«Atmaśfieru psujuć niamieckija zakony». Biełarusy na Jeŭra-2024 — u kolki abyšłosia i što ździviła

«Bilet na hulniu padaryli siabry»

Ajcišnik Miša Łarčanka pryjechaŭ u Hiermaniju ź Niderłandaŭ i ŭžo pabyvaŭ u fan-zonach u Miunchienie i Frankfurcie. 22 červienia ŭžyvuju pahladzieŭ hulniu Partuhalija — Turcyja na stadyjonie ŭ Dortmundzie.

— U Hiermaniju ja pryjechaŭ ź siabrami. Spačatku byli ŭ Miunchienie, bo ŭ siabroŭ byli kvitki na matč u hetym horadzie. Zatym prosta ruchalisia ŭ bok Niderłandaŭ, bo pamiž hulniami płanavali być u Amsterdamie, a jechać adrazu tak daloka na mašynie (jaje my arandavali) nie chaciełasia.

Hateli mnie abyšlisia ŭ 365 jeŭra: dźvie nočy ŭ Miunchienie, adna ŭ Frankfurcie i adna ŭ Dortmundzie. Arenda mašyny — 125 jeŭra z kožnaha. Pieralot u Miunchien z Amsterdama byŭ u rajonie 150 jeŭra. Ciahnik z Frankfurta ŭ Amsterdam — 110 jeŭra.

Kvitok na hulniu Partuhalija — Turcyja padaryli siabry. Pahladžu na apošni čempijanat Jeŭropy Kryšcijanu Ranałdu. Ale kvitki jość na mnohija matčy. Ich pierapradajuć u aficyjnym dadatku čempijanatu UEFA2024 tickets.

Kolkaść kvitkoŭ, viadoma, zaležyć ad «jakaści» kamand. Naprykład, na matč Rumynija — Ukraina było šmat lubych kvitkoŭ. A voś na Turcyju čaściej za ŭsio ciažka kupić, bo turak šmat u Hiermanii. Na matč Ispanija — Italija byŭ taksama nievialiki vybar.

Miunchien padaŭsia pustym u paraŭnańni z Frankfurtam. Tam byli ŭ asnoŭnym zaŭziatary z Rumynii i Šatłandyi. Nu i ŭkraincy, adnak ich było značna mienš, čym rumyn.

U Miunchienie fan-zona — na ŭskrainie horada i adnosnaja pustaja. U Frankfurcie — na bierazie raki ŭ samym centry, i tam była biaskoncaja kolkaść ludziej. U toj dzień hulała Turcyja.

U cełym u niemcaŭ usio dobra arhanizavana. Ale atmaśfieru psujuć niamieckija zakony, jakija nie dazvalajuć, naprykład, kramam i ŭstanovam pracavać u niadzielu. Tamu natoŭpy ludziej pieramiaščajucca pa tych «troch» ustanovach, jakija pracujuć.

Akramia taho, adčuvaŭsia dyskamfort z-za vialikaj kolkaści pjanych i ahresiŭnych zaŭziataraŭ. Plus papiaredžańni niamieckaj raźviedki ab mahčymych teraktach nie dadavali spakoju.

«Bilet na hulniu abyšoŭsia ŭ 150 jeŭra»

Siarhiej pracuje ŭ Litvie. Užo paśpieŭ pahladzieć u Bierlinie matč adkryćcia Hiermanija — Šatłandyja (u fan-zonie) i hulniu Ispanija — Charvatyja (na stadyjonie).

— Pieralot tudy / nazad ź Litvy ŭ Bierlin kaštavaŭ prykładna 70 jeŭra, numar u zvyčajnym hateli pobač ź mietro — blizu 200 jeŭra za noč. Piva na stadyjonie i fanzonie kaštavała 7 jeŭra, u zvyčajnych barach 4-5 jeŭra (jak u Vilni). Kvitok na hulniu abyšoŭsia ŭ 150 jeŭra.

Ja padavaŭ zajaŭki na aficyjnym biletnym sajcie na ŭsie matčy ŭ Miunchienie, Hamburhu, Bierlinie, Frankfurcie i Dortmundzie. Na toj momant jašče nie było vynikaŭ losavańnia, i matčy vybirali zychodziačy z transpartnaj dastupnaści. Na pieršym etapie paśla łatarei kvitki nie vypali. Na druhim etapie prapanavali niekalki matčaŭ i samym zručnym pa časie i miescy akazaŭsia Ispanija — Charvatyja.

Da hetaha ja byŭ ź siamjoj na jeŭra-2012 u Kijevie, na paŭfinale čempijanatu śvietu 2018 hoda ŭ Maskvie i na Jeŭra-2020 u Sankt-Pieciarburhu. U Hiermanii ździviła atmaśfiera na stadyjonie. Va Ukrainie i ŭ Rasii na trybunach było šmat niejtralnych zaŭziataraŭ, a nie zaŭziataraŭ kamand, jakija nie hrajuć, amal nie było arhanizavany padtrymki. A ŭ Bierlinie na našym matčy amal uvieś Alimpijski stadyjon zaniali charvaty, było paru siektaraŭ ź ispancami.

Pa-mojmu, Bierlin pastaraŭsia maksimalna vyrašyć prablemy sa svajoj transpartnaj sistemaj. Mietro i ciahniki chadzili amal svoječasova, navat paśla matču nie było prablem ź ciahnikami nazad u horad (stadyjon raźmieščany na ŭskrainie).

Sutyčak fanataŭ nie bačyŭ, charvaty i ispancy spakojna razmaŭlali adzin z adnym. Z astatnich zaŭziataraŭ u horadzie vyłučalisia šatłandcy i anhličanie. Mnohija šatłandcy byli ŭ kiłtach pad hulniavyja džersi zbornaj abo ŭ nacyjanalnych kaściumach. Anhličanie jak byccam u siarednim byli našmat maładziejšyja, čym na minułych turnirach (byŭ na ich matčach dvojčy da hetaha), śpiavali pieśni biez stereatypnaha złoŭžyvańnia ałkaholem.

«Ceny mocna nie źmianilisia»

Ihar žyvie ŭ pryharadzie Hamburha. Zaŭzieje za Hiermaniju, Italiju i Charvatyju. Kaža, što niahledziačy na addalenaść ad horada, «atmaśfiera Jeŭra-2024 adčuvajecca na 100%». Ale sam jon imkniecca pa mahčymaści paźbiahać naviedvańnia horada ŭ metach biaśpieki. Tamu futboł hladzić pa televizary.

— Ja sprabavaŭ kupić kvitki na futboł, ale jany razyhryvałasia z dapamohaj łatarei, tamu nie atrymałasia. Jość, viadoma, sajt a-la biełaruski Kufar — www.kleinanzeigen.de. tut možna było znajści šyroki asartymient kvitkoŭ na lubuju hulniu i ŭ lubym horadzie, ale košty byli ŭ 1,5-2 razy vyšejšyja za aryhinał.

Praŭda, apošni raz, kali ja zachodziŭ na sajt, tam było absalutna pusta. Vierahodna, heta moža być źviazana z baraćboj ź pierakupami. Bo paśla zakančeńnia rozyhryšu kvitkoŭ na hetym sajcie sapraŭdy było šmat prapanoŭ.

Što źmianiłasia ŭ suviazi z čempijanatam? U Hamburhu zładzili fan-zonu na miescy, dzie čatyry razy na hod pravodziać samy zabojny kirmaš. Fan-zona znachodzicca prosta kala druhoha samaha hałoŭnaha stadyjona horada — Millerntor-Stadion, ale dosyć daloka ad areny čempijanatu Volksparkstadion.

Na vulicach, u kramach i na aŭtamabilach narešcie źjavilisia nacyjanalnyja ściahi. Na moj pohlad, u Hiermanii jość niekatoraja saramlivaść u płanie demanstracyi nacyjanalnaj simvoliki. Naprykład, u 2022 hodzie ściahoŭ Ukrainy nad Hamburham było bolš, čym ściahoŭ Hiermanii.

Košty, nakolki ja mahu sudzić, mocna nie źmianilisia. Ale piva padaražeła. Na matčach Bundeślihi (nacyjanalny čempijanat Hiermanii) piva zvyčajna kaštuje ŭ rajonie 5 jeŭra. Zaraz 7 jeŭra i załoh 3 jeŭra za kufal

Niejkich novych ličbavych servisaŭ u suviazi z čempijanatam nie zaŭvažaŭ. Lidl (miascovy anałah Jeŭraopta i sponsar čempijanatu Jeŭropy) razyhryvaje 100 kvitkoŭ na finał praz mabilny dadatak z kuponami. Udzielničać možna pry pakupkach ad 10 jeŭra.

Ale naohuł u płanie «ličbavizacyi» niemcy sami nad saboj žartujuć. Maŭlaŭ, «usio drenna i da niadaŭniaha času ŭsio było praz faks».

• 11
• 0
• 10
• 4
• 3
• 1
• 9
• 0