Błohier z Hrodna pamianiaŭ Varšavu na Maskvu dziela karjery i atrymaŭ cunami chiejtu
Paśla dvuch hadoŭ žyćcia ŭ Polščy tyktokier Uładzisłaŭ spačatku vyrašyŭ viarnucca ŭ Biełaruś, a potym pierabraŭsia ŭ stalicu Rasii. Svoj pierajezd jon źviazvaje tym, što tam lepšyja pierśpiektyvy dla błohierskaj karjery.
Małady čałaviek raskazaŭ, čamu dla jaho Maskva budzie lepšaj za Varšavu. Nie ŭsie padpisčyki zrazumieli pierajezd biełarusa, piša Mostmedia.io.
Uładzisłavu 21 hod, jon rodam z Hrodna. U jaho TikTok-akaŭncie amal 23,5 tys. padpisčykaŭ. Heta ŭ asnoŭnym vychadcy ź Biełarusi i Ukrainy. Da śniežnia 2023 hoda małady čałaviek žyŭ u Polščy i raspaviadaŭ pra žyćcio ŭ Varšavie. U asnoŭnym heta byli žartoŭnyja manałohi abo ahlady miescaŭ u polskaj stalicy.
U śniežni 2023 hoda Uładzisłaŭ raspavioŭ svaim padpisčykam, što nazaŭždy źjazdžaje z Polščy.
— Za dva hady ja źniaŭ 1,5 tysiačy videa. Dziakuj, što hladzieli mianie. Było vielmi viesieła. Tyktokaŭ z Polščy bolš nie budzie, para ruchacca dalej, — kazaŭ u Videa małady čałaviek.
Uład viarnuŭsia ŭ Biełaruś i amal miesiac prabyŭ u Hrodnie. Za hety čas jon paśpieŭ zrabić niekalki ahladaŭ u rodnym horadzie. A ŭ studzieni 2024 hoda błohier raspavioŭ svajoj aŭdytoryi, što pierajechaŭ u Maskvu. U padpisčykaŭ heta vyklikała hnieŭ.
«Ja pierajechaŭ u Maskvu, i ad mianie admoviŭsia najlepšy siabar. My siabravali ź im dva hady ŭ Varšavie. Ja jaho ličyŭ realna svaim bratam. A ciapier, kali ja pamianiaŭ miesca žycharstva, jon nie adkazvaje na paviedamleńni i na zvanki. Adzinaje, što jon napisaŭ: «My bolš nie siabry. Nie telefanuj mnie bolš». Ščyra, emocyi maksimalnaha źmiašanyja. Uličvajučy, što na mianie ciapier lacić vialiki patok chiejtu ad randomnych ludziej. A kali samyja blizkija jašče admaŭlajucca, heta ciažka», — skazaŭ u videa małady čałaviek.
Paśla hetaj publikacyi Uładzisłaŭ vyrašyŭ raspavieści, čamu pamianiaŭ Varšavu na Maskvu:
— U Polščy ja nabraŭ davoli vialikuju aŭdytoryju ŭ tyktoku, ale chaciełasia niejak maštabavacca i raźvivacca, nu i ŭrešcie zarablać z hetaha. Ale jak pakazvaje praktyka, kab heta rabić u Varšavie, treba zdymać na polskaj movie. Ale na polskaj ja nie chaču zdymać, bo nie mahu na joj vykazvać sapraŭdy hetak ža emocyi, jak na ruskaj. Choć ja jaje vielmi dobra znaju. Ja chaču zdymać vidosy na ruskaj movie, i — uvaha — nazavicie mnie choć adzin horad, dzie budzie bolš mahčymaściaŭ, čym u Maskvie. Nazavicie mnie choć adzin horad, dzie budzie bolš ruskamoŭnaha nasielnictva, čym u Maskvie.
Dzie ŭ cełym ja zmahu realizavać svoj patencyjał bolš, čym u Maskvie? Vy dumajecie, ja prosta ŭziaŭ i pajechaŭ?
Ja raiŭsia ź miljonam razumnych ludziej, papularnymi błohierami, i ŭsie mnie kažuć jechać u Maskvu.
I ŭstaŭka dla ŭkraincaŭ: ja taksama paraiŭsia ź vialikaj kolkaściu razumnych i paśpiachovych ludziej z Ukrainy, i ŭsie mnie jak adzin kažuć, što treba jechać u Maskvu i što lepš za Maskvu dla raźvićcia na ruskamoŭnuju aŭdytoryju nidzie nie znajści.
Navat sami ŭkraincy mianie nie asudžajuć i kažuć jechać i sprabavać, nu a kanapnyja kamientatary, jak zaŭsiody, — miljon łajna na ciabie, zdochni», — kaža jon.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary