała žycharam Viciebska pra Viktara Babaryku, jaki viarnuŭ na radzimu karciny Marka Šahała — znakamitaha ŭradženca Viciebska.
«Vierym, možam, pieramožam» — pieraryvaje natoŭp vystup Kaleśnikavaj.
«Nie bojciesia, nas bolšaść», — padbadziorvaje Kaleśnikava ludziej i zaklikaje pryjści na vybary mienavita 9 žniŭnia.
Dalej na scenu vyjšła Vieranika Capkała.
«Ja baču tut BČB-ściah, baču tut ściahi partyj, pra jaki padzieł kažuć ułady? My adzinyja», — kaža Capkała.
«Vy kali-niebudź čuli pra Majdan ad Babaryki, Capkały, Cichanoŭskaha? Nie! Pra Majdan kazaŭ tolki ciapierašni kiraŭnik dziaržavy», — kaža Capkała.
Capkała taksama zaklikała prychodzić na vybary mienavita 9 žniŭnia, a taksama pahavaryć sa svaimi svajakami.
Pradstaŭnik abjadnanaha štaba znoŭ zaklikała nasić hramadzian biełyja branzalety.
«Lubim, možam, pieramožam», — u takoj interpretacyi hučyć papularny apazicyjny łozunh ad viadučaha. Ludzi achvotna jaho padchoplivajuć.
Paśla vystupu Vieraniki Capkała viadučy raspavioŭ pra inicyjatyvy «Sumlennych ludziej», u tym liku pra prajekt «Hołas».
Vystupiła taksama Volha Kavalkova. Jana była adzinaj, chto vystupaŭ vyklučna pa-biełarusku. Kavalkova zaklikała Łukašenku pakinuć prezidenckuju pasadu, addać uładu «mudrym, intelihientnym žančynam».
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu3
Kamientary