Palituciakač Panamaroŭ pamiryŭsia z najmalnikam, chaty jakoha spaliŭ
«Naša Niva» źviazałasia z palituciekačom z Klecka Siarhiejem Panamarovym. Čatyry hady nazad jon vyjechaŭ u Polšču: adjezd patłumačyŭ pahrozaj žyćciu za svaju hramadskuju dziejnaść. A ŭ 2012 trapiŭ tam u skandał, paśla jakoha apynuŭsia ŭ turmie.
«Na svabodu ja vyjšaŭ jašče 13 lutaha 2014. Byŭ za kratami 5 miesiacaŭ. Pieršyja dźvie nočy paśla vyzvaleńnia pravioŭ na vulicy. A zatym biełarus Kirył Siemiančuk dapamoh. Ciapier dva miesiacy biez pracy siadžu — zima. A ŭ sakaviku, dumaju, uładkujusia», — raskazaŭ Siarhiej Panamaroŭ.
13 vieraśnia 2012 Panamaroŭ padpaliŭ dva damki, jakija naležali inšamu biełaruskamu ŭciekaču Dźmitryju Surbie. Kanflikt byŭ bytavy: najmalnik nie zapłaciŭ najmitu za pracu.
«Surba paklikaŭ mianie stvarać turystyčny centr na Mazurskich aziorach: ja zarablaŭ 10 złotych za hadzinu (kala 3 dalaraŭ), a jon abiacaŭ 15. A kali pryjechali na Mazury, pasialiŭ mianie ŭ draŭlanym kiempinhu, dzie nie było nijakich umoŭ: mycca chadziŭ za paŭkiłamietra da voziera. Pracavaŭ pa 14—15 hadzin. Vypłatu zarobkaŭ zatrymlivaŭ. Dva palaki, jakich taksama naniali, kinuli pracu. Pastavić paśpieli my dva damki. Za ŭvieś čas ja atrymaŭ tolki 500 złotych».
A paśla Surba pryvioz jašče biełarusaŭ, jakich pasialiŭ u hateli. Tut Panamaroŭ nie vytrymaŭ i rašyŭsia na padpał.
«Ja jamu skazaŭ, što spalu tyja damki, kali jon sa mnoj nie raźličycca. Jon vinien mnie byŭ 6500 złotych, a ŭ mianie ŭ kišeni było ŭsiaho 8 złotych. Apoŭnačy ja padpaliŭ damy. Try hadziny čakaŭ, kab dobra razharełasia, i vyklikaŭ palicyju. Pryjechali pažarnyja, ale tušyć užo nie było čaho. Kažu: «Zabirajcie mianie ŭ palicyju — spać chaču». Ja padpaliŭ — inšaha vyjścia nie było».
«15 studzienia 2014 byŭ sud. Ja paprasiŭ, kab pratrymali ŭ turmie chacia b da 13 sakavika — nie było kudy iści, dzie žyć. Ale vypuścili na miesiac raniej. Patłumačyli, što kali pasadziać na paŭhoda, budu tady mieć sudzimaść. A tak nie maju. Tamu nie ŭźnikła i pytańnie z departacyjaj».
Panamaroŭ kaža, što ciapier da Surby pretenzij nie maje. A toj nie budzie spahaniać ź jaho 80 tysiač złotych, u jakija acanili spalenyja damki.
U Biełaruś viartacca ŭciakač nie źbirajecca. «U mianie «karta pobytu» i ženieŭski pašpart biežanca», — kaža Panamaroŭ. Sioleta jon budzie padavać dakumienty na pastajannaje miesca žycharstva. A tady praz dva hady dumaje i pra polskaje hramadzianstva.
U turmie ŭciakač napisaŭ knihu, u jakoj apisaŭ svajo žyćcio na fonie padziej, praź jakija prajšoŭ.
Siarhiej Panamaroŭ naradziŭsia ŭ 1951 hodzie ŭ Sibiry. Za savieckim časam dvojčy sudzimy, u tym liku za zabojstva. U 1989 pierajechaŭ u Biełaruś. Pasialiŭsia ŭ Klecku, dzie vydavaŭ biuleteń «Bojki Kleck». Za publikacyi ŭ hetym samvydacie ź im sudzilisia miascovyja čynoŭniki. U 2010 paprasiŭ palityčny prytułak u Polščy.
-
U Rečycy pad palityčny pieraśled trapiŭ adzin z samych pavažanych u horadzie daktaroŭ
-
«Dzimka? Dyk jaki jon špijon? Heta prosta śmiešna». Znajomyja pamierłaha ŭ kałonii Dźmitryja Šlethaŭera raskazali pra jaho i jaho siamju
-
Źjaviłasia infarmacyja pra zatrymańni na BIEŁAZie. Pravaabaroncy źviazvajuć ich z kpinami ź firmovych botaŭ
Amierykanka raskazała, jak vykładała va ŭniviersitecie ŭ Viciebsku i navat dała paru ŭrokaŭ milicyi4
Kamientary