Źmitra Daškieviča vyratuje tolki kampanija salidarnaści

Dapamahčy lidaru mižnarodnaj arhanizacyi «Małady front» (Čechija) Źmitru Daškieviču možna tolki arhanizavaŭšy kampaniju salidarnaści. Pra heta ŭ intervju BiełaPAN zajaviła kaardynatar hramadzianskaj inicyjatyvy «Za volu» Hanna Šapućka.

Siońnia ŭ Minsku prachodzić kruhły stoł pad nazvaj «Svabodu Daškieviču! Svabodu Biełarusi! Stop 411», arhanizavany inicyjatyvaj «Za volu» pa prapanovie sustaršyni arhkamiteta pa stvareńni partyi «Biełaruskaja chryścijanskaja demakratyja» Paŭła Sieviarynca. Na im abmiarkoŭvalisia pytańni dapamohi Dźmitryju Daškieviču, jaki niadaŭna byŭ asudžany na hod pazbaŭleńnia voli pavodle artykuła 411 Kryminalnaha kodeksa Biełarusi za złosnaje niepadparadkavańnie administracyi papraŭčaj ustanovy.

«My abmiarkoŭvajem pytańni, jak spynić u Biełarusi dziejańnie 411-ha artykuła KK, što treba zrabić dla taho, kab vyzvalić i Daškieviča, i astatnich palitźniavolenych, jakich u nas 16 čałaviek», — skazała Šapućka.

Jana adznačyła, što heta ŭžo nie pieršy kruhły stoł, na jakim abmiarkoŭvajucca pytańni vyzvaleńnia palitźniavolenych. «Na žal, chvala salidarnaści z palitźniavolenymi amal nulavaja. I jak my ni bjemsia, my nijak nie možam jaje padniać na naležnuju vyšyniu. Siońnia my abmiarkoŭvajem čarhovyja mierapryjemstvy, ale ich možna zrabić tolki pry dapamozie ŭsiaho nieabyjakavaha hramadstva», — adznačyła Šapućka.

«Kali heta chvala budzie mocnaj, kali nieabyjakavymi da prablemy palitźniavolenych stanuć tysiačy i tysiačy biełarusaŭ — tolki tady palitźniavolenyja buduć vyzvalenyja.

28 žniŭnia Hłybocki rajonny sud na zakrytym vyjaznym pasiadžeńni ŭ kałonii № 13 hetaha rajcentra pryznaŭ Daškieviča vinavatym u «złosnym niepadparadkavańni administracyi papraŭčaj ustanovy» (častka 1 artykuła 411 Kryminalnaha kodeksa) i pryhavaryŭ jaho da hoda pazbaŭleńnia voli. U termin pakarańnia ŭklučanyja čatyry miesiacy, jakija apazicyjanieru zastavałasia adbyć u kałonii pa pieršaj kryminalnaj spravie.

U kałonii Hłybokaha lidar arhanizacyi adbyvaje pakarańnie pa kryminalnaj spravie, raspačataj u kancy 2010 hoda. Napiaredadni apošnich vybaraŭ prezidenta, 18 śniežnia 2010 hoda, Daškieviča i jaho tavaryša pa «Maładym froncie» Eduarda Łobava zatrymali ŭ Minsku pa abvinavačańni ŭ źbivańni dvuch mužčyn. U sakaviku 2011 hoda Daškievič byŭ pryhavorany da dvuch hadoŭ pazbaŭleńnia voli ŭ kałonii ahulnaha režymu. Pradstaŭniki apazicyi i pravaabaroncy rascanili aryšt Daškieviča i Łobava, pryhavoranaha da čatyroch hadoŭ pazbaŭleńnia voli, jak previentyŭnuju mieru pa začystcy aktyvistaŭ apazicyi napiaredadni vybaraŭ. Mižnarodnyja pravaabarončyja arhanizacyi pryznali Daškieviča i Łobava palityčnymi źniavolenymi.

• 0
• 0
• 0
• 0
• 0
• 0