Vaskrasienski havoryć rodnym palitviaźniaŭ, što tych mohuć vyzvalić pa pamiłavańni 17 vieraśnia

Pa słovach surazmoŭcy, nie tak daŭno Juryj Vaskrasienski patelefanavaŭ siamji palitviaźnia, jaki pierad hetym «ź vielmi drennym nastrojem» paviedamiŭ, što napisaŭ prašeńnie ab pamiłavańni. Praŭda, jak vyśvietliłasia paźniej, zrabiŭ jon heta pad ciskam: jamu pahražali novaj kryminalnaj spravaj.

«Vaskrasienski pradstaviŭsia, spytaŭ, ci viedajuć jany jaho. I skazaŭ, što znachodzicca ŭ niejkaj hrupie, jakaja zajmajecca prašeńniami, — apisvaje situacyju krynica. — Kazaŭ, maŭlaŭ, chočam vyzvalać palityčnych.

Paviedamiŭ: ich svajak napisaŭ prašeńnie i paprasiŭ, kab siamja taksama heta zrabiła. Tłumačyŭ, čym bolš budzie prašeńniaŭ, tym chutčej jaho vyzvalać. Maŭlaŭ, jamu jašče stolki siadzieć, a z prašeńniami ŭsio pojdzie chutčej. Raskazvaŭ, što «prezident budzie vyrašać, i jamu budzie pryjemna, što jaho prosiać».

Krynica «Lusterka» adznačaje, što razmova prachodziła spakojna. Hutarka pravodziłasia tak «nibyta dźvieście hadoŭ znajomyja». Prapahandyst nie nastojvaŭ, kab siamja abaviazkova niešta pisała, nijakich terminaŭ nie staviŭ. Tolki adznačyŭ, što taki list moh by pavialičyć šancy čałavieka na vychad z kałonii.

Prašeńnie prapanoŭvałasia adpravić u administracyju Łukašenki.

«Skazaŭ napisać na imia Alaksandra Łukašenki. U im paznačyć, što svajak siadzić pa takim i takim artykule, što jon užo adumaŭsia, što im ciažka», — kaža surazmoŭca.

Ci šmat ludziej abtelefanavaŭ Vaskrasienski, nieviadoma. U razmovie jon abmoviŭsia, što nabiraje svajakoŭ tych, chto ŭžo napisaŭ prašeńnie.

«Na pytańnie, kali, kali što, blizki pavinien vyjści, Vaskrasienski adkazaŭ: 17 vieraśnia, — dadaje krynica «Lusterka». — Mabyć, jany chočuć vyzvalić ludziej i pakazać, jakija jany dobryja. Typu taho, što siabroŭstva, jadnańnie. Jak my zrazumieli, ułady chočuć heta padać, što biełarusy roznych palityčnych pohladaŭ stali afihiennymi siabrami. Jon šmat kazaŭ pra zmaharoŭ, što jany šmat abiacajuć i ničoha nie robiać». 

Sam Vaskrasienski kamientar dać admoviŭsia, prynamsi da 17 vieraśnia. Ciapier jon, maŭlaŭ, znachodzicca «ŭ tvorčym adpačynku» i «mnie nie chaciełasia b, kab mianie vyvieli z raŭnavahi i parušyli maje tvorčyja płany».

• 2
• 0
• 0
• 3
• 0
• 0
• 3
• 0