Dziesiać krokaŭ, jak u ŚMI raskručvali asobu Koli Łukašenki

Adnoj z samych haračych temaŭ dla abmierkavańnia na hetych vychodnych była pajezdka Koli Łukašenki ŭ ciahniku Adler — Viciebsk. «Biez taty i mamy», jak udakładniła pres-sakratar kiraŭnika krainy Natalla Ejsmant. Usio heta ŭpisvajecca ŭ raniejšaju liniju pa pijary małodšaha syna Alaksandra Łukašenki. Z čaho pačynałasia heta historyja?

Nibyta vypadkovyja pieršyja zhadki

Pavialičyć

Upieršyniu pra isnavańnie treciaha syna ŭ Łukašenki publika daviedałasia ŭ 2007 hodzie. Padčas stasavańnia z žurnalistami biełaruski lidar nibyta mimachodź zaŭvažyŭ, što nie rychtuje svajho syna Viktara ŭ pierajemniki. «Budu rychtavać samaha maleńkaha — unikalny raście čałaviek», — nibyta ŭ žart skazaŭ Łukašenka.

Praz hod u intervju «Kamsamolskaj praŭdzie» jon adznačyŭ, što mama Koli «pracuje ŭračom». Heta nie sakret. Što tut chavać? Heta ž ad Hospada. Mnie jon, kaniečnie, nahruzki dadaje, što aproč mianie jaho nichto ni nakarmić, ni apranuć nie moža — tolki ja».

Pieršyja źjaŭleńni na publicy

U krasaviku 2008 Łukašenka ŭpieršyniu pakazaŭ svajho syna ŭ ŚMI. Razam ź im kiraŭnik krainy pryjechaŭ na subotnik na «Minsk-Arenu». 4-hadovy chłopčyk dapamahaŭ tatu ŭpraŭlacca ź bietonam.

Vialikaj akcyjaj pa pijary byŭ «spantanny» vychad Łukašenki na hulańni ŭ parku imia Horkaha ŭ toj samy hod. U supravadžańni Juryja Čyža i Michaiła Zacharava Alaksandr i Mikałaj Łukašenki prahulalisia siarod ludziej, častavali ludziej cukierkami, udzielničali ŭ konkursach, a taksama kupili knihu Karatkieviča «Lebiadziny skit».

Z hetaha času małodšy syn Łukašenki nie źnikaŭ z telekanałaŭ.

Sustreča z Papam Rymskim

Pavialičyć

U niadoŭhi pieryjad pamiž 2008-2010, kali Łukašenku pačali prymać u Jeŭropie, umiaściŭsia vizit u Rym i Vatykan. Da tahačasnaha Papy (Bieniedykta XVI) kiraŭnik Biełarusi pajšoŭ z małodšym synam. U kancy razmovy Kola Łukašenka padaryŭ pantyfiku bukvar.

«Małodšy syn — moj talisman, tamu ja jaho zaŭsiody biaru z saboj», — skazaŭ tady Łukašenka-starejšy.

U 2016-m Alaksandr i Mikałaj Łukašenki znoŭ apynulisia ŭ Vatykanie. Na hety raz ich prymaŭ novy Papa Francišak.

Pistalet ad Miadźviedzieva

Pavialičyć

Vučeńni «Zachad-2009» pačalisia z taho, što tahačasny prezident Rasii Dźmitryj Miadźviedzieŭ padaryŭ maleńkamu Kolu Łukašenku załaty pistalet.

Kiraŭnik Biełarusi razam z synam byli apranutyja ŭ vajskovuju formu z hierbam Biełarusi na pahonach.

«Pakul nie zaradzili, — śmiajaŭsia Łukašenka. — Dobry pistalet, bo jaho padaryŭ prezident Rasii».

Prymaŭ parad da Dnia Respubliki

Pavialičyć

Kola Łukašenka i raniej razam z baćkam prymaŭ udzieł u śviatočnych mierapryjemstvach da Dnia Pieramohi ci Dnia Respubliki. Adnak u 2011 hodzie ŭ hetym było niešta novieńkaje — małodšy syn byŭ apranuty ŭ takuju samuju vajskovuju formu, jak i Łukašenka-starejšy, jaki źjaŭlajecca hałoŭnakamandujučym biełaruskaj armii.

Paźniej Kola Łukašenka navat nie zaŭsiody prysutničaŭ na paradach. Časam u ŚMI heta padavałasia «jak sumiesnaje rašeńnie», a kali i byŭ, to amal nikoli ŭ vajskovaj formie.

Zdajecca, heta byŭ adzin z hałoŭnych pijar-prakołaŭ, bo ludzi nie nadta pazityŭna ŭspryniali małoje dzicia, jaki prymaje darosłyja vajskovyja parady.

Chakieist, jak i baćka

Padčas adpačynku ŭ Sočy 2013 hoda Mikałaj Łukašenka źjaviŭsia na chakiejnaj placoŭcy razam z baćkam. Admietna, što abodva vyjšli na lod u švedarach pad №1. Kamandzie prezidenta supraćstajała adna z najlepšych kamand rasijskaha horada.

Potym vyśvietliłasia, što chakiejnaje chobi pieradałasia Mikałaju ad baćki. Sioleta kamanda «Hryfony», za jakuju vystupaje Łukašenka-małodšy, stała pieramožcam spabornictvaŭ «Załataja šajba» siarod dziaciej 2004-2005 hadoŭ naradžeńnia. U vyrašalnaj hulni, jakuju «Hryfony» vyjhrali ź likam 8:2, Mikałaj Łukašenka zakinuŭ usie 8 šajb.

Usie hetyja «podźvihi» chłopčyka aktyŭna aśviatlalisia dziaržaŭnymi ŚMI.

Sustrečy z suśvietnymi lidarami

Pavialičyć

Šmat šumu narabiŭ fotazdymak, jak 10-hadovy Kola Łukašenka razam ź ministram zamiežnych spravaŭ Uładzimiram Makiejem siadziać na pasiedžańni Hienieralnaj asamblei AAN pad šyldačkaj Belarus. Potym jon razam z baćkam navat zrabiŭ zdymak z prezidentam ZŠA Barakam Abamam i jahonaj žonkaj.

Prysutnaść Koli na samych vysokich pieramovach užo nikoha nie dzivić. Naprykład, sioleta jon padaryŭ kufarok žoncy staršyni KNR Si Czińpinia.

Kola źjaŭlaŭsia ŭ kampanii Uładzimira Pucina, Hiejdara Alijeva, Nursułtana Nazarbajeva, Michaiła Saakašvili, Uha Čavesa i mnohich inšych palityčnych lidaraŭ.

Dapamoha vieteranam

Pavialičyć

U 2015 hodzie dziaržaŭnyja telekanały trubili pra niečuvany ŭradžaj kavunoŭ i dyniaŭ, jaki vyras u Drazdach. Publikavalisia zdymki, na jakich Alaksandr i Mikałaj Łukašenka ŭ supravadžeńni biznesoŭcaŭ i spartsmienaŭ źbirali ŭradžaj.

Litaralna praz paru dzion Mikałaj Łukašenka sumiesna z tenisnym trenieram i siabram Łukašenki Siarhiejem Ciacierynam, a taksama pres-sakratarkaj Natallaj Ejsmant zavieźli hetyja kavuny ŭ internat dla piensijanieraŭ i invalidaŭ. Rasčulenyja piensijaniery navat całavali hetyja bachčavyja, jakija atrymlivali z ruk Koli.

Sioleta ŭ studzieni vučni Astrašycka-Haradockaj škoły pakazvali piensijanieram z Doma-internata teatralnaje pradstaŭleńnie na matyŭ multfilma «Madahaskar», a taksama častavali małočnaj pradukcyjaj z Drazdoŭ.

«My hatavali z ułasnaha małaka tvaroh, śmiatanu. Kali spadabajecca, to pryviaziem jašče abaviazkova», — kazaŭ Kola stałym ludziam. Varta adznačyć, što baćki ź im u toj momant nie było.

Intervju dla rasijskaha kanała

Pavialičyć

Taksama naprykancy minułaha hoda Mikałaj Łukašenka daŭ pieršaje samastojnaje intervju. Z synam prezidenta pahutaryŭ 11-hadovy žurnalist z Dalokaha Uschoda Ženia Hryšyn.

Kola skazaŭ, što nie vielmi choča być prezidentam, jaho bolš vabić karjera ŭrača ci vajskoŭca. U filmie Łukašenka-małodšy hraje na fartepijana, hulaje ŭ chakiej, kormić koniej, raskazvaje pra svaje padarožžy pa ŭsim śviecie.

Film byŭ pakazany 25 śniežnia — u Rastvo. I padavaŭsia jak kaladny padarunak dla rasijskaha chłopčyka, jakomu Kola padaryŭ prafiesijny dyktafon.

Kambajn i ciahnik

Pavialičyć

Na hety momant apošnim punktam pijaru Mikałaja Łukašenki stała žnivo ŭ Škłoŭskim rajonie, dzie syn kiraŭnika krainy nibyta samastojna sieŭ na styrno kambajna i namałaciŭ až 5 ton. Heta ŭsio adbyvałasia ŭ rodnych miaścinach Łukašenki. Faktyčna jon vykazvaŭsia, što heta jahonaje rodnaje pole.

Na nastupny dzień u redakcyju «Kamsamolskaj praŭdy» pryjšoŭ zdymak nibyta ad zvyčajnaha pasažyra. Na im chłopčyk, padobny da Koli, samastojna jedzie na bakavušcy ŭ płackartnym ciahniku Adler — Viciebsk.

Pres-słužba Łukašenki paćvierdziła, što na zdymku sapraŭdy Mikałaj. Voś tak małodšy syn prezidenta pieraŭtvarajecca z chłopčyka, jakoha trymaje za ruku baćka, u samastojnaha žychara miedyjaprastory.

• 0
• 0
• 0
• 0
• 0
• 0