Fota Radyjo Svaboda
«U Jeŭropie my apošnija, kamu treba rabić reformy, — zaznačyŭ Alaksandr Milinkievič. — Dobraje ŭ hetaj situacyi toje, što apošnija majuć šaniec paźbiehnuć pamyłak, zroblenych papiarednikami». Kab padrychtavać novuju elitu, nieabchodna adpaviednaja adukacyja. Kancepcyju novaj ustanovy — Volnaha Biełaruskaha Univiersiteta — Milinkievič pradstaviŭ na sustrečy z navukoŭcami ŭ Hrodnie 17 śniežnia, paviedamlaje hrodna.life
Dva napramki — Rasija i Zachad
Novy ŭniviersitet pavodle Milinkieviča — heta prahrama dystancyjnaha navučańnia, što dazvolić biełarusam atrymać jeŭrapiejskuju adukacyju i dypłomy, nie źjazdžajučy za miažu.
«Siońnia biełarusy pa akademičnaj aktyŭnaści na pieršym miescy ŭ rehijonie. Zaraz vučycca za miažoj 34 360 čałaviek. Bolšaść ź ich, kala 72%, u Rasii. Tyja biełarusy, što jeduć vučycca na Zachad, atrymaŭšy dypłomy, starajucca zastacca ŭ zamiežžy. Navat kali ŭ Biełarusi pryznajuć ich dypłomy, zarobak prapanujuć značna mienšy. Takim čynam, kadry «niby rychtujucca, ale tam i zastajucca».
Budavać buduć «źvierchu»
Univiersitet moža skłaści alternatyvu abodvum isnujučym napramkam navučańnia za miažoj. Najpierš tamu, što prapanuje dystancyjnaje navučańnie.
«Šyrakapałosny internet i optavałakno jość navat u vioskach. Pa tannaści interneta my na 7-m miescy ŭ śviecie. Heta taksama arhumienty na karyść prajekta. Ludzi mohuć zastavacca tut, sa svajoj siamjoj, praciahvać pracavać ci vučycca. Tak bolš šancaŭ, što atrymaŭšy viedy, nieabchodnyja dla refarmavańnia krainy, zastanucca tut».
Zaraz u prajekcie pracujuć biełaruskija i polskija navukoŭcy, dalej mahčyma pašyreńnie partniorstva ź inšymi jeŭrapiejskimi krainami. Budavać Volny Biełaruski ŭniviersitet pačynajuć «źvierchu». Pieršymi źjaviacca prahramy paśladypłomnaj adukacyi, paśla — mahistarskija i tolki potym bakałaŭrskija. Sprava ŭ jurydyčnych składanaściach pryznańnia dystancyjnaj adukacyi. Dla «ŭdaskanaleńnia viedaŭ» takich prablem niama.
Śpiecyjalnaści: kiravańnie, finansy, prava
Śpiecyjalnaści, što prapanuje Volny Biełaruski ŭniviersitet, buduć źviazanyja z publičnaj palitykaj, mieniedžmientam, administravańniem, finansami, pravam i ekanomikaj. Navučańnie budzie pravodzicca na biełaruskaj, anhlijskaj i polskaj movach. Dla kožnaha pradmieta buduć stvorany admysłovyja navučalnyja moduli ź interaktyŭnymi i hulniavymi mietadami navučańnia.
Hramadskimi kaardynatarami prajekta stali viadomyja ŭ śviecie biełarusy — Śviatłana Aleksijevič, Stanisłaŭ Šuškievič i Aleś Bialacki.
Kali ŭžo?
Pakul Volny Biełaruski Univiersitet — heta tolki hrupa ludziej, jakija jaho stvarajuć. Pryniać pieršych studentaŭ ustanova zmoža nie raniej čym praz dva hady.
Kamientary