Lidar paŭstancaŭ zajaviŭ, što Siryja nie ŭjaŭlaje pahrozy dla śvietu, i paprasiŭ źniać z krainy sankcyi

Al-Šaraa ŭznačaliŭ vokamhnienny nastup, u vyniku jakoha mienš za dva tydni tamu byŭ skinuty režym Bašara Asada. Jon źjaŭlajecca lidaram hrupoŭki «Chajat Tachryr aš-Šam» (CHTŠ), jakaja daminuje ŭ paŭstanckim aljansie, i raniej byŭ viadomy pad svaim bajavym psieŭdanimam Abu Muchamied al-Džułani.

Jon skazaŭ, što CHTŠ treba vyklučyć sa śpisu terarystyčnych arhanizacyj. U hety śpis hrupoŭku ŭnieśli AAN, ZŠA, ES, Vialikabrytanija, Rasija i mnohija inšyja krainy — CHTŠ pačynała svaju dziejnaść, adkałoŭšysia ad «Al-Kaidy» (taksama pryznana terarystyčnaj i zabaroniena) u 2016 hodzie.

Achmied al-Šaraa skazaŭ, što «Chajat Tachryr aš-Šam» nie źjaŭlajecca terarystyčnaj hrupoŭkaj.

Jany nie napadali na mirnych žycharoŭ ci hramadzianskija rajony, skazaŭ jon. Nasamreč, jany ličać siabie achviarami złačynstvaŭ režymu Asada. A z achviarami, pavodle słoŭ lidara paŭstancaŭ, nielha abychodzicca hetak ža, jak z ahresarami.

Al-Šaraa abviarhaje padazreńni, što jon choča pieratvaryć Siryju ŭ padabienstva Afhanistana.

Jon skazaŭ, što hetyja krainy vielmi roznyja, z roznymi tradycyjami. Afhanistan — heta plemiannoje hramadstva. U Siryi, pavodle jaho słoŭ, inšy mientalitet. U pryvatnaści, al-Šaraa skazaŭ, što vieryć u nieabchodnaść adukacyi dla žančyn.

«U nas u Idlibie ŭniviersitety pracujuć bolš za vosiem hadoŭ. Ja dumaju, dola žančyn u hetych univiersitetach — bolš za 60%», — skazaŭ al-Šaraa.

Na pytańnie, ci budzie ŭ Siryi dazvoleny ałkahol, jon adkazaŭ: «Jość šmat rečaŭ, pra jakija ja prosta nie maju prava kazać, tamu što heta — jurydyčnyja pytańni».

Al-Šaraa dadaŭ, što ŭ Siryi budzie stvorany kamitet z pravaznaŭcaŭ, jaki składzie novuju kanstytucyju: «Vyrašać buduć jany. I luby kiraŭnik abo prezident pavinien budzie vykonvać zakon».

Na praciahu ŭsiaho intervju apranuty ŭ cyvilnaje adzieńnie lidar paŭstancaŭ vyhladaŭ rassłablenym i staraŭsia supakoić tych, chto ličyć, što jaho hrupoŭka nie parvała sa svaim ekstremisckim minułym.

Mnohija siryjcy jamu nie vierać.

Dziejańni novych kiraŭnikoŭ Siryi ŭ bližejšyja niekalki miesiacaŭ pakažuć, jakoj krainaj jany chočuć bačyć Siryju i jak chočuć joju kiravać.

• 2
• 0
• 0
• 1
• 0
• 0
• 0
• 0