Miedyki zaniepakojeny rostam zachvorvańnia na dyrafilaryjoz

U Biełarusi nazirajecca rost zachvorvańnia na dyrafilaryjoz, paviedamiła namieśnik hałoŭnaha ŭrača Respublikanskaha centra hihijeny, epidemijałohii i hramadskaha zdaroŭja Ludmiła Narojčyk 31 kastryčnika ŭ Minsku na mižnarodnaj navukova-praktyčnaj kanfierencyi «Sučasnyja prablemy infiekcyjnaj patałohii čałavieka».

Dyrafilaryjoz — zachvorvańnie, jakoje vyklikaje parazitavańnie kruhłych čarviakoŭ rodu Dirofilaria ŭ arhaniźmie čałavieka. Ličynki dyrafilaryj traplajuć u arhanizm praz ukusy kamaroŭ, a ich pieranosčykami źjaŭlajucca damašnija i dzikija žyvioły.

«Zhodna z ekśpiertnymi acenkami, da 40% badziažnych žyvioł zaražany pałavaśpiełymi dyrafilaryjami, a ŭkusy nasielnictva kamarami naohuł nie paddajucca ŭliku», — adznačyła Najročyk. Pavodle jaje słoŭ, prahnoz pa raspaŭsiudžvańni dyrafilaryjozu ŭ Biełarusi «daloka nie spryjalny».

Śpiecyjalist padkreśliła, što arhanizacyi achovy zdaroŭja nie vałodajuć ni mietadami rańniaj dyjahnostyki dyrafilaryjozu, ni mietadami jaho lačeńnia. «Vyrašeńnie hetych prablem dla praktyčnaj achovy zdaroŭja mahło by adyhrać vielmi važnuju rolu», — adznačyła Narojčyk.

Jak patłumačyła žurnalistam zahadčyca kafiedry epidemijałohii Lvoŭskaha nacyjanalnaha miedycynskaha ŭniviersiteta imia Daniły Halickaha Natalla Vinahrad, pry infikavańni čałavieka važna miesca praniknieńnia dyrafilaryja ŭ arhanizm i jaho mihracyja, bo ŭsie hielminty ŭ ciele ruchajucca viertykalna ŭvierch.

Pavodle słoŭ Vinahrad, najbolšuju niebiaśpieku ŭjaŭlajuć ukusy ŭ vierchniuju častku cieła čałavieka — tvar, šyju, plečy, jakija składajuć kala 70% usich zaražeńniaŭ, bo hielmint moža praniknuć u vočy abo mozh i vyklikać u hetych orhanach niezvarotnyja nastupstvy.

Śpiecyjalist paviedamiła, što simptomam zachvorvańnia moža stać mihryrujučaja puchlina pad skuraj. U toj ža čas, adznačyła Vinahrad, kali pacyjent źviartajecca z hetaj prablemaj da ŭrača, «jaho mohuć adpravić navat da psichijatra».

Pavodle jaje słoŭ, u dyjahnostycy zachvorvańnia «vielmi važnaja naściarožanaść nasielnictva i daktaroŭ», bo lačeńnie dyrafilaryjozu «banalnaje», kali hielmint nie łakalizavany ŭ ciažkadastupnym miescy — u vačach abo mozhu. «Časta chirurhi prosta biaruć skalpiel, razrazajuć i vymajuć hielmint», — skazała Vinahrad.

«Heta nie vielmi raspaŭsiudžanaje zachvorvańnie ŭ paraŭnańni ŭ inšymi hrupami hielmintozaŭ», — adznačyła ŭkrainski śpiecyjalist. Adnak, pavodle jaje słoŭ, z-za poźniaj dyjahnostyki dyrafilaryjoz moža pryvodzić da latalnych zychodaŭ.

• 0
• 0
• 0
• 0
• 0
• 0