«Kamanda nie budzie asprečvać lidarstva Dzikavickaha, ale za im buduć pryhladać». Ci źmienicca «Biełsat» z novym kiraŭnikom

«Dzikavicki — kreatura zvolnienaj dyrektarki…»

Alaksiej Dzikavicki vyjechaŭ u Polšču praz palityčny pieraśled na radzimie. Na «Biełsacie» jon z 2007 hoda. Na telekanale kiravaŭ redakcyjaj infarmacyjnych prahram, byŭ namieśnikam dyrektara. Ciapier staŭ dyrektaram.

Były žurnalist «Biełsatu», jaki pažadaŭ nie nazyvać svajho imia, nastojvaje, što Dzikavicki — kreatura zvolnienaj Ahnieški Ramašeŭskaj-Huzy. Jana kiravała kanałam 17 hadoŭ. Uvieś jaho piersanał byŭ «absalutna łajalny joj».

«Alaksiej z kim zaŭhodna moh skandalić, ale tolki nie z Ramašeŭskaj, — kaža surazmoŭca. — Ciapier usie, chto ŭ kamandzie «Biełsata», prysiahnuć Dzikavickamu na viernaść».

Tym nie mienš vonkava vyhladaje, što Ramašeŭskaja-Huzy nie hatovaja adnaznačna padtrymać pavyšeńnie Dzikavickaha. «Niachaj jon sam raskazvaje pra svajo rašeńnie. Dapuskaju, što jon kiravaŭsia łohikaj, što lepš, kab niechta byŭ znutry «Biełsatu», čym čužy. Jon pytaŭsia ŭ mianie, što ja dumaju na hety kont. Ja jamu ščyra adkazała, što mnie ŭsio roŭna, chto budzie zabivać «Biełsat» za hetyja prapanavanyja 40 miljonaŭ. Nie važna, svoj ci čužy», — adreahavała jana na svaju adstaŭku i pryznačeńnie Dzikavickaha.

«Ramašeŭskuju chacieli pasunuć daŭno…» 

Źmieny ŭ kiraŭnictvie «Biełsata», jak paviedamlajecca, źviazanyja z pracaj nad novaj madellu zamiežnych kanałaŭ TVP, jakija finansujucca Ministerstvam zamiežnych spraŭ Polščy.

Surazmoŭca «Našaj Nivy» kaža, što Ramašeŭskuju-Huzy chacieli pasunuć daŭno, ale nie vychodziła. «Jana dosyć mocna trymałasia na svajoj pasadzie», — havoryć jon.

Žurnalist dapuskaje, što ŭ Dzikavickaha moža i nie być kreatyŭnych idej pa raźvićci kanała. Raniej jany ŭ jaho byli, ale jon źmianiŭsia. Ciapier Alaksiej — nie małady ambitny žurnalist, a miedyjny funkcyjanier.

Były biełsataviec dadaje, što dla Ramašeŭskaj-Huzy pasada kiraŭnicy telekanałam była palityčnaj. Za tvorčuju ž častku adkazvaŭ Dzikavicki, i mienavita na im trymaŭsia kanał, ale ŭ jaho niama tych suviaziaŭ, jakija mieła jaho papiarednica.

«Biełsataŭcy nie buduć pratestavać suprać źmianšeńnia zarobkaŭ»

Były žurnalist «Biełsatu» dapuskaje, što Dzikavicki nie budzie samastojnym u pryniaćci rašeńniaŭ. Ale toje budzie zaležać, chto pryjdzie pa refarmavańni ŭ hałoŭny ofis hramadskaha telebačańnia TVP.

«Za im buduć pryhladać i davać parady, ad jakich jon nie zmoža admovicca», — miarkuje surazmoŭca.

Dzikavickamu daviadziecca spravicca z mnostvam prablemaŭ, faktyčna viarnucca na 10 hadoŭ nazad.

«Ciapierašni biudžet kanała roŭny tahačasnamu finansavańniu, — tłumačyć surazmoŭca. — Ale ŭ toj čas možna było apierataru ŭ Biełarusi płacić $500, a ciapier u Polščy $1000 budzie zamała. Tamu Dzikavickamu treba dumać, što z hetym rabić».

Niepieraadolnaja prablema u tym, što ŭ Biełarusi ciapier niemahčyma stvaryć apieratarskich hrup, što ŭpłyvaje na zapaŭnieńnie efiru ułasnym biełaruskim kantentam, davodzić były biełsataviec.

Jon ličyć, što nichto ź jaho byłych kaleh nie budzie pratestavać suprać źmianšeńnia zarobkaŭ. Kolki daduć, stolki i zasvojać. I buduć udziačnyja lubomu varyjantu.

Dzikavicki: chočam, kab nas hladzieli i ŭ Rasii, i va Ukrainie

U raniejšych svaich intervju Dzikavicki zapeŭnivaŭ, što «Biełsat» zastaniecca biełaruskamoŭnym kanałam.

Pavodle jaho, pa-biełarusku «Biełsat viaščaje 17—18 hadzin na dzień. Rasiejskaj movie adviedzieny da dźviuch z pałovaj hadzin. Nieabchodnaść zachavańnia rasiejskamoŭnaha efiru tłumačyŭ najaŭnaściu hladackaj aŭdytoryi z Rasii i Ukrainy.

«Tamu my praciahvajem ruskamoŭnaje viaščańnie, — kazaŭ Dzikavicki. — My chočam, kab nas hladzieli i ŭ Rasii, i va Ukrainie, u nas jość ciapier dźvie biełaruska-ŭkrainskija prahramy. Tak što my ŭsio bolš stanovimsia rehijanalnym telekanałam, absalutna nie hublajučy svajoj biełaruskaj identyčnaści».

Dzikavicki ličyŭ u 2012 hodzie, što «Biełsat» zmusiŭ kiraŭnictva Biełarusi na biełarusizacyju dziaržaŭnych kanałaŭ. Łukašenkaŭcy abiacali zapuścić całkam biełaruskamoŭny kanał «Biełaruś-3».

«Prysutnaść u miedyjaprastory całkam biełaruskamoŭnaha «Biełsata» dało padstavy zavarušycca i čynoŭnikam: treba kankuravać. Heta pazityŭny faktar. Inšaja sprava, nakolki jakasna hety kanał budzie zrobleny, kolki ŭ im budzie biełaruskaści. Navat kali i nie atrymajecca — prynamsi, tvorčamu kalektyvu budzie karysna: padvučać rodnuju movu», — davodziŭ tady Dzikavicki.

Alaksiej Dzikavicki daśleduje paleskuju movu

Alaksiej Dzikavicki ź Pinska — horada, jaki ličycca stalicaj biełaruskaha Paleśsia. U jaho žycharoŭ admietnaja havorka.

Na paleskaj movie Dzikavicki vydaŭ zbornik vieršaŭ i ese «Ońde».

Pavodle jaho mierkavańnia, Paleśsie ŭ etnakulturnym płanie vielmi adroźnivajecca ad inšych rehijonaŭ Biełarusi. Ale mientalna palešuki bližej da biełarusaŭ, čym da niekaha inšaha, u pryvatnaści, ukraincaŭ.

Palešuki ŭ savieckaj Biełarusi byli dyskryminacyjnaj hrupaj nasielnictva, davodziŭ Dzikavicki.

«Čałaviek, jaki havoryć «na čistom russkom» — pieršy hatunak. Pa-biełarusku — druhi hatunak. Palešuki nie havaryli ni tak, ni hetak. Tamu — ludzi treciaha hatunku… Kali biełarusy pryjazdžali ŭ horad ź vioski i jak chutčej staralisia pazbycca akcentu, to palešuki tym bolš», — tłumačyŭ jon.

Alaksiej Dzikavicki, jak pradstaŭnik Rady BNR uručaŭ miedali BNR. Jon byŭ siarod padpisantaŭ zvarotu da kiraŭnictva Litvy z prośbaj pachavać Kastusia Kalinoŭskaha ŭ Biełarusi.

Hladzicie taksama:

Za kratami znachodzicca 17 supracoŭnikaŭ Biełsata — dyrektarka telekanała

Dyrektarka «Biełsata» patłumačyła, što aznačaje skaračeńnie finansavańnia telekanała

MZS Polščy praciahnie finansavać telekanał «Biełsat»

• 12
• 0
• 3
• 3
• 1
• 0
• 5
• 0