Były apieratyŭnik kryminalnaha vyšuku: Kali b milicyjaniera ŭdaryli, jon by ci adrazu ŭskočyŭ, ci pryniaŭ abarončuju pozu
Vynikam pravakacyi na pikiecie ŭ Hrodnie stała zatrymańnie błohiera Siarhieja Cichanoŭskaha i šerahu jaho paplečnikaŭ. Ciapier jany pieraviedzieny ŭ Minsk, zaviedziena kryminalnaja sprava.
Hramadstva ŭsprymaje situacyju jak sprobu sfabrykavać realny termin dla papularnaha palityčnaha błohiera, jaki kinuŭ vyklik Łukašenku.
Čytajcie. Pravaabaroncy: Cichanoŭski — palityčny źniavoleny
Žurnalist «Našaj Nivy» Arciom Harbacevič u svaim telehram-kanale zapytaŭ siłavikoŭ, što jany dumajuć pra zatrymańnie Cichanoŭskaha.
Siłaviki, jakija praciahvajuć słužyć, pakul nie vykazvajucca publična. Pad svaim imiem havorać ludzi, jakija vyjšli ŭ adstaŭku.
Svaju acenku padziei daŭ były apieratyŭnik kryminalnaha vyšuku Viačasłaŭ Radomski.
U sistemie MUS jon pracavaŭ z 1999 pa 2008 hod, častku hetaha pieryjadu — u kryminalnym vyšuku Baranavičaŭ.
Radomski kaža, što pakul jašče nie moža vydavać usie detali svajoj bijahrafii ŭ orhanach.
«Vidavočna, što situacyja z zatrymańniem była padrychtavanaj akcyjaj: pravakatary doŭha chadzili za Cichanoŭskim i sprabavali arhanizavać kanflikt, kryčali i chapali jaho za vopratku.
Što jon rabiŭ? Sychodziŭ i padkreślivaŭ, što havaryć ź imi nie choča, na što žančyny-pravakatarki paskardzilisia supracoŭnikam milicyi.
«Čałaviek nie adkazvaje na maje pytańni!», — i milicyjaniery biahuć pa Siarhieja, chapajuć jaho za ruki.
Heta całkam fantastyčnaja reakcyja milicyjaniera na admovu čałavieka adkazvać na pytańni — pasprabujcie źviarnucca z takim da inšaha supracoŭnika, jakoha vy sustreniecie na vulicy.
Dalej, kali navat ujavić, što niečyja pravy parušanyja i jość vinavaty: jak učastkovy tak chutka zrazumieŭ, što Cichanoŭski — heta mienavita toj, na kaho skardzicca hramadzianka, što metava kinuŭsia da jaho, minajučy natoŭp?
Kali pačałasia vałtuźnia, vidać, što Cichanoŭski nie čapaŭ milicyjanieraŭ, a prosta sychodziŭ u bok, paźbiahajučy sutyknieńnia.
Hetak ža dobra na videa bačna, jak dva čałavieki (u zialonaj kurtcy i čornaj) akuratna układvajuć milicyjaniera na ziamlu.
Što robić milicyjanier? Prosta lažyć i navat nie sprabuje padniacca!
Psichałahičny bok: kali b jaho pierad hetym udaryli, to jon, ležačy na ziamli, pasprabavaŭ by ci adrazu ŭskočyć, ci pryniać abarončuju pozu, prykryć žyćciova važnyja orhany.
Hetamu ŭsiamu vučać supracoŭnikaŭ.
A fizijałahična mnie taksama całkam zrazumieła, što paśla mocnaha prapuščanaha ŭdaru ŭ žyvot — nam ža raskazvajuć pra brušnuju ścienku! — u čałavieka jość dźvie pozy: jon nie moža razahnucca i abo staić na kaleniach, abo skručany na baku.
A tut hety ŭčastkovy spakojna lažyć, paziruje na kamieru. Napeŭna, tamu što jon viedaŭ i viedaje, što nichto jaho nie biŭ i bić nie budzie, jamu nie balić.
A dalej imhnienna źjaŭlajecca AMAP, imhnienna źjaŭlajecca chutkaja dapamoha, a zatrymanych razvoziać pa roznych adździaleńniach — heta na 100% spłanavanaja pravakacyja, na jakuju Siarhiej Cichanoŭski nie pavioŭsia, tamu daviałosia lapić niejkuju niedarečnaść z taho, što jość.
Kab reziumavać biezdakazalnaść abvinavačvańnia, nie treba navat być apieratyŭnym supracoŭnikam, tut usio jasna i tak.
Tamu ja chacieŭ by nahadać ludziam, jakija takim zajmajucca: chłopcy, pamiatajcie, Łukašenka syjdzie, a vy zastaniaciesia».
Čytajcie taksama: Były śledčy pra zatrymańnie Cichanoŭskaha: Kalehi aburanyja tym, jak heta rabiłasia i chto byŭ zadziejničany
Čytajcie taksama: Kapitan MUS u adstaŭcy Aleh Mankus pra zatrymańnie Cichanoŭskaha: Soramna, što milicyja ŭlezła ŭ takuju śmiardziučuju spravu
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»5
Kamientary