Ukraina adznačaje druhija ŭhodki Jeŭramajdanu: karotkaja chronika padziej
21 listapada va Ukrainie adznačajuć Dzień svabody i hodnaści i druhuju hadavinu pačatku Jeŭramajdanu.
pravda.com.ua
21 listapada 2013 hoda ŭpieršyniu kala tysiačy kijaŭlan vyjšli na Majdan Niezaležnaści, pratestujučy suprać rašeńnia tahačasnaha ŭrada Mikałaja Azarava i prezidenta Viktara Janukoviča adkłaści padpisańnie pahadnieńnia ab asacyjacyi ź Jeŭrapiejskim sajuzam.
Užo ŭ noč na 30 listapada adbylisia žorstkija sutyknieńni demanstrantaŭ, pieravažna studentaŭ, z pravaachoŭnikami. Hetyja padziei vyvieli na vulicy sotni tysiač ludziej.
8 śniežnia adbyŭsia Marš miljona, padčas jakoha apazicyja dała Viktaru Janukoviču 48 hadzin na vykanańnie patrabavańniaŭ Majdana, paabiacaŭšy błakavać jaho rezidencyju «Miežyhorje».
Tady ž pavalili pomnik Leninu na Biesarabskaj płoščy ŭ Kijevie, aktyvisty budavali barykady, kab błakavać uradavyja budynki.
Adnak śpiecpadraździaleńni milicyi razburyli ich, a ŭ noč z 10 na 11 śniežnia sprabavali razahnać jeŭramajdan. Na praciahu nočy kolkaść pratestoŭcaŭ uzrasła, milicyja nie advažyłasia na bolš žorstki šturm.
Ale dalejšyja padziei raźvivalisia vielmi dramatyčna, asabliva paśla taho, jak kantralavanaja tahačasnaj uładaj Viarchoŭnaja Rada 16 studzienia 2014 pryniała pakiet zakonaŭ, jakija, na dumku apazicyi i pravaabaroncaŭ, istotna abmiažoŭvali hramadzianskija pravy.
Mienavita hetyja zakony stali katalizataram žorstkaha supraćstajańnia z uładaj.
Aktyvisty Jeŭramajdanu źviarnulisia da šturmu administracyjnych budynkaŭ, supraćstajańnia śpiecpadraździaleńniam milicyi. Tyja, u svaju čarhu, ŭžyli da demanstrantaŭ vadamioty i inšyja śpiecsrodki. Mitynhoŭcy taksama źviarnulisia da radykalnych dziejańniaŭ — zapalvali aŭtašyny, kab dym i smurod nie dazvalaŭ śpiecnazaŭcam prasunucca ŭhłyb Majdana Niezaležnaści.
22 studzienia 2014 hoda padčas supraćstajańnia na vulicy Hrušeŭskaha byli zabityja ahniastrelnaj zbrojaj Siarhiej Nihajan, armianin pa pachodžańni, i biełarus Michaił Žyźnieŭski. Pamierli ad traŭmaŭ Raman Sienik i Alaksandr Bader.
Jeŭramajdan praciahvalisia pa ŭsioj Ukrainie. Praciŭniki ŭłady zachoplivali administracyjnyja budynki, źbirali mitynhi.
Trahičnymi byli padziei 18-20 lutaha, kali śpiecpadraździaleńni milicyi ŭžyli ahniastrelnuju zbroju. Usiaho było zabita bolš za 100 aktyvistaŭ jeŭramajdanu, tysiačy — traŭmavanyja. Padčas sutyknieńniaŭ, pa dadzienych MUS, zahinuli taksama 19 milicyjantaŭ.
20 lutaha Viarchoŭnaja Rada pryniała pastanovu, jakoj pryznała niezakonnymi dziejańni siłavikoŭ, zabaraniła vykarystańnie zbroi suprać mitynhoŭcaŭ.
21 lutaha lidary apazicyi padpisali pahadnieńnie ź Viktaram Janukovičam ab urehulavańni kryzisu va Ukrainie, ale ŭ hety ž dzień uviečary hramadskija aktyvisty Majdana asudzili lubyja damoŭlenaści z prezidentam i papiaredzili ab šturmie jaho administracyi.
Viktar Janukovič tajemna pakinuŭ Kijeŭ, i, jak vyśvietliłasia, praz Krym, moram, dabraŭsia da Rasii. Paśla jon apublikavaŭ videazvarot, u jakim nazvaŭ padziei va Ukrainie «dziaržaŭnym pieravarotam».
Viktar Janukovič da hetaha času nazyvaje siabie lehitymnym prezidentam Ukrainy.
Novaja ŭłada, niahledziačy na abiacańni, nie zmahła rasśledavać złačynstvy suprać Jeŭramajdanu i davieści spravu ab zakazčykach i vykanaŭcach masavych zabojstvaŭ na Majdanie ŭ sud.
U Hienieralnaj prakuratury pryznajuć, što za vialikaj kolkaści achviar i paciarpiełych rasśledavańnie moža raściahnucca na hady.
Va Ukrainie zahinuła 24-hadovaja biełaruskaja dobraachvotnica Maryja Zajcava20
Kamientary