Jaho buduć vyrablać na 558-m avijacyjnym ramontnym zavodzie ŭ Baranavičach.
Pradpryjemstva dniami vykłała fotazdymak svajho budučaha samalota, paviedamlaje «Zierkało». Jašče 15 krasavika Biełaruś i Rasija damovilisia ab sumiesnym stvareńni samalota.
Lohki turbavintavy samalot na 19 miescaŭ «Aśviej» raspracoŭvaje Baranavicki avijaramontny zavod sumiesna z Uralskim zavodam hramadzianskaj avijacyi. Jaho źbirajucca vykarystoŭvać dla « dziaržaŭnaj avijacyi», a taksama dla hramadzianskaj avijacyi i kamiercyjnych pieravozak.
«Pierad kanstruktarami pastaŭlena zadača stvaryć samalot, jaki spałučaje vysokuju pradukcyjnaść i ekanamičnaść pry pieravozcy pasažyraŭ i hruzaŭ na małyja i siarednija adlehłaści. Admietnymi asablivaściami samalota pavinny stać vyklučnaja nadziejnaść i biaśpieka ŭ ekspłuatacyi, u tym liku ŭ ekstremalnych klimatyčnych umovach. U jakaści siłavoha ahrehata płanujecca ŭstanoŭka turbavintavoha ruchavika VK-800, bartavoje abstalavańnie — kompleks, raspracavany «Kancernam «Radyjoelektronnyja technałohii», — havorycca na sajcie 558-ha avijacyjnaha ramontnaha zavoda.
Mižuradavaje pahadnieńnie ab raspracoŭcy i arhanizacyi vytvorčaści dvuchruchavikovaha lohkaha šmatmetavaha samalota «Aśviej» było zaklučana 15 krasavika 2024 hoda pa vynikach pieramovaŭ premjer-ministraŭ Biełarusi i Rasii Ramana Hałoŭčanki i Michaiła Mišuścina. Dakumient padpisali vice-premjer — ministr pramysłovaści i handlu RF Dzianis Manturaŭ i namieśnik premjer-ministra Biełarusi Piotr Parchomčyk.
U čas majskaha vizitu ŭ Tatarstan Parchomčyk zajaviŭ, što pieršy vopytny ŭzor samalota budzie vypuščany ŭžo ŭ 2026 hodzie. Usiaho płanujecca vyrabić 90 takich samalotaŭ.
Da hetaha ŭ lutym načalnik upraŭleńnia płanavańnia i pramysłovaści Dziaržkamvajenprama Dźmitryj Stefanovič zajaviŭ na «Biełaruś 1», što poŭny cykł vytvorčaści sumiesnaha rasijska-biełaruskaha samalota ŁMS-401 «Aśviej» budzie arhanizavany na biełaruskich pradpryjemstvach.
«Novy samalot, z nula pačynajecca raspracoŭka. Poŭny cykł vyrabu budzie arhanizavany na pradpryjemstvach Respubliki Biełaruś», — skazaŭ jon.
Pry hetym raspracoŭka samalota budzie vieścisia na pradpryjemstvach Dziaržkamvajenprama i Rasii. Sa słoŭ Stefanoviča, užo raspačataja arhanizacyja vytvorčaści, idzie zakupka nieabchodnaha abstalavańnia i ŭźviadzieńnie adpaviednych cechaŭ.
Raniej ab mahčymaj zborcy ŭ Biełarusi rasijskich samalotaŭ «Ładaha» i «Bajkał» zajaŭlaŭ biełaruski pasoł u Rasii Dźmitryj Kruty. Jon ža raźličvaje i na finišnuju zborku šturmavikoŭ Su-25 u Biełarusi. U červieni 2023 hoda havaryłasia ab vytvorčaści «19-miascovaha turbavintavoha samalota» ŭ Baranavičach.
Čatyrochhadovaja Maja Lubimcava, jakuju šukali bolš za sutki, zahinuła
Kamientary