Sud spyniŭ vytvorčaść pa spravie ab bankructvie kampanii «Trajpł»
Sprava ab ekanamičnaj niepłaciežazdolnaści kampanii «Trajpł», zasnavanaj Juryjem Čyžom, spynienaja. Ale stavić kropku ŭ hetaj historyi rana, piša partał ibMedia.
U lipieni 2021 hoda kampanija «Trajpł» była pryznana bankrutam ekanamičnym sudom Minska. Sud adkryŭ praceduru sanacyi dla pahašeńnia kredytorskaj zapazyčanaści i adnaŭleńnia płaciežazdolnaści. U siaredzinie maja 2024-ha sud razhledzieŭ mahčymaść spynieńnia vytvorčaści pa spravie paśla vykanańnia kiraŭnikam mierapryjemstvaŭ, jakija dazvolili zachavać pracoŭny kalektyŭ i praciahnuć finansava-haspadarčuju dziejnaść pradpryjemstva.
Aktyvy «Trajpła» na 31 sakavika 2024 hoda pieravyšali pamier kredytorskaj zapazyčanaści bolš čym na 45 młn rubloŭ i składali 147,2 młn rubloŭ. Ahulny pamier niepahašanych patrabavańniaŭ kredytoraŭ aceńvaŭsia ŭ 137,3 młn rubloŭ.
Kiraŭnik kampanii «Trajpł» zajaviŭ, što daŭžnik maje dastatkova majomaści dla pahašeńnia zapazyčanaści pierad kredytorami i zdolny vieści haspadarčuju dziejnaść, zachoŭvajučy pracoŭny kalektyŭ. U svaju čarhu, pradstaŭniki rasijskaj kampanii «StandartInviest», uładalnikam jakoj ukazany syn Čyža Uładzimir, ličyli, što spravazdača kiraŭnika pa vynikach sanacyi nie moža być zaćvierdžana sudom, bo niama prykmiet adnaŭleńnia płaciežazdolnaści» Trajpła», i prasili adkryć u dačynieńni da daŭžnika likvidacyjnuju vytvorčaść. Ale sud admoviŭ u skarzie.
Jašče 10 hadoŭ tamu «Trajpł» byŭ bujnoj strukturaj z aktyvami ŭ 30 halinach ekanomiki, ale prablemy ŭ chołdynhu pačalisia ŭ 2015-2016 hadach paśla kanfliktu Juryja Čyža z partniorami. U pačatku 2023-ha biznesoviec atrymaŭ 3,5 hady pazbaŭleńnia voli za lehalizacyju srodkaŭ, atrymanych złačynnym šlacham, i machlarstva.
Ale jon vyjšaŭ na volu, bo jamu zaličyli ŭ termin pakarańnia toje, što jon užo adsiedzieŭ, i prymianili amnistyju. Majomaść i hrošy suzasnavalnika «Trajpła» taksama vyzvalili ad aryštu, ale Juryj Čyž pazbaviŭsia bolšaści aktyvaŭ: častka pierajšła dziaržavie, častka była pradadzienaja na tarhach u ramkach vykanaŭčaj vytvorčaści, u prydaču vałodańnie niekatorymi pradpryjemstvami ŭmacavałasia za dziećmi i byłoj žonkaj biznesoŭca.
Viadoma, što Juryj Čyž vykupiŭ kampaniju ŭ rasijskaha kampazitara Viktara Drobyša, a taksama viarnuŭ pad svajo kiravańnie hałoŭny aktyŭ siamji ŭ Rasiei.
Rašeńnie Ekanamičnaha suda Minska pa sanacyi «Trajpła» jašče nie ŭstupiła ŭ zakonnuju siłu i moža być abskardžana. Da taho ž, sprečki pa aktyvach pamiž Juryjem Čyžom i jaho dziećmi, byłoj žonkaj i niekatorymi partniorami da kanca nie ŭrehulavany.
«Nam po**j. Kali pa rukach nie daduć za niezakonnaje zatrymańnie, možam i babulu razam ź imi zakryć»10
«Nam po**j. Kali pa rukach nie daduć za niezakonnaje zatrymańnie, možam i babulu razam ź imi zakryć»
Ci zdaść Tramp Ukrainu Rasii? Čamu demakraty razhromlenyja? Da čaho pryviadzie kantrol respublikancaŭ nad vykanaŭčaj i zakanadaŭčaj uładaj adnačasova?8282
Kamientary