Prajezd biez kvitka — kryminalnaje złačynstva ŭ krainie.
83 źniavolenych, asudžanych za prajezd bieź bileta, vyjšli na volu, paviedamiła inicyjatyva Freiheitsfonds. Reč u tym, što ŭ Hiermanii prajezd biez kvitka na hramadskim transparcie z 1935 hoda kryminalnaje złačynstva, jakoje moža karacca turemnym terminam, piša Deutsche Welle.
Ekśpierty ličać, što kala 3,5 pracenta pasažyraŭ u krainie jeździać biez kvitka.
Zrešty, za adzin bieźbiletny prajezd nikoha ŭ turmu nie sadžajuć i kryminalnuju spravu nie zchavodziać. U roznych ziemlach roznyja praviły
U Štutharcie, naprykład, spravu pačnuć, kali «zajac-recydyvist» traplajecca try razy na hod, u Bierlinie — trojčy na praciahu dvuch hadoŭ. Ale da troch razoŭ amal usiudy zvyčajna abmiažoŭvajucca štrafam 60 jeŭra.
Ale navat kali «zajcam» pačynajuć zajmacca palicyja i prakuratura, jak praviła sprava zakančvajecca da suda — parušalnik płacić štraf, zvyčajna ad 300 da 500 jeŭra, i tolki niekatoryja adpraŭlajucca na łavu padsudnych. I tolki tych, chto nie choča płacić pryznačany sudom štraf, adpraŭlajuć za kraty.
Pa artykule 265-a adbyvajuć pakarańnie sotni čałaviek. U Hiermanii možna apłačvać štrafy za inšych ludziej i vykuplać ich z turmy, čym i zajmajecca arhanizacyja Freiheitsfonds. Aktyvisty źbirajuć danaty i apłočvajuć na ich štrafy źniavolenych bieźbiletnikaŭ.
Palityki tradycyjna abviarhali prapanovy pieravieści bieźbiletny prajezd u katehoryju administracyjnych pravaparušeńniaŭ i takim čynam advieści ad «zajcaŭ» pahrozu turemnaha pakarańnia. Ale ŭ minułym hodzie fiederalny ministr justycyi Marka Bušman abjaviŭ pra dekryminalizacyju prajezdu bieź bileta. Praŭda, zakonaprajekta da hetaha času niama.
Kioln, Dziusieldorf, Bremien, Karłsrue, Hale i niekatoryja inšyja harady pry hetym pryniali rašeńnie nie pieraśledvać bieźbiletnikaŭ. Aktyvisty Freiheitsfonds zaklikajuć dekryminalizavać prajezd i ŭ fiederalnym maštabie.
Vykuplenyja Freiheitsfonds ludzi adbyvali pakarańnie ŭ turmach Baden-Viurtembierha, Bavaryi, Bierlina, Hamburha, Hiesena, Nižniaj Saksonii, Paŭnočnaha Rejna-Viestfalii, Rejnłand-Pfalca, Saksonii, Saksonii-Anchalt i Ciurynhii.
Maksimalnaje pakarańnie skłała 618 sutak pazbaŭleńnia voli.
Kamientary