Biełaruski chołdynh i rasijski ŭniviersitet pačnuć raspracoŭku abstalavańnia dla siłavoj elektroniki
Biełaruski chołdynh «Płanar» pačnie raspracoŭvać siłavuju elektroniku ŭ partniorstvie z Novasibirskim dziaržaŭnym techničnym univiersitetam. Nieabchodnaje pahadnieńnie baki zaklučyli na forumie «Technapram-2024», piša TASS.
U pahadnieńni razmova idzie ab sumiesnaj raspracoŭcy technałahičnaha abstalavańnia i technałohij dla vytvorčaści siłavych hibrydnych intehralnych schiem z vykarystańniem technałohii Flip-Chip. Pry hetym «Płanar» voźmie na siabie vypusk doślednych uzoraŭ takoha abstalavańnia.
Partniorstva «Płanara» z Novasibirskim dziaržaŭnym techničnym univiersitetam zadumana jak doŭhaterminovaje supracoŭnictva ŭ pastaŭkach technałahičnaha abstalavańnia i kamplektujučych na ŭzajemavyhadnych umovach.
Kančatkovaja meta supracoŭnictva — sumiesna vyjści na sieryjny vypusk bartavoj enierhapieraŭtvaralnaj aparatury ź mikrapracesarnaj sistemaj kiravańnia na asnovie mikraelektronnych technałohij.
Jak tłumačyć dyrektar Instytuta siłavoj elektroniki Siarhiej Charytonaŭ, u Rasii pakul niama vytvorcaŭ abstalavańnia dla hibrydnych intehralnych schiem z technałohijaj Flip-Chip.
«Dziakujučy doŭhaterminovamu supracoŭnictvu z «Płanaram» my pieršymi ŭ krainie atrymajem ajčynnaje abstalavańnie pa Flip-Chip-technałohijach. Heta, biezumoŭna, budzie praryŭ», — skazaŭ Charytonaŭ.
AAT «Płanar» znachodzicca pad sankcyjami Vialikabrytanii, Aŭstralii, ZŠA.
Kamientary