Zachad zdymaje sankcyi ź Birmy paśla demakratyčnych vybaraŭ u parłamient
Adstałaja dyktatura pačynaje taksama ekanamičnyja reformy.
ZŠA i krainy Jeŭrasajuza palahčajuć sankcyi suprać Mjanmy (inšaja nazva — Birma) paśla taho, jak u krainie prajšli demakratyčnyja vybary. Pasłableńnie abmiežavańniaŭ tolki časovaje, bo demakratyčnym šlacham prajšło nie ŭsio hałasavańnie całkam, a tolki davybary prykładna dziasiataj častki deputataŭ. Poŭnuju pieramohu na hetych davybarach zdabyła apazicyja: Aunh San Su Čžy i jaje sajuźniki atrymajuć 43 mandaty z 45. Adnak birmanskaja pałata pradstaŭnikoŭ u cełym zastajecca pad kantrolem pryznačencaŭ vajskovaj chunty, jakaja kiruje krainaj. Asnoŭny etap vybaraŭ, hod tamu, nie byŭ demakratyčnym, i apazicyja bajkatavała jaho.
Dziaržsakratarka ZŠA Chiłary Klintan zajaviła pra pasłableńnie finansavych abmiežavańniaŭ u dačynieńni da krainy, dazvoliła volny ŭjezd u Amieryku lidaraŭ Mjanmy, a taksama ab poŭnym adnaŭleńni dypłamatyčnych adnosin. Anałahičnyja kroki zrobić Jeŭrasajuz.
Na samicie krain Asacyjacyi dziaržaŭ Paŭdniova-Uschodniaj Azii (ASIEAN), jaki prajšoŭ u sieradu, azijackija lidary zaklikali admianić usie sankcyi suprać Mjanmy. Na ich dumku, hety krok stanoŭča adabjecca na ekanomicy krainy i na jaje šlachu da dalejšaha demakratyčnaha raźvićcia.
Aunh San Su Čžy ŭpieršyniu asabista ŭdzielničała ŭ vybarach paśla 1990 hoda. Tady jaje partyja pieramahła, ale ŭłady aryštavali Su Čžy, a parłamient razahnali. Aunh San Su Čžy ahułam praviała pad chatnim aryštam 15 hadoŭ.
U vyniku doŭhaj dyktatury Mjanma pieratvaryłasia ŭ adnu z samych adstałych krain śvietu. Tamu kitajski ŭpłyŭ u joj pačaŭ rabicca ŭsiopranikalny. Analityki miarkujuć, što režym zrazumieŭ: jamu patrebnaja procivaha ŭ vyhladzie zachodnich inviestycyj i padtrymki.
Što zapisana aficyjnaj pryčynaj śmierci adzinaha syna Jarmošynaj?2
Kamientary