«Dźviery lažali ŭnutry kabinieta». U polskim Hdańsku dvojčy abakrali sałon pryhažości biełaruski
Hanna (imia źmieniena) žyvie ŭ Polščy ŭžo piać hadoŭ. U Hdańsku ŭ jaje sałon pryhažości, žančyna aranduje kabiniet u adnym z ofisnych budynkaŭ.
U 2024 hodzie pracoŭnaje miesca biełaruski dvojčy abakrali. Jana padzialiłasia z Most svajoj historyjaj.
Pieršy vypadak adbyŭsia na majskija śviaty. Z kabinieta Hanny źnikli 2 tysiač złotych (400 jeŭra).
— Zvyčajna ja nie zachoŭvaju hrošy na pracy, ale mienavita ŭ hetyja dni tak supała, — uspaminaje biełaruska. — U budynku pracavali tolki ja i škoła tancaŭ paviercham nižej. Nijakaha ŭzłomu nie było. Ja zaŭsiody začyniaju dźviery na dva zamki, tamu dahetul nie razumieju, jak heta adbyłosia.
Hanna miarkuje, što hrošy mahli skraści, pakul jana nienadoŭha vychodziła z kabinieta. Złamyśnik pavinien byŭ dakładna viedać, dzie jany lažać.
Paśla zdareńnia jana źviarnułasia ŭ palicyju, ale znajści złodzieja nie zmahli.
Druhi incydent zdaryŭsia ŭ pačatku śniežnia. Na hety raz dźviery kabinieta byli vybityja, a ŭnutry ŭsio pieraviernuta.
— U niadzielu ja pryjšła na pracu, dźviery lažali ŭnutry kabinieta. Źnikli kanvierty sa spravazdačami i [rachunkami]-fakturami za hod, Mašynka dla piermanientnaha makijažu, błok siłkavańnia i raschodnyja materyjały, u tym liku pihmienty na sumu kala 2100 złotych (420 jeŭra), — raspaviadaje Hanna.
Palicyja, jakaja prybyła na miesca, vyjaviła, što dźviery adčynili i ŭ inšych kabinietach. Zrešty, tam ničoha nie ŭziali, akramia cukierak. Pavodle viersii palicyi, złodziei zajšli i vyjšli praz akno ŭ ahulnym kalidory budynka.
— Niadaŭna ja chadziła pa paćvierdžańnie pa spravie i vyjaviła, što ŭ dakumientach paznačany nie ŭsie skradzienyja rečy. Mnie daviałosia paprasić dadać u śpis astatnija zhuby, — dzielicca Hanna.
Šukać miescy z dobraj achovaj i strachavać majomaść
Kab paźbiehnuć padobnych situacyj, Hanna płanuje paviesić kamieru nazirańnia ŭ svaim kabiniecie i, mahčyma, źmianić pamiaškańnie na toje, što achoŭvajecca lepš.
— Ja raju ŭsim šukać miescy z dobraj achovaj, ustaloŭvać sihnalizacyju i kamiery, a taksama strachavać majomaść. Heta dapamoža ŭ budučyni atrymać kampiensacyju, kali kradziež usio ž taki adbudziecca, — kaža jana.
«Niepadkupnym» biełaruskim dypłamatam u Małdovie akazaŭsia kadravy supracoŭnik KDB4
Kamientary