Jana Łatuška pra svaju maci, jakaja vyjšła zamuž za Ryžankova: «Pra kryminalnuju spravu jana skazała, što heta maje prablemy»

«Było kryŭdna, što tata zastajecca adzin, i ja vyrašyła zastacca ź im»

— Vy zhadvali, što zastalisia žyć z baćkam, kali vašy baćki raźvialisia. Čamu?

— Ja tady była vaśmihadovym dziciom. Mama vyrašyła pajechać u Biełaruś (u toj čas Pavieł Łatuška byŭ pasłom Biełarusi ŭ Polščy. — Zaŭv. «Lusterka»). Ja, jak dzicia, nie razumieła jaje rašeńnie. Mnie było kryŭdna, što tata zastajecca adzin, i ja vyrašyła zastacca ź im.

Ja pamiataju, što heta było padčas letnich vakacyj, na jakija ja pryjechała da taty ŭ Varšavu. I voś nadyšło 30 žniŭnia, treba było jechać nazad, tamu što 1 vieraśnia ŭ škołu. U mianie ŭžo byŭ spakavany čamadan, ale ja skazała, što nikudy nie jedu. Razabrała ŭvieś čamadan, lahła na łožak i skazała: «Ja zastajusia». Tata spytaŭsia, ci ŭpeŭnienaja ja. Ja skazała, što tak. Nu i ŭsio, ja zastałasia. Choć tata zaŭsiody kazaŭ, što, viadoma, jon byŭ troški ŭ šoku: maleńkaja dziaŭčynka zastałasia ź im. Ale važna, što tata nikoli nie krytykavaŭ maju mamu.

— U listapadzie 2022 hoda vy kazali, što vašy znosiny z mamaj źvialisia da minimumu paśla taho, jak vy padtrymali baćku ŭ 2020-m. Tady jaje ciapierašni muž Maksim Ryžankoŭ byŭ namieśnikam kiraŭnika administracyi Łukašenki, ciapier jon faktyčna kiruje joj u adsutnaść šefa. Niešta źmianiłasia ŭ vašych adnosinach z mamaj za hetyja paŭtara hoda?

— My z mamaj nie majem adnosin užo bolš za hod. Niama naohuł nijakich znosin. Na svoj dzień naradžeńnia ja atrymała esemesku: «Z Dniom naradžeńnia, zdaroŭja, ščaścia».

Dumaju, što ŭ nas roznyja palityčnyja pohlady. Mnie zdajecca, heta paćviardžaje i toj fakt, jak blizka jaje muž da Łukašenki.

Mama prapanoŭvała pryjechać u Biełaruś. Ja ŭ jaje spytałasia: «Mianie nie pasadziać?»

— Jak ličycie, što jana dumaje pra vaša rašeńnie pajści ŭ palityku?

— Ja dumaju, jana b heta nie padtrymała. Ja imknusia da taho, kab my žyli ŭ novaj demakratyčnaj Biełarusi, u jakoj nie budzie bolš dyktatury, u jakoj pieršy raz paśla 30 hadoŭ falsifikacyj zmohuć prajści demakratyčnyja prezidenckija vybary. Što dumaje i što padtrymlivaje jana, kožny sam moža zrazumieć. Ale było b bolš pravilna spytać u jaje.

— Jak vy ŭspryniali druhi šlub vašaj mamy, kali jana vyrašyła vyjści zamuž za Maksima Ryžankova?

— Viedajecie, dla dziciaci heta, viadoma, było niepryjemna. Ja była suprać, vielmi hetaha nie chacieła. Ja chacieła, kab baćki byli razam. Kožnaje dzicia hetaha choča. Ale siońnia ja razumieju, što heta było jaje rašeńnie, rašeńnie darosłaha čałavieka. Značyć, jana hetaha chacieła.

— Vam udałosia paznajomicca z Ryžankovym?

— Kaniešnie. Raniej ja pryjazdžała da mamy ŭ hości, i jon taksama tam byŭ.

— Što možacie pra jaho raskazać?

— U mianie ź im nie było takich užo asabistych znosin. Heta prosta byŭ muž majoj mamy. Ja pryjazdžała ŭ hości da jaje, a nie da jaho. My ź im asabliva nie razmaŭlali.

— Vaš baćka ŭ siłu svaich raniejšych słužbovych abaviazkaŭ ź im pierasiakaŭsia? Niešta raskazvaŭ pra jaho? Što vy zaŭvažali ŭ ich adnosinach?

— Tata nie tolki ź im pierasiakaŭsia, Ryžankoŭ byŭ navat u jaho padnačaleńni jak namieśnik ambasadara ŭ Polščy. Potym jany taksama pracavali ŭ adnoj sistemie Ministerstva zamiežnych spraŭ. Paśla tata byŭ ministram kultury, a jon tady byŭ u administracyi Łukašenki. Nakolki ja viedaju, u ich byli minimalnyja kantakty.

— Jak vaša mama daviedałasia, što vy źjazdžajecie ź Biełarusi i što na vas raspačataja kryminalnaja sprava?

— Z nahody kryminalnaj spravy jana skazała, što heta maje prablemy. Jana niejak mnie prapanoŭvała pryjechać u Biełaruś, užo paśla 2020 hoda. Ja ŭ jaje spytałasia: «Mianie nie pasadziać?» Na što jana mnie adkazała, što kali ja nie rabiła ničoha suprać zakona, to nie pasadziać.

— Vy niejak heta prakamientavali?

— Nie, na heta ničoha bolš nie skažaš. Usio zrazumieła.

— Vy abmiarkoŭvali palityčnyja pytańni z baćkami da 2020 hoda? Pra jakija temy vy havaryli?

— Tema palityki zaŭsiody była ŭ našaj siamji. Tata zajmaŭsia źniešniaj palitykaj, ale ciapier usio, viadoma, u razy bolš.

— Tady vašy palityčnyja pohlady nie razychodzilisia? Zdarajecca, u padletkaŭ jany bolš radykalnyja, čym u baćkoŭ.

— Nie, kali ja była dziciom, to nie ŭnikała mocna ŭ toje, što adbyvajecca. 

• 51
• 0
• 7
• 5
• 6
• 21
• 17
• 0