5 žniŭnia viadomy palitolah Andrej Suzdalcaŭ na svaim sajcie www.politoboz.com zrabiŭ nastupny dopis: «Pavažanyja siabry, kalehi, naviedvalniki sajtu. Ciažkaja chvaroba vyryvaje mianie, ja spadziajusia, što tolki na niejki čas, z Vašych šerahaŭ. Kolki dzion ci tydniaŭ zojmie hetaja baraćba — nieviadoma… Asablivaje pryvitańnie maim niedruham i voraham. Dla ich heta dobraja navina…»

Ad hetaha času nijakich novych viestak pra stan zdaroŭja sp.Suzdalcava nie było. Źjaviłasia versija, što palitolah moh być atručany, adnak nijakaj jasnaści nie było. Kab źniać uźnikłyja pytańni, my vyrašyli patelefanavać niepasredna Andreju Suzdalcavu ŭ Maskvu.

Palitolah vidavočna ŭzradavaŭsia zvanku ź Miensku, bo, pavodle jahonych słovaŭ, ź Biełarusi daŭno ŭžo nichto nie telefanavaŭ. Sp. Suzdalcaŭ paćvierdziŭ, što jahony stan nasamreč ciažki, ale bolš ničoha skazać nia moža, bo pakul dyjahnaz nie pastavili sami daktary.

«Užo tydzień znachodžusia ŭ adnym sa špitaloŭ Ministerstva abarony Rasiejskaj Federacyi. Tut dobryja daktary i ŭzrovień medycyny, adnak navat jany nia mohuć zrazumieć, što sa mnoj takoje adbyvajecca. Pa maim pytańni prajšło ŭžo dva kansylijumy — vyniku nijakaha. Z pryčyny taho što niama dyjahnazu, niemahčyma pačać i kurs lačeńnia. Analizy vielmi kiepskija. Navat nia viedaju na jaki termin vypaŭ z hramadzkaha žyćcia i pracy praz hetuju chvarobu. Što tyčyć čutak pra toje, što mianie mahli atrucić, to ja ich kateharyčna chaču asprečyć praz «Našu Nivu». Vakoł majoj asoby zaŭsiody chadziła vielmi šmat čutak i lehiend — heta adna ź ich», — skazaŭ Suzdalcaŭ.

Naprykancy razmovy Andrej Suzdalcaŭ zapytaŭsia, što novaha ciapier u Biełarusi, jakoje staić nadvorje, a taksama paprasiŭ pieradać pryvitańnie ŭsim svaim mienskim siabram.

***

Andrej Suzdalcaŭ naradziŭsia ŭ 1960 h. va Ŭładzivastoku. Skončyŭ Dalokaŭschodni ŭniversytet, aśpiranturu Akademii pracy (Maskva). Z 1993 h. žyŭ u Miensku. U sakaviku 2006 h. byŭ pazbaŭleny vidu na žycharstva i departavany ŭ Rasieju. Jamu na piać hadoŭ zabaronieny ŭjezd na terytoryju Biełarusi, bo ŭjaŭlaje saboj «pahrozu nacyjanalnaj biaśpiecy Biełarusi». Kandydat histaryčnych navuk, palitolah, specyjalizujecca na prablemach hieapalityki.

U Miensku zastałasia žonka Suzdalcava, a taksama dvoje dziaciej.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?