Niezvyčajnaja novaja zorka francuzskaj palityki: krajnie levy žurnalist rviecca ŭ prezidenty-2027

Francuzskaha žurnalista i deputata Nacyjanalnaha schodu Francyi Fransua Rufena (François Ruffin) užo ciapier niekatoryja palitołahi razhladajuć u jakaści patencyjnaha kandydata ŭ prezidenckaje kresła na vybarach 2027 hoda. Pry takim raskładzie jon stvoryć u pieršuju čarhu kankurencyju svajmu sajuźniku i lidaru partyi «Niaskoranaja Francyja» Žanu-Luku Melanšonu.

Jak adznačaje Le Monde, 72-hadovy Melanšon kantraluje biudžet partyi, a 48-hadovy Rufen adčuvaje niedachop finansavańnia. U mai 2023 hoda žurnalist i deputat źviarnuŭsia da svaich prychilnikaŭ z prośbaj ab achviaravańniach, a ŭ kancy minułaha hoda adkryŭ ofis svajoj mini-partyi «Pikardyja, staim!» (Picardie debout) u Paryžy. Ciapier Rufen znachodzicca ŭ vielmi niespryjalnaj situacyi, kali «adnoj nahoju jon unutry, a druhoj nie» ŭ partyi «Niaskoranaja Francyja».

Chacia jamu dla vybarčaj kampanii nie chapaje finansavaj padtrymki, Rufen nie tracić aptymizmu. Jon nahadvaje, što Emanuel Makron u 2017 hodzie vyłučyŭsia ŭ prezidenty biez padtrymki jakoj-niebudź partyi, ale zmoh sabrać srodki na kampaniju. Ci ŭdasca takoje Rufenu?

Merci patron!

Rufen — čałaviek z rabočaj siamji. Jon vyras u Amjenie, dzie jahony baćka pracavaŭ na zavodzie. U adroźnieńnie ad Melanšona, jon maje bahaty vopyt pracy na miescach. Palityk imkniecca zrabić tak, kab hołas rabočaha kłasa byŭ pačuty.

Papularnaść jon zdabyŭ dziakujučy svajmu satyryčnamu dakumientalnamu filmu Merci patron!, jaki vyjšaŭ u 2016 hodzie. U im žurnalist raskazaŭ historyi dvuch rabotnikaŭ tekstylnaj fabryki, zvolnienych u suviazi ź jaje zakryćciom. Fabryka naležała najbahaciejšamu čałavieku Francyi Biernaru Arno i spyniła rabotu ŭ suviazi ź pieramiaščeńniem vytvorčaści ŭ Polšču. Na praciahu ŭsiaho filma Rufen sprabuje damahčysia ad Arno vypłaty byłym rabotnikam hodnaj kampiensacyi.

Adnym z nastupstvaŭ hetaha filma stała akcyja «Staim unačy», siarod ideołahaŭ jakoj byŭ i Rufen. Jana achapiła 150 haradoŭ Francyi i dziasiatki haradoŭ Jeŭropy. Apytańni pakazvali, što «Staim unačy» mieła padtrymku 60% francuzaŭ.

Hramadskaja aktyŭnaść žurnalista dazvoliła Fransua Rufenu ŭ 2017 hodzie stać deputatam parłamienta ad stvoranaj im levaradykalnaj i antykapitalistyčnaj miascovaj partyi «Pikardyja, staim» pry padtrymcy levych siłaŭ uklučna z «Niaskoranaj Francyjaj», a ŭ 2022 hodzie pieraabracca na novy termin.

Admietnym u bijahrafii Rufena zjaŭlajecca fakt, što jon razam ź dziejnym prezidentam Emanuelem Makronam skončyŭ adzin i toj ža licej u Amjenie. Ale ŭ ich roznaje sacyjalnaje pachodžańnie. I heta dazvoliła žurnalistu vystupić z krytykaj Makrona ŭ svajoj knizie «Heta kraina, jakuju ty nie viedaješ» («Ce pays que tu ne connais pas») z padzahałoŭkam «Vitajem u Francyi, spadar Makron». Kniha vyjšła ŭ 2019 hodzie.

Pavialičyć

U tym ža hodzie Rufen aktyŭna padtrymaŭ ruch «žoŭtych kamizelek». Jon aktyŭna jeździŭ pa Francyi, razmaŭlaŭ z udzielnikami. Vynikam staŭ dakumientalny film «Ja chaču sonca» (J'veux du soleil). A ŭ 2021 hodzie vyjšaŭ jahony treci film «Žančyny, staim!» (Debout les femmes!). U im žurnalist i palityk raskazaŭ pra stanovišča ŭ śfiery sacyjalnych pasłuh, dzie pracujuć u asnoŭnym žančyny.

Palityčnyja pohlady

U adroźnieńnie ad svajho bosa pa partyi, Fransua Rufen ličycca akurat palitykam bolš pamiarkoŭnym i realistyčnym, nastrojenym na šyroki dyjałoh i supracoŭnictva ź inšymi levymi siłami. Niahledziačy na svaje marksisckija pierakanańni, palityk aktyŭna šukaje kantaktaŭ ź biznesam. Niekatorym ź ich impanujuć jaho zakliki da pavyšeńnia pradukcyjnaści pracy, jaje kaštoŭnaści, abarony ajčynnaj pramysłovaści.

U kastryčniku 2023 hoda Fransua Rufen rašuča asudziŭ napad CHAMAS na Izrail. Pa jaho słovach, CHAMAS — «fanatyčnaja terarystyčnaja arhanizacyja, jakaja zaŭsiody była praciŭnikam prahresiŭnych sił na Blizkim Uschodzie». Takaja pazicyja palityka kantrastuje z pazicyjaj Žan-Luka Melanšona, jaki admaŭlajecca nazyvać CHAMAS «terarystyčnaj» arhanizacyjaj.

U kancy studzienia hetaha hoda Rufen adznačyŭsia svajoj zajavaj ab tym, što francuzskim i jeŭrapiejskim charčovym pradpryjemstvam treba zabaranić kuplać pradukty z Ukrainy, kab nie źniščyć ułasnuju sielskuju haspadarku. Hetaja zajava prahučała na fonie masavych demanstracyj fiermieraŭ.

Pa mierkavańni palitołahaŭ, Rufen zajmajecca «levym papulizmam». I heta spracoŭvaje. Jak piša Le Monde, jahony niadaŭni vystup na telebačańni sabraŭ aŭdytoryju amal u 6 miljonaŭ čałaviek, što ŭ dziesiać razoŭ bolš, čym u Melanšona, jaki vystupaŭ na niekalki dzion raniej.

Na pytańnie žurnalistaŭ, ci budzie jon vyłučać svaju kandydaturu na budučych prezidenckich vybarach, Fransua Rufen adkazaŭ, što nie dumaje pra heta pastajanna, ale ličyć, što «siońnia jość nieabchodnaść pradstaŭlać samuju niezaŭvažnuju častku nacyi» i kali jamu daviadziecca heta realizavać, to jon heta zrobić.

Na dumku Fransua Rufena, dla pieramohi na nastupnych prezidenckich vybarach levym nieabchodna źmianić stratehiju i adnavić svaju papularnaść u vybarščykaŭ u sielskaj miascovaści. A pažyłyja ludzi «pavinny mieć mahčymaść skazać sabie, što hałasavańnie za levych — heta harantyja stabilnaści». Sam palityk aktyŭna pieramiaščajecca pa krainie i sustrakajecca ź ludźmi.

Čytajcie jašče:

U Francyi ŭpieršyniu stryt-artyst dabiŭsia vypłaty jamu hihanckaha hanararu za repradukcyju

Jak mihracyjny kryzis u Biełarusi błytaje karty francuzskim palitykam

U Francyi samy małady premjer u historyi. Im staŭ 34-hadovy adkryty hiej

• 3
• 0
• 0
• 5
• 5
• 4
• 4
• 0