Deputat Palanskaja: Kali try razy pierajšli vulicu ŭ nienaležnym miescy, z kvatery vas nichto nie vysielić
Deputaty pałaty pradstaŭnikoŭ u druhim čytańni pryniali prajekt novaha Žyllovaha kodeksa.
Adno z novaŭviadzieńniaŭ, infarmacyju pra jakoje raspaŭsiudzili ŚMI, vyklikała ŭ internecie lohkuju paniku. Jak paviedamlałasia, u adpaviednaści z dakumientam, budzie mahčymaje vysialeńnie ŭłaśnika, kali jon try i bolš razoŭ pryciahvaŭsia da administracyjnaj adkaznaści i parušaŭ hramadski pravaparadak. «Niaŭžo pazbavicca žylla ciapier možna, try razy pierajšoŭšy vulicu ŭ nienaležnym miescy?» — ździŭlajucca naviedniki forumaŭ. Pra što ž nasamreč idzie havorka?
— Parušeńni datyčać tolki praviłaŭ pražyvańnia ŭ žyłym pamiaškańni, — patłumačyła staršynia kamisii pałaty pradstaŭnikoŭ pa žyllovaj palitycy, budaŭnictvie, handli i pryvatyzacyi Halina Palanskaja. — Žyllovy kodeks rehuluje žyllovyja adnosiny. Tamu, kali vy try razy pierajšli vulicu ŭ nienaležnym miescy, nichto z kvatery vas vysielić nie zmoža.
— Pra jakija parušeńni tady idzie havorka?
— Kožny čałaviek žyvie ŭ socyumie i pavinien vykonvać peŭnyja praviły. Voś vam prykład. Ja žyvu ŭ chruščoŭcy, a ŭ susieda źnizu (na ščaście, jon užo pierajechaŭ) dva razy hareła kvatera. Kali b ja nie pryjechała svoječasova, što b zdaryłasia? Abo inšaja situacyja. Vybarščyki časta skardziacca nam na susiedziaŭ, jakija viaduć asacyjalny ład žyćcia, źbirajuć na śmietniku rečy, składujuć ich u siabie ŭ kvatery, a adtul paśla pa ŭsim domie raźbiehajucca prusaki. Chiba heta narmalna?
— U takim vypadku i hučnaja muzyka nočču moža pasłužyć pryčynaj vysialeńnia?
— Paviercie, nichto złoŭžyvać hetaj normaj nie źbirajecca. Dy i vysielić ułaśnika niaprosta. Dapuścim, čałaviek try i bolš razoŭ pryciahvaŭsia da administracyjnaj adkaznaści abo 6 miesiacaŭ nie płacić za kvateru. Miechanizm vyhladaje tak: vykanaŭčaja ŭłada papiaredžvaje hramadzianina ŭ piśmovaj formie. Ciaham miesiaca jon pavinien adreahavać. Kali hetaha nie adbyvajecca, vykanaŭčyja orhany padajuć u sud na adčužeńnie kvatery. Dalej čałavieku dajecca šaniec: za hod jon pavinien pahasić pazyčanaść albo vypravicca. I tolki pa skančeńni 12 miesiacaŭ, kali nie adbudziecca stanoŭčych źmien, možna vieści havorku ab prymusovym prodažy žylla. Znoŭ ža, na vulicu hramadzianina nichto vykidvać nie budzie.
Kamientary