У эфіры «Белсат» на гэту тэму спрачаліся выканаўчы дырэктар Фонду спартыўнай салідарнасці Аляксандр Апейкін і журналіст Сяргей Падсасонны.
У эфіры разважалі, ці не лепш зняць санкцыі з дзіцяча-юнацкага спорту. Падчас дыскусіі Сяргей Падсасонны заўважыў, што так на спаборніцтвы змогуць патрапіць і дзеці наменклатуры.
На гэта Апейкін адказаў, што дзеці чыноўнікаў таксама беларусы.
«Мы не можам цяпер браць і падзяляць дзяцей. Тут трэба глядзець трохі шырэй. Зразумела, што ёсць праблема палітвязняў. Але нельга дзяліць нашу будучыню. Бо дзеці — наша будучыня. Нельга казаць, што гэтыя дзеці належаць чыноўнікам, а гэтыя не. Дзеці ўвогуле ні за што не адказваюць».
«Рэжым робіць маніпуляцыі сярод гэтых дзяцей. Апранае іх у дзяржаўную сімволіку. І рэжым трымае ў турмах непаўналетніх», — нагадаў Падсасонны.
Па словах кіраўніка Фонду спартовай салідарнасці, калі дзеці сёння будуць працягваць ездзіць на турніры ў Расію і падсілкоўвацца яе духам, то і ў далейшым будуць апалагетамі гэтай ідэі.
«Наша задача — рэальна ідэалагічна дазволіць ім бачыць іншае. Рэальна інтэграваць іх у еўрапейскую прастору. Каб яны гэта бачылі, каб тут знаходзілі сяброў. Каб з намі сустракаліся, калі яны сюды прыедуць», — адзначае Апейкін.
Падсасонны пацікавіўся, што будзе, калі ў замежных паезках да дзяцей будуць прыстаўлены кадэбэшнікі, якія не дазволяць ніякіх сустрэч. Ён спаслаўся на досвед Савецкага Саюза і Паўночнай Карэі.
Апейкін лічыць, што такога не будзе. «Я не думаю, што ўжо да такой крайняй меры дойдзе, што з дзіцячымі камандамі будуць прыязджаць кадэбэшнікі. Нават калі ў Савецкім Саюзе існавала такая практыка, гэта не перашкаджала людзям бачыць, як жывуць еўрапейскія краіны, ЗША. А параўноўваць Беларусь і Паўночную Карэю яшчэ рана. Наша задача — доўгатэрміновая».
Па словах Апейкіна, ён бачыць, колькі часу каштуе выхаванне аднаго актывіста дэмакратычных сіл. «Людзі не робяцца актывістамі вось проста так, на раз-два. Гэта рэальна гады працы. Трэба, каб чалавек інтэграваўся ў нейкія праграмы, меў кантакты з супольнасцю».
«Калі мы будзем на дзіцячым узроўні адсякаць кантакты, ствараць ізаляцыю, атрымліваецца, што дзеці будуць бачыць адзіны свет», — падкрэслівае кіраўнік Фонду спартовай салідарнасці.
Па словах Падсасоннага, цяпер моладзь з дзяржаўнай сімволікай можна рэгулярна сустрэць у аэрапорце Вільні. Значыць, некаторыя дзеці ўсё-такі лётаюць. Наколькі яны сталі еўрапейскімі з дзяржаўнай сімволікай?
Апейкін распавядае, што цяпер моладзь прымае ўдзел у некаторых прыватных турнірах. А адносна дзяржаўнай сімволікі заўважае, што шмат спартоўцаў, якія падтрымалі пратэсты ў 2020 годзе, таксама лёталі з дзяржаўнай сімволікай.
Апейкін адзначае, што не любіць падзелу: «Што значыць недэмакратычныя дзеці ці дзеці чыноўнікаў? Дзеці не адказваюць за бацькоў. Гэта ў нас асноўны прынцып. Няма такога надзялення. Нельга яго штучна ствараць».
«Пры гэтым адказваюць дзеці палітзняволеных. Маці застаюцца за кратамі. Дзяцей выхоўваюць бабулі ці нехта з блізкіх. Мы на гэта павінны закрыць вочы?» — спытаў Падсасонны.
«Што пасееш, то пажнеш. Калі мы будзем сеяць падзяленне і рэальную нянавісць паміж беларусамі, то будзем гэта падтрымліваць. Дзеці не павінны за гэта адказваць», — упэўнены Апейкін.
Чытайце яшчэ:
Аляксандру Герасіменю і Аляксандра Апейкіна дадалі ў «Спіс экстрэмістаў»
-
Збег абставінаў, які можна было прадухіліць. Як Лукашэнка перамог на выбарах-1994 і чаму гісторыя магла пайсці інакш
-
Аналітык назваў тры прычыны таго, чаму Украіна захоўвае дыпламатычныя адносіны з Беларуссю
-
Чаму кіраўніком сваёй Адміністрацыі Лукашэнка паставіў Дзмітрыя Крутога? Ён можа стаць пераемнікам?
Праваабаронцы: Некаторыя палітвязні адмовіліся выходзіць на волю 3 ліпеня, не пагадзіўшыся з умовамі вызвалення2
Каментары