Biełaruś heta prajekt Aŭstra-Vienhryi, a kanstytucyju nam pisali ZŠA — jak bačyć śviet «Nacyjanalna-vyzvalenčy ruch»

Pradstaŭniki prarasijskaha «Nacyjanalna-vyzvalenčaha ruchu» ŭ Biełarusi raskazali «Našaj Nivie» pra svoj śvietapohlad. Na pytańni adkazvali Uładzimir Ryžankoŭ, kaardynatar ruchu, i Julija Čyrva, jaho pres-sakratarka. Cytaty padajucca biez kupiur.

«My nidzie nie zarehistravanyja. Usio robicca na hramadskich pačatkach, pa-vałanciorsku. U Rasii nas 260 tysiač čałaviek. U Biełarusi my tolki pačynajem. Aktyŭnych zusim mała.

My abapirajemsia na pravasłaŭje. Heta asnoŭnaja relihija ruskaj cyvilizacyi, Ruskaha śvietu. Ale hałoŭnaje, kab čałaviek pryznavaŭ, što ŭ 1991 hodzie adbyŭsia pieravarot, i pryznavaŭ kałanijalny status našaj dziaržavy.

Kanstytucyju nam uvohule napisali ZŠA, Ju-Es-Ejd, ja ich tak nazyvaju — amierykanskaje piekła. Heta majo vynachodnictva.

Na siońniašni dzień usie postsavieckija krainy — kałonii ZŠA. Jelcyna pasadzili na pasadu amierykancy, jak i Harbačova. Ale Pucin užo samastojny hulec. Toje, što jon uznačaliŭ krainu, — ruski cud.

U Biełarusi my padtrymlivajem Łukašenku. Jaho abraŭ narod. Dziakujučy jaho ŭłasnaj inicyjatyvie i ručnomu kiravańniu atrymałasia zachavać vytvorčaść, biaśpieku, stabilnaść, historyju, pamiać pra Vialikuju Ajčynnuju vajnu.

Hłabalny fond baraćby ź VIČ 5 hadoŭ raspaŭsiudžvaje mietadon. JUNISEF prasoŭvaje seks-aśvietu, razbeščvańnie niepaŭnaletnich, kali ŭ dziciačych sadkach dziaciej navučajuć rukabłudździu, usiakim vyčvarenstvam. Pad vyhladam baraćby ŭ AAN pryniali prahramu, kali dzieciam z troch hadoŭ abaviazkova vučycca seksualnym vyčvarenstvam!

«Antymajdan» — butaforyja, jakaja nie stavić pierad saboj kankretnyja mety.

80% čynoŭnikaŭ u Rasii pracujuć na Zachad. U prezidenta RF pravoŭ našmat mienš, čym było ŭ staršyni Prezidyuma ŭ SSSR. Realnaj ułady ŭ Pucina niama.

A Miadźviedzieŭ byŭ kampramisnaj fihuraj pamiž prapucnskimi siłami i amierykancami. Heta nie da kanca pucinski prajekt.

Nam rekamiendavali dałučycca da BRSM. Ale ich paradak dnia z našym trochu nie supadaje. I da ich piataja kałona taksama pranikła, zabarona hieorhijeŭskaj stužki — voś prykład.

Beerseemaŭcy — absalutna naiŭnyja ludzi, jany nie razumiejuć, što adbyvajecca. U Minadukacyi acharaktaryzavali BRSM tak: heta vialikija dzieci.

My nie budziem dałučacca da Rasii, bo my adna dziaržava. Prosta hetaja dziaržava stanie inšaj, kali nie budzie piataj kałony.

Biblija Skaryny była na ruskaj! Jon sam pisaŭ: «ja — ruski»! Vy historyju viedajecie? Ukraina i Biełaruś — heta prajekt Aŭstra-Vienhryi, nakiravany na supraćstajańnie Rasii. Štučna stvaryli nacyjanalizm, štučna stvaryli movu.

Raźviedka MI-6 i bankiry arhanizavali Kastryčnickuju revalucyju. I heta cud, što źjaviŭsia patryjot — Stalin, jaki admianiŭ aborty i zładziŭ čystku piataj kałony.

Navat zapryhońvańnie sialan pačałosia paśla taho, jak Piotr I pryvioz zachodniuju kulturu. Da hetaha jano było niemahčymym.

Niamcova zabili amierykancy, kab zładzić «aranžavy pieravarot». I ŚMI pastajanna pra heta kazali, kab ludzi vyjšli na vulicy, ale ludziej nie chapiła.

Vaš redaktar nie prapuścić ni słova z taho, što my zaraz kažam».

* * *

Nacyjanalna-vyzvalenčy ruch (Nacionalno-osvoboditielnoje dvižienije)

hramadski «patryjatyčny» ruch, jaki ŭźnik u 2011 hodzie ŭ Rasii. Uznačalvaje jaho Jaŭhienij Fiodaraŭ, deputat Dziaržaŭnaj dumy, Fiederalnaha schodu RF čatyroch sklikańniaŭ, staršynia kamiteta pa ekanamičnaj palitycy i pradprymalnictvie Dziaržaŭnaj dumy, člen Centralnaj palitrady «Adzinaj Rasiei», kandydat ekanamičnych navuk. «Prasłaviŭsia» Fiodaraŭ paśla svajoj zajavy ab tym, što viadomamu muzyku Viktaru Coju pisali teksty piesień u CRU.

Nacyjanalna-vyzvalenčy ruch vystupaje za «Ruski śviet» i tradycyjnyja kaštoŭnaści. Udzielniki ruchu vierać, što SSSR byŭ razvaleny ahresiŭnym Zachadam, jaki ŭvieś čas tak ci inakš supraćstaić «mirnaj słavianskaj cyvilizacyi». Taksama ruch padtrymlivaje sieparatystaŭ Danbasa.

• 0
• 0
• 0
• 0
• 0
• 0