Еўрасаюз прапанаваў спыніць пастаўкі расійскай нафты па нафтаправодзе «Дружба» ў Германію і Польшчу
Еўрасаюз прапанаваў спыніць пастаўкі расійскай нафты па паўночнай ветцы трубаправода «Дружба» для ўсіх краін. Такім чынам могуць адмяніць раней закладзеныя выключэнні для Германіі і Польшчы. Пра гэта піша Bloomberg са спасылкай на канфідэнцыйныя дакументы, якія апынуліся ў рэдакцыі.
Праўда, калі поўная забарона для паўночнай веткі будзе ўхвалена, то гэта стане ў значнай ступені сімвалічным рашэннем. Бо раней Берлін і Варшава ўжо самі спынілі закупляць у Масквы нафту, выканаўшы абавязацельствы па скарачэнні залежнасці ад расійскіх энергарэсурсаў.
Выключэнні ж, якія дазваляюць Чэхіі, Славакіі і Венгрыі атрымліваць расійскую нафту па паўднёвай ветцы нафтаправода, застануцца ў сіле.
Агенцтва адзначае, што гэтая ініцыятыва яшчэ абмяркоўваецца, яе плануюць уключыць у наступны адзінаццаты пакет еўрапейскіх санкцый.
Да санкцый супраць паўночнай веткі «Дружбы» Польшча заклікала яшчэ мінулай восенню, бо гэта дало б краіне юрыдычныя падставы для скасавання кантрактаў з Расіяй без штрафаў.
Каментары