9 červienia ŭ Viarchoŭnym sudzie ŭ Minsku prajšło papiaredniaje dasudovaje pasiadžeńnie pa spravie «Anton Matolka suprać BT». Błohier choča atrymać kampiensacyju za svaje fotazdymki, jakija BT vykarystała biez dazvołu.
Sudździa spytaŭ u @Motolko čym jon moža dakazać, što jon viadomy ŭ mastactvie i fotaasiarodździ. Toj adkazvaje: piersona hoda ŭ "Našaj Nivie"!
Anton Matolka ahučyŭ svaje pretenzii da Biełdziaržteleradyjokampanii.
«Vykarystoŭvańniem maich zdymkaŭ adkazčyk nanios mnie značnyja maralnyja pakuty», — začytaŭ Matolka i sam paśmichnuŭsia.
Dalej było viesialej. Sud jašče budzie vyrašać, ci źjaŭlajucca zdymki Matolki «praduktam tvorčaści».
Anton Matolka nastojvaŭ, što zdymki patrabavali ŭsich jaho viedaŭ i navykaŭ.
«Heta była spantannaja zdymka?» — pacikaviŭsia sudździa.
Matolka paviedamiŭ, što nie. Pa jaho słovach, jon padrabiazna «vyvučaŭ internet, resursy z nadvorjem», kab zrazumieć, što źziańnie ŭsio ž adbudziecca.
— A ŭ čym vyraziłasia maralnaja škoda? Fizičnyja pakuty? — pacikaviŭsia sudździa.
— Fizičnyja — nie. Maralnyja — tak.
— U čym jany vyjaŭlalisia?
— Ja byŭ abražany. Ja byŭ nastolki ŭschvalavany, što niekalki načej drenna spaŭ.
Adkazčyk vystaviŭ mianie na paśmiešyšča i nanios škodu majoj reputacyi, u tym liku i jak prafiesijanała. Da taho ž ja byŭ vymušany šmat času patracić na pošuk infarmacyi pa dadzienym pytańni, što šturchnuła mianie ŭ stan jašče bolšaha stresu.
Mnie było niepryjemna, što maje zdymki vykarystoŭvalisia ŭ siužecie pad nazvaj «Źzianie ŭ kolerach nacyjanalnaha ściaha». Jak hramadzianin Respubliki Biełaruś, ja liču, što nacyjanalny ściah Biełarusi — bieł-čyrvona-bieły.
Ale čamuści była pryviazka da dziaržaŭnaha ściaha, i maje fotazdymki vykarystali ŭ tym liku i dla prapahandy dziaržaŭnaj simvoliki.
— Heta naniesła vam maralnuju škodu?
— Tak, bo mnohija ludzi viedajuć, jakuju simvoliku ja padtrymlivaju, jany telefanavali mnie i pisali: jak tak?.
— Heta značyć, asacyjacyja vašych fatahrafij z kolerami dziaržŭnaha ściaha pryčynili vam maralnyja pakuty?
— Usio dakładna, — adkazaŭ Matolka.
— A ŭ pašparcie vašym taksama jość dziaržaŭnaja simvolika. Vy im karystajeciesia, vas heta nie kryŭdzić?
— Nie, pašpart ža nie źjaŭlajecca praduktam majoj tvorčaści, — patłumačyŭ błohier.
Sudździa pacikaviŭsia, u čym vyjaviłasia naniesienaja škoda reputacyi Matolki jak fatohrafa.
— Ź mianie žartavali i śmiajalisia jak z fatohrafa, jaki pradastaŭlaje zdymki Biełteleradyjokampanii, — paviedamiŭ toj.
Paśla Matolka zajaviŭ, što choča zamianić sumu kampiensacyi. Ciapier jon zachacieŭ adsudzić u BT adzin biełaruski rubl.
«Ja źmianiŭ sumu kampiensacyi, bo pytańnie zarabić hrošaj nie staić. Ja chacieŭ pakazać, što nielha kraści fotazdymki. Ja chaču, kab teleradyjokampanija pryznała svaju vinu. Bo padobnyja situacyi z maimi fota byli i raniej, ale pytańni zaŭsiody vyrašalisia biez suda – ŚMI vybačalisia ci apłočvali zdymki. Kab paźbiehnuć suda BT dastatkova było paprasić u mianie prabačeńnia. Jany nie zachacieli.
I ŭvohule, navat kali ja prajhraju, ja liču, što sam pa sabie hety praces – heta budzie pieramoha», — paviedamiŭ «Našaj Nivie» Anton Matolka.
Pradstaŭnik telebačańnia da zakančeńnia pasiadžeńnia byŭ łakaničny. «Hałoŭnym kamientaram budzie rašeńnie suda. Ja kamientavać nie budu», — paviedamiŭ «Našaj Nivie» Andrej Žylinski, načalnik adździeła pravavoj i analityčnaj pracy jurydyčnaha ŭpraŭleńnia Biełdziaržteleradyjokampanii.
Praŭda, u svaim vystupie jon padkreśliŭ, što Dziaržteleradyjokampanija — arhanizacyja nie kamiercyjnaja, tamu patrabavać ź ich hrošy za vykarystoŭvańnie zdymkaŭ u kamiercyjnych metach nielha. Da taho ž Žylinski nastojvaje, što zdymki ŭziali z sajta Matolki, kali tam nie było nadpisu ab tym, što fota nielha vykarystoŭvać. Va ŭsiakim vypadku, pad kožnym zdymkam takoje nie było napisana. A aŭtarstva Matolki nie paznačyli, bo spačatku nie viedali. Potym nibyta daviedalisia i paznačyli.
Uvohule, na dumku pradstaŭnika BT, hałoŭnaje — jak maha chutčej dać siužet u efir, kab «apieratyŭna infarmavać nasielnictva». A potym užo vyrašać prablemy z zakanadaŭstvam, kali jany raptam uźniknuć.
Što ž da maralnych pakutaŭ, to Žylinski i ŭ ich admaŭlaje Antonu Matolku. Kolery dziaržaŭnaha ściaha i ŭsio, što ź imi źviazana, na dumku pradstaŭnika BT, nie mohuć vyklikać maralnyja pakuty.
***
Nahadajem, što jašče ŭ sakaviku 2015 hoda minski fatohraf i błohier Anton Matolka pabačyŭ svaje zdymki paŭnočnaha źziańnia ŭ Biełarusi ŭ navinach na kanale «Biełaruś-1». Aŭtarstva Matolki nie paznačyli, dazvołu ŭziać fotazdymki ŭ jaho taksama nichto nie prasiŭ.
Spačatku błohier źviarnuŭsia ŭ Biełteleradyjokampaniju. Jamu adkazali listom za podpisam staršyni Hienadzia Davydźki. Paviedamlałasia, što supracoŭniki BT znajšli zdymki ŭ internecie ŭ adkrytym dostupie.
Paśla hetaha Anton Matolka pajšoŭ u sud.
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary