Darja Kastenka: U śmierci Ułada Kaleśnikava vinavataja rasijskaja «Komsomolskaja pravda»
U Rasii 18-hadovy Uład Kaleśnikaŭ na dniach pakončyŭ z saboj, bo jaho ckavali i pieraśledavali za praŭkrainskuju pazicyju. Kaleśnikaŭ vioŭ staronki ŭ internecie, dzie rezka krytykavaŭ rasijskuju realnaść i nastroi ŭ hramadstvie.
Chłopiec byŭ ranimy i ŭraźlivy, jak mnohija padletki. Jaho baćki byli ŭ razvodzie i mała zajmalisia synam, addali na vychavańnie babie ź dziedam. A dzied-puciniec, imavierna, były KHBist, staŭ chłopca łamać. Dajšoŭ da «Komsomolskaj pravdy», kab raskazać pra toje, jaki ŭnuk kiepski. Heta nahadvała sproby adchryścicca ad svajakoŭ, «vorahaŭ naroda», u stalinski čas.
U vyniku «Komsomołka» apublikavała artykuł, u jakim prymityŭna vyśmiejvała Ułada — jahony vyhlad, vahu, fakty bijahrafii, śćviardžała, što Uład byŭ «pradmietam kpinaŭ jak chłopcaŭ, tak i dziaŭčatak». Vybrała dla ilustracyi samyja niepryvabnyja fotazdymki.
«Pikantnyja padrabiaznaści, tak, hnidy?! — piša na adras žurnalistaŭ «Komsomołki» ŭ svaim fejsbuku biełaruska, zorka telekłuba «Što? Dzie? Kali?» Darja Kastenka. — Viedajučy, što havorka idzie pra niepaŭnaletniaha, «Kamsamołka» publikuje sapraŭdnaje proźvišča Ułada, nazyvaje horad, dzie jon žyvie, i navučalnuju ŭstanovu. A kab adnakurśniki jašče i viedali abjekt hanieńnia ŭ tvar, publikuje jaho fota. Fota padletka, 17-hadovaha chłopčyka. U internecie padobnym čynam dziejničajuć tolki troli, olhinskaja biazmozhaja batva pa tryccać tysiač za pučok».
Hanicieli Ułada, žurnalisty rasijskich ŚMI i internet-boty, vykarystoŭvali typovyja pryjomy rasijskich śpiecsłužbaŭ: jany raspaŭsiudžvali čutki pra toje, što staŭ siektantam, što ŭ jaho homaseksualnyja schilnaści.
«Darosły daśviedčany čałaviek, napeŭna, spraviŭsia b z takoj situacyjaj. Ale na žal, junaha chłapčuka jana moža ranić da śmierci».
«Artykuł — poŭny hamon, pračytajcie, kali nie baiciesia zapeckać vočy. Aŭtara zvać Alaksandr Hryšyn», — adznačaje Kastenka.
«Jak vy dumajecie, Alaksandr Hryšyn adčuŭ choć kroplu viny? — pytajecca Kastenka. — Nie. Bolš za toje. Jon u svaim tvitary i fejsbuku zadavolena, z pačućciem vykananaha abaviazku napisaŭ: «Ja pra jaho pisaŭ letam, Sprabujučy niejak ŭździejničać. Ale ŭsio daremna».
«Sam saboju jon byŭ niecikavy: nabor zvyčajnych štampaŭ i stereatypaŭ + umieńnie ich dosyć składna kampilavać — voś i ŭsia prahrama», — piša pra Kaleśnikava «Komsomołka» ŭ cyničnym paśmiarotnym artykule.
«Z «Kamsamołkaj» i tolki z «Kamsamołkaj» pahadziŭsia pahavaryć pra ŭnuka toj samy dzied, jakoha ciapier u fejsbuku, sacsietkach i niekatorych ŚMI klajmiać prychilniki Ułada i sam unučok, što znachodzicca na ŭtrymańni baćki», — pisała hazieta ŭ tym svaim pieršym artykule.
«U Hryšyna vinavatyja va ŭsim libierały. I ŭkraincy. I amierykancy». Jon praciahvaje ablivać chłopca brudam — navat miortvaha, adznačaje Kastenka.
«Kab być žurnalistam «Komsomolskaj pravdy», nie abaviazkova być razumnym abo talenavitym. Hałoŭnaje — nie mieć nijakich začatkaŭ maralnaści», — rezka padsumoŭvaje Kastenka.
Vialikaja hutarka z Alinaj Koŭšyk — pra intervju z Padsasonnym, skandał z Kulejem i reformy na «Biełsacie»15
Kamientary