Jeŭrabačańnie: Łanskaja trapiła ŭ finał - anłajn

Takim čynam u finał trapili: Małdova, Litva, Irłandyja, Estonija, Biełaruś, Danija, Rasija, Bielhija, Ukraina i Niderłandy. Ča-ča-ča Łanskoj nie ŭražvała vakałam i vymaŭleńniem, ale brała seksualnaściu. Kali b hałasavali nie za pieśniu, a za nohi, Łanskaja była b adnaznačna pieršaj. Nu i sukienka, ale ž. Na jaje sukiency 70 tysiač strazaŭ Svaroŭski. Kali ŭziać vahu adnoj ź ich dy chacia b u paŭhrama, to Alenie nie pazajzdrościš. «Kaštuje sukienka 25 tysiač jeŭra. Apošnija dva hady Biełaruś u finał nie traplała, tamu heta pośpiech užo. Pavodle bukmiekieraŭ, šancaŭ na pieramohu ŭ Łanskoj niašmat: 100 da 1.

* * *

U Malmio pačynajecca pieršy paŭfinał «Jeŭrabačańnia» — «Naša Niva» prapanuje razam pahladzieć i abmierkavać konkurs pop-pieśni, jaki ŭ Jeŭropie zastajecca prostaj zabaŭkaj, a ŭ nas pieraŭtvarajecca ŭ padzieju nacyjanalnaj važnaści. Da taho ž mienavita siońnia na konkursie vystupić Alena Łanskaja, na jakuju bukmiekiery staviać 100 da 1 i čyj klip nabraŭ na YouTube dva miljony prahladaŭ.

Režysura cyrymonii adkryćcia była prosta vydatnaj. Pieśniu «Ejforyja» letašniaj pieramožcy Łaryn śpiavali dzieci. Śpiavaŭ chłopčyk, a razam ź im — 168 dziaciej z parušeńniami słychu vykonvali jaje na mihi. Heta było ŭzrušalna.

Letaś Azierbajdžan ubuchaŭ u «Jeŭrabačańnie» miljony naftadalaraŭ, a sioleta Šviecyja zładziła ŭsio ścipła, ale ź jakoj sardečnaściu! Upeŭnieny, što mnohija ludzi nie mahli strymać śloz pry vyhladzie hetkaj «Ejforyi». Pry kancy pieśni da choru dałučyłasia sama Łaryn, a ŭ zale zaharełasia tysiačy ahieńčykaŭ — heta zaśviacilisia braślety na zapiaściach hledačoŭ. Zapalvajucca hetyja ahieńčyki z režysiorskaha pulta.

Hołas Łaryn niekalki razoŭ drohnuŭ ad pračułaści momantu. Pry kancy pieśni jana spuściłasia ŭ zału i źnikła siarod hledačoŭ. A na scenie źjaviłasia šviedskaja žančyna-komik, jakaja viadzie sioletniaje «Jeŭrabačańnie».

Aŭstryja.

Natalla Kieli — Shine

I pieršaj, paśla cyrymonii adkryćcia (adnoj z samych jaskravych za apošnija hady), vystupaje Natalla Kieli z Aŭstryi: pieśniu Shine pisali adrazu čatyry čałavieki, u vyniku atrymałasia pop-muzyka kanca nulavych. Prypieŭ zapaminalny — nie horš čym u bukmiekierskaj favarytki z Danii. Šoŭ Kieli jaskravym nie nazavieš, adnak na Zachadzie zaraz uvohule zaŭvažnaja tendencyja da spraščeńnia vizualnaha šerahu.

Estonija. Birhit Yjhiemieel — Et uus saaks alguse

Estonka Birhit Yjhiemieel śpiavaje na rodnaj movie, što robić zvyčajnuju pierasałodžanuju baładu ź vialikaj kolkaściu kłaviš admietnaj. Kali b było pa-anhlijsku, hučała b horš. Sama Birhit — vypusknica estonskaha anałaha «Fabryki zorak», jakaja časam udzielničaje ŭ pastanoŭkach pjes Šekśpira. Na scenie jana hladzicca bolš upeŭniena, čym u klipie.

Słavienija

Chana Mančyni — Straight into Love

Voś jana! Pieršaja za siońnia pieśnia sa Słovam «Kachańnie» ŭ naźvie i bieśśmiarotnym radkom Here comes the night. Amierykanka z Paŭnočnaj Kalifornii Chana Mančyni ŭžo nie pieršy hod pražyvaje ŭ radyjoefiry Słavienii. Darečy, tendencyi sučasnaj pop-muzyki jana, a taksama tyja piać čałaviek, jakija pisali dla jaje pieśniu, adčuvajuć. Ale pytańnie, što tut pisać ažno piaci aŭtaram, zastajecca adkrytym.

Charvatyja

Klapa s Mora — Mizerja

Charvatyja sioleta padstaŭlena hurtom z šaści vakalistaŭ — basy, barytony, tenary. Usio heta hučyć pryhoža, a biez elektronnych bubnaŭ było b jašče lepš. Pretendavać na pieramohu tut nie davodzicca, dyj hurt i bieź Jeŭrabačańnia vyhladaje samadastatkova. Žanr «Kłapa» heta tradycyjnaja muzyka charvataŭ, pryznanaja suśvietna značnaj kulturnaj spadčynaj. Za apošnija niekalki hadoŭ skłałasia ŭražańnie, što Charvatyja nie stolki imkniecca pieramahčy na Jeŭrabačańni, kolki pakazać svaju nacyjanalnuju kulturu. A heta, darečy, vartaja ideja. A ŭ vypadku «Kłapy z mora» jašče i vielmi pryhožaja.

Danija

Emili de Forest — Only Teardrops

A voś i favarytka, viadomaja tym, što adnojčy skazała, što jaje praprababula — karaleva Viktoryja. Nie viedajem, ci heta joj niejak dapamahło, ale nastolki typovaj dla Jeŭrabačańnia pieśni siońnia jašče nie hučała. Tym nie mienš, niekatoryja bukmiekierskija kantory robiać na jaje staŭku adzin da adnaho. Paśla prasłuchoŭvańnia pieśni cikava nie stolki toje, u čym ža tut cudoŭny patencyjał, kolki jašče raz spytacca, što charvacki chor i jamu padobnyja šukajuć na hetym konkursie? Pra Viktoryju, darečy, niapraŭda.

Rasija

Dzina Harypava — What If

Hołas u Dziny Harypavaj vybitny, dy i charyźmie šmat chto moh by pazajzdrościć. A voś ź pieśniaj vyjšła pramaška — pa-pieršaje, jana padobna na inšyja dźvie pieśni, pa-druhoje, jak trapna zaŭvažyli ahladalniki Gazeta.ru, nadta ŭžo pieśnia ŭ jaje kasmapalityčnaja. Usio ž taki pieśni pra «mir va ŭsim śviecie» i tamu padobnaje redka byvajuć hienijalnymi. Ź inšaha boku, mahło ž być pra kachańnie. A tut jašče nieviadoma što horš. Vystupiła Dzina ŭpeŭniena, ale, paŭtarusia — radki pra «kali b my zakapali zbroju» hučać na Jeŭrabačańni niedarečna.

Ukraina

Złata Ahnievič — Gravity

Złata Ahnievič va Ukrainie ŭžo niekalki hod jak viadomaja śpiavačka — pabyvała tvaram šerahu rekłamnych kampanij, zapisała ź dziasiatak pieśniaŭ, siarod jakich navat himn «Arteka». Bukmiekiery abiacajuć joj srebra pa vynikach Jeŭrabačańnia. Pra pieśniu dadatkova skazać, što takija treki zvyčajna i stanoviacca pieramožcami Jeŭrabačańnia — pop ź miełodyjaj i dobrym vakałam.

Niderłandy

Anuk — Birds

Skažam ščyra, šansaŭ u Anuk mała — jana bolej nahadvaje toj typ śpiavačak, jakija nie honiacca za pieramohami na konkursach. Tym nie mienš jana zapisała ŭžo dziesiać albomaŭ, tembr jaje hołasa nie ŭkładajecca ŭ radyjostandart. Taja samaja situacyja, što i z Charvatyjaj — artystam takoha kštałtu Jeŭrabačańnie nie pasuje. Anuk nahadvaje brytanskuju femme fatale Maryjanu Fejtfuł i, mahčyma, z časam stanie śpiavačkaj z takim samym aŭtarytetam.

Čarnahoryja

Who See i Nina Žyžyč — Igranka

Čarnahoryja sioleta vyrašyła ździvić Jeŭrabačańnie repierami ŭ skafandrach, ale kab u metavaj aŭdytoryi nie zdaryłasia nadta mocnaha šoku, da repieraŭ dałučyli pop-śpiavačku Ninu Žyžyč. U vyniku — pieśnia, jakaja budzie absalutna adekvatna hladziecca na kanałach kštałtu «Jeŭropa Plus», dzie joj samaje miesca. A za kulisami ŭžo rychtujecca Alena Łanskaja.

Litva.

Andrus Pajavis — Something

Litoviec Andrus Pajavis vystupaje z typovaj pop-pieśniaj, natchnionnaj hurtami, nazvy jakich pačynajucca na The i skančvajucca na «s». Raniej heta nazyvałasia indzi, ale ciapier časy źmianilisia. Ale bukmiekiery nie bačać u Pavisa patencyjała dla pieramohi. I praŭda, moda na takuju muzyku skončyłasia jašče hadoŭ piać tamu.

Biełaruś

Alena Łanskaja — Solayoh

I voś hałoŭnaja padzieja siońniašniaha paŭfinała — Alena Łanskaja pryjechała ŭ Malmio ź niadrennaj pieśniaj.

«Pieśnia Alony pra dalokuju płanietu Salea, dzie niama šerych budniaŭ i adzinokich ludziej», — prezientuje biełaruski kamientatar. Jon adznačaje, što Łanskaja karystajecca papularnaściu ŭ žurnalistaŭ, «i ad fanataŭ niama adboju». Ukrainskija kamientatary adznačajuć, što ŭ minułym hodzie Łanskuju adchilili ad konkursa praz masavyja pratesty ŭ presie.

Peŭny drajv u joj jość. A jašče na jaje sukiency 70 tysiač strazaŭ Svaroŭski. Kali ŭziać vahu adnoj ź ich dy chacia b u paŭhrama, to Alenie nie pazajzdrościš. «Kaštuje sukienka 25 tysiač jeŭra, Biełaruś bahataja kraina» — žartujuć ukrainskija kamientatary. Šansy trapić u finał jość, adnak nie dalej.

Małdova

Alona Mun — O mie

Druhi vypadak za pieršy paŭfinał, kali nieanhlijskaja mova ratuje pieśniu, jakaja b zabyłasia praz 30 siekund jaje hučańnia, kali b vykonvałasia pa-anhlijsku. Kali zabaranić udzielnikam Jeŭrabačańnia śpiavać bałady pad rajal, to konkurs moh by stać našmat cikaviejšym.

Irłandyja

Rajan Dałan — Only Love Survives

A heta dla tych, chto zasumavaŭ pa słovie «kachańnie» u naźvie pieśni. Irłandcy dobra ŭchapili tendencyju napisańnia radyjo-pop-pieśni, jakoj zahadvajuć ich susiedzi anhličanie. U vyniku składajecca ŭražańnie, što hetuju pieśniu my ŭžo dzieści čuli. Pryčym nie raz. Chacia, mahčyma, u hetym i jość pop-muzyčnaja praŭda. Vystupoŭcaŭ ź Irłandyi biełaruski kamientatar nazvaŭ «irłandskimi niaškami», ukraincy ž paličyli jaho samym pierśpiektyŭnym śpievakom Irłandyi. I dzie praŭda?

Kipr

Deśpina Alimpiŭ — An Me Thimase

A voś jašče adna śpiavačka, čyja karjera skłałasia bieź Jeŭrabačańnia — u dyskahrafii Deśpiny ŭžo vosiem albomaŭ, častkova zapisanych u ZŠA i Kanadzie. Naŭrad ci takaja pieśnia dabiarecca da finała Jeŭrabačańnia, adnak usialakaje moža zdarycca. Prynamsi, čym jana horš za pieśniu z Danii, viedajuć tolki bukmiekiery, jakija staviać jaje na apošniaje mieca ŭ rejtynhu.

Bielhija

Rabierta Biełaroza — Love Kills

«Kachańnie zabivaje» — paviedamlaje nam śpiavak Rabierta Biełaroza, pieśnia jakoha pryjšła pryblizna z tych samych časoŭ, što i pieśnia Aleny Łanskoj. Mocny akcent vykanaŭca i słabaje hučańnie pieśni padkazvaje, što ŭ finale my ŭžo nie ŭbačymsia. Chacia tut usialakaje byvaje. Varta zaŭvažyć, što ciapier jaho vystup vyhladaje lepš, čym u proma-viersii. Ale stavić na jaho hrošy ja b nie raiŭ.

Sierbija

Moje 3 — Ljubav je svuda

Sierbski hurt Moje 3 stvorany ŭ 2013 hodzie, chiba akurat dla konkursa. Skład: adna bialavaja, adna čarniavaja, a treciaja prosta rudaja. Pa takim pryncypie hurty stvarajucca pa ŭsim śviecie, ad ZŠA da hurtu Viktara Kaliny. Nazva pieśni pierakładajecca jak «Kachańnie paŭsiul». Kamientary zališnija. Darečy, ruduju da paŭfinała padfarbavali ŭ bolš ciomny koler, ale pieśniu heta nie vyratuje.

Takim čynam pieršy paŭfinał skončyŭsia. Čakajem vynikaŭ. Jak niechta mudra zaŭvažyŭ, paśla siońniašniaha chakieja adna nadzieja na Łanskuju.

Apytanka

• 0
• 0
• 0
• 0
• 0
• 0