«Гэта першы званочак». Да Паліны Шарэнды-Панасюк не пусцілі адваката
Муж палітзняволенай Паліны Шарэнды-Панасюк падзяліўся ў фэйсбуку апошнімі навінамі ад жонкі — як заўсёды, несуцяшальнымі.
Паводле Андрэя Шарэнды, за ўвесь час з 22 снежня мінулага года, як Паліна знаходзіцца ў жаночай калоніі № 24 «Зарэчча», ад яе прыйшоў толькі адзін кароценькі ліст. Жанчына прасіла тэрмінова выслаць у бандэролі шалік, шапку і тэрмабялізну. Бандэроль даслалі, і ў калонію яна прыйшла, але ці аддалі яе Паліне — невядома.
Таксама Паліна Шарэнда-Панасюк паведаміла, што 8 студзеня напісала заяву на сустрэчу з адвакатам і вельмі чакае яго, але калі сёння адвакат прыехаў у калонію, адміністрацыя яго не прапусціла. Аргументавалі гэта тым, што ад Паліны нібыта няма заявы.
«Гэта першы званочак, што з Палінай нешта нядобрае», — робіць выснову Андрэй Шарэнда.
Брэсцкую актывістку Паліну Шарэнду-Панасюк затрымалі 3 студзеня 2021 года і асудзілі на два з паловай гады калоніі. Але летам 2022 года на волю яна не выйшла. Спачатку ёй далі год па артыкуле 411 (злоснае непадпарадкаванне патрабаванням адміністрацыі калоніі). Сёлета жанчыну зноў не вызвалілі, а далі яшчэ год па тым жа артыкуле.
У 2023 годзе Паліна Шарэнда-Панасюк стала пераможцай праваабарончай прэміі ў намінацыі «Праваабарончая салідарнасць года».
Як склаўся лёс хлопца з вядомага жыццесцвярджальнага фота студэнцкага маршу-2020?4
Каментары