«Z 1991 hoda naša kraina akupavanaja». U internet trapiła šakujučaje VIDEA sieminara dla biełaruskich ideołahaŭ
Lektar raskazvaje pra masonaŭ i pra toje, što zdarajecca ź dziaŭčatami, jakija ahalajuć žyvot. A taksama adpraŭlaje na sajt pra «hłabalny nadyŭdziejski predyktar».
Uvahu «Našaj Nivy» pryciahnuŭ vykładčyk Instytuta biznesu Biełaruskaha dziaržaŭnaha ŭniviersiteta Andrej Ivanoŭ — uletku jon atrymaŭ uchvalnuju hramatu ad «ministra moładzi DNR».
Kali my ščylniej zacikavilisia hetym čałaviekam, to vyjavili, što ŭ BDU jon nie pracuje ad vieraśnia 2017 hoda: pa słovach žonki, pierajšoŭ na rabotu ŭ dziaržaŭnaje tavarystva «Viedy», jakoje maje zadačaj «udzieł u ideałahičnaj rabocie dziaržaŭnych orhanaŭ».
Čytajcie: U tavarystvie «Viedy» adchryścilisia ad skandalnaha lektara Andreja Ivanova
Z samim Ivanovym my źviazacca nie zmahli, ale jahonaja žonka skazała, što muž ciapier čytaje lekcyi pa ideałohii dla rabotnikaŭ rajvykankamaŭ i abłvykankamaŭ.
Što za lekcyi moža čytać biełaruskim čynoŭnikam amatar «DNR»?
Pabačyć typovy ŭzor takoj lekcyi dla haradskich ideałahičnych rabotnikaŭ pradpryjemstvaŭ, ustanoŭ adukacyi i siłavych orhanaŭ možna na Jutubie. Sprava adbyvałasia ŭ Niaśvižy ŭ 2015 hodzie, ale, miarkujučy pa zapisach Ivanova ŭ sacyjalnych sietkach, jaho pohlady z taho času nie źmianilisia.
Paŭtarahadzinnaja pramova lektara nasyčanaja psieŭdahistaryčnymi bajkami, antynavukovymi śćvierdžańniami i miescami miažuje z ekstremizmam.
Pačynajecca sieminar dla ideołahaŭ z zajavy, što siońnia Biełaruś žyvie va ŭmovach vajny, «jakaja jašče bolš vyrodlivaja, čym taja, kali fašysty palili vioski».
Dyk chto ž z kim vajuje?
Śpikier spačatku syple biezasabovymi dziejasłovami nakštałt «hienacyd ažyćciaŭlajecca», «kantrol pravodzicca», ale ŭrešcie zryvaje maski, nazyvajučy vorahaŭ — heta ZŠA, Brytanija, inšyja krainy Jeŭropy. U paćviardžeńnie Ivanoŭ pierakładaje nadpis na dalaravaj kupiury z łatyni: «Suśvietny paradak nazaŭsiody».
«Jany sprabujuć utrymać hety paradak, ale nie mohuć! Nie viedajuć, što rabić: Isłamskuju dziaržavu stvaryli, narkatrafik z Afhanistana puścili praz našuju terytoryju, u Jeŭropie pastanovačnyja terakty, na Danbasie vajnu zapuścili. Ale nie atrymlivajecca», — adznačaje jon.
«My zaŭsiody byli razam — vialikaja kraina, potym nas padzialili i sprabujuć dakazać, što kožny sam za siabie. Nas tak pieradziaŭbuć, jak areški. Tamu siońnia pytańnie vielmi surjoznaje: dzie my bačym svaju budučyniu? Jaje my musim bačyć u histaryčnym minułym», — vučyć Ivanoŭ ideołahaŭ.
«Tyja, chto skončyŭ savieckija ŭniviersitety, atrymali mahutnuju mietadałahičnuju adukacyju, šyroki kruhahlad … i takuju kolkaść vobrazaŭ, što ŭ luboj śpiecyjalizacyi asvojvajecca vielmi chutka. A z zachodniaj Bałonskaj sistemaj — heta kali vy nazaŭsiody pryviazanyja da adnoj prafiesii — va ŭmovach rynku vami vielmi lohka manipulavać», — zapeŭnivaje jon. Ivanoŭ padkreślivaje, što «Rasija zaŭsiody davała adłup ahresaram, jakija nie mahli zrazumieć naš sakralny duch».
Pravobraz idealnaha hramadstva i ekanomiki, pavodle Ivanova, byŭ pabudavany pry Stalinie.
Hetym jaho viedańnie ekanomiki nie abmiažoŭvajecca — jon demanstruje jaho ideołaham na ŭzory z rovarami.
«Davajcie ŭjavim situacyju, — kaža jon. — U Niaśvižy staić kambinat, jaki nie moža vypuścić tuju kolkaść rovaraŭ, jakaja patrebna vam i vašym haściam — nu nie atrymlivajecca! Nie chapaje mahutnaści! Što budziem rabić? A davajcie nadrukujem biełaruskich rubloŭ — ja vam prapanuju — na ich kupim cemient u nas ža, u Kaściukovičach! U nas jość rabočyja ruki, jość ziamla pad Niaśvižam. I pabudujem novaje pradpryjemstva! Na svaje ž, nadrukavanyja hrošy! I vypuścim bolš rovaraŭ! Što z canoj adbudziecca? Jana ŭpadzie, pravilna! A nam ekanamisty sa stupieniami kažuć: «Nielha hrošy drukavać, tolki ŭ doŭh brać možna». A heta zaležnaść krainy ad źniešniaha emisijnaha centra, heta kałanijalizm! Navošta my heta robim? Kali hetyja iściny viedajuć maje školniki, maje studenty navat! Čamu my siońnia nie ŭkładvajem svaje ŭłasnyja rubli, ni ad kaho nie zaležačy?»
Adkaz na dylemu Ivanoŭ daje prazaičny: «Prablema ŭ tym, što my žyviem pa «Vašynhtonskim kansensusie». Paśla razvału Savieckaha sajuza i akupacyi postsavieckich krain byli prysłanyja siudy daradcy, jakija zaniali klučavyja pasady na dziaržaŭnaj słužbie, i jany siońnia adsočvajuć pracesy i spryjajuć tamu, kab patrebnyja zakony nie prymalisia. Karaciej, jość raźvityja krainy: ZŠA, Brytanija, inšyja krainy Jeŭropy, i jość «kałonii», jakija pavinny pytacca, ci možna im nadrukavać rubli. Im dazvolena brać kredyty, ale nie drukavać svaje hrošy — isnujuć takija schiemy nadździaržaŭnyja. I vy jak ideołahi siońnia pavinny ŭsio heta viedać i razumieć. Treba stvarać hramadskaje mierkavańnie, kab jano padkazvała našym hora-ekanamistam, kali jany nie viedajuć, što rabić».
Časam Ivanoŭ pieraryvaje svajo vykryćcio suśvietnaj zmovy dla infarmavańnia pra inšyja važnyja temy. Ad jaho ideołahi daviedalisia, što dziaŭčynie nielha ahalać žyvot — «narodziacca vyradki». «Kab adnavić svoj bijapalarny enierhaabmien paśla kielicha vina, treba intelektualna pracavać try hady», — tłumačyć Ivanoŭ. «Japonskija technałohii śpisanyja z savieckich časopisaŭ dla moładzi», — praciahvaje jon. «Jakija, nafih, u Jeŭropie kaštoŭnaści? Tam pusteča», — zadajecca rytaryčnym pytańniem lektar i padsumoŭvaje, što «z 1991 hoda kraina akupavanaja … Jany čakajuć, kali možna budzie nanieści vyrašalny ŭdar».
Ivanoŭ papiaredžvaje, što prysutnyja mužčyny pavinny być hatovyja nadzieć kamuflaž i ŭziać u ruki aŭtamaty.
Nie abychodzicca biez zhadak pra sijanizm i «Śviatuju Ruś», sakralnaje značeńnie ruskaj movy ŭ pabudovie ruskaj cyvilizacyi.
«Vy pavinny čytać hetyja lekcyi kožny dzień! Na tych pradpryjemstvach, jakija vam dastupny, va ŭsich sacyjalnych sietkach. Žonka mužu chaj čytaje», — źviartajecca jon da ideołahaŭ i abiacaje padkazać «sajty z knižkami, dzie možna pačytać bolš padrabiazna».
Asabliva iranična vyhladajuć vysnovy z vusnaŭ hetaha lektara:
«Čałaviek źniešnie zastajecca takim ža, ale infarmacyjny stan mianiajecca. Nahladzieŭsia ŭsialakich karcinak, jamu skazali, što tam — vorah, i jon pačynaje vieryć. Tak mianiajecca linija pavodzin cełaha naroda. A kali hadujecca cełaje pakaleńnie va ŭmovach nianaviści, to jašče pakaleńnie treba, kab heta źmianić. I vy ŭjaŭlajecie, na jakim uzroŭni ciapier prablemy ŭ našych jeŭrapiejskich susiedziaŭ? Kolki im pakaleńniaŭ treba?».
Paśla finalnaha słova i apošniaj rekłamy stanovicca jasna, čym natchniajecca Ivanoŭ — jon aktyŭna pijaryć rasijski ruch «KOB» i biełaruskaha «navukoŭca» Nikicienku.
Nikicienka fihuravaŭ u našym repartažy pra čarnasocienskuju kanfierencyju ŭ Minsku. Ale što takoje «KOB», jaki raić ideołaham Ivanoŭ?
«KOB» pierakładajecca jak «Kancepcyja hramadskaj biaśpieki». Prychilniki hetaj teoryi vierać u isnavańnie «hłabalnaha nadyŭdziejskaha predyktara», stvoranaha 3500 hod tamu 22 staražytnajehipieckimi «žracami-ijerafantami», jaki kiruje, u tym liku, i «Suśvietnym masonskim uradam».
Admietna, što šerah knih «KOBa» pryznanyja ŭ Rasii ekstremisckimi. Na sajcie, jaki Ivanoŭ raić pačytać ideołaham, možna znaści knihi z nazvami «Jaŭrejski fašyzm», «Staražytnajehipieckija karani suśvietnych biedaŭ», «Majstar i Marharyta: himn demanizmu».
Svaju datyčnaść da ruchu «KOB» Ivanoŭ nie chavaje i ŭsialak zhadvaje pra siabroŭstva ŭ hetaj siekcie ŭ svaich sacyjalnych sietkach.
Naradziŭsia i vyras Andrej Ivanoŭ u Sibiry ŭ siamji vajskoŭca.
* * *
Udakładniena: Paśla publikacyi artykuła na sajcie «Naša Niva» atrymała list ad imia Ministerstva adukacyi. U im vykazvajecca mierkavańnie, što ministr Ihar Karpienka padtrymlivaje niefarmalnyja suviazi ź ideołaham Andrej Ivanovym. Viedamstva tłumačyć, što zdymak byŭ zrobleny padčas pryjomu hramadzian.
Minadukacyi: U čytačoŭ «NN» moža skłaścisia pamyłkovaje ŭražańnie, što ministr Karpienka padtrymlivaje niefarmalnyja suviazi ź ideołaham Ivanovym
https://d3kcf2pe5t7rrb.cloudfront.net/?c=ar&i=203106
Andrej Dźmitryjeŭ źjeździŭ u Bundestah, kab davieści nieabchodnaść udziełu Łukašenki ŭ mirnych pieramovach11
Kamientary