«Pryjšli ŭ «stakan» tarmasić jaho, a jon užo chałodny». Niekalki žyćciovych historyj ad źniavolenaha na «sutkach»

Adsutnaść infarmacyi

Jak i va ŭsich palityčnych, u Illi pry źniavoleńni nie było matracaŭ, paścielnaj bializny, prahułak i duša. Ale kali jon vyjšaŭ, to za heta daviałosia płacić — u kvitku na apłatu było napisana pra karystańnie matracam i paścielnaj bializnaj.

Akramia taho, svajakam doŭhi čas nie davali infarmacyju pra znachodžańnie Illi:

«Maja maci telefanavała ŭ CIP, a joj spačatku kazali: «My ničoha nie viedajem». I tolki potym skazali, što ja pierajšoŭ darohu ŭ niapravilnym miescy — za heta niby mianie zatrymali. A adzin źniavoleny raskazvaŭ, što jaho troje sutak svajaki šukali razam z advakatam i skazali, što jaho ŭ CIPie niama, a jon u toj čas tam byŭ».

Jak akazałasia, pošuk infarmacyi moža pryvieści i da źniavoleńnia — pra adnu z takich historyj i raskazvaje Illa:

«Da nas u kamieru adnojčy pryjšoŭ čałaviek. Što ź im adbyłosia? Spačatku zatrymali jaho žonku pa ekstremisckim artykule. Jon patelefanavaŭ u RAUS i zapytaŭ: «A što možna pieradać žoncy?» — «Prychodź u RAUS, my tabie raskažam, usio rastłumačym». Jon pryjšoŭ, a milicyjanty kažuć: «Pakažy telefon! — Usio, składajem administracyjny pratakoł, u ciabie padpiska na Zerkalo». Potym sudzili abodvuch. Žoncy dali štraf, tamu što niepaŭnahadovaje dzicia, a jamu — 13 sutak».

Isteryka

Z-za adsutnaści ludskich umoŭ u adnaho sa źniavolenych zdaryłasia isteryka, uspaminaje Illa:

«Jamu dali 15 sutak za niejkuju padpisku. Ja tak zrazumieŭ, heta byŭ čałaviek absalutna daloki ad palityki. Uvieś čas jon siadzieŭ u transie, tolki paŭtaraŭ: «Što rabić, što rabić? Mianie ž zaraz zvolniać z pracy…» A potym adzin raz jon kinuŭsia da karmuški i staŭ kryčać: «Chłopcy, što vy robicie? Čamu vy mnie ničoha nie dajacie?! Ni zubnoj pasty, ni tualetnaj papiery, čamu ja nie mahu padychać pavietram, nie mahu pamycca, usiaho tolki za niejkuju łuchtu, jakuju ŭ mianie znajšli ŭ telefonie?!»

Na što jamu skazali: «My ničoha nie viedajem, u nas instrukcyja, źviartajsia vyšej, my tut ni pry čym»».

Tolki na «ty»

Jak adznačaje Illa, supracoŭniki CIPa stavilisia da ŭsich ź niepavahaj — i da palityčnych, i da ludziej, asudžanych pa inšych artykułach:

«Achoŭniki ŭsich biez vyklučeńnia nazyvali na «ty», niezaležna ad połu i ŭzrostu. Adnojčy adzin źniavoleny siadzieŭ 10 sutak, paśla hetaha zrabiŭ achoŭniku zaŭvahu: «Tabie 20 hod, a mnie 60, nazyvaj mianie na Vy»— na što pačuŭ adkaz: «I što ty mnie chočaš hetym skazać? Ty chto? Ty nichto tut».

Adzin taksama sprabavaŭ spračacca, jaho abłajali i skazali: «Idzi na škonku zabisia i maŭčy».

Asabliva achoŭniki ździekavalisia ź ludziej z ałkaholnaj zaležnaściu. Niekatorym jany ładzili prosta bulinh — voś kali vyvodzili na pravierku i pačynali ździekavacca, maksimalna kab prynizić čałaviečuju hodnaść».

Pavialičyć

Nakiravańnie ŭ lačebna-pracoŭnyja prafiłaktoryi

Padčas svajho źniavoleńnia Illa paznajomiŭsia z dośviedam nakiravańnia ŭ ŁPP (lačebna-pracoŭnyja prafiłaktoryi).

«Mnoha ŭ nas ludziej takich było, što na niekatorych ludziej (pryčym nie na takich, jakija całkam na apošniaj stadyi, a jakija zaležnyja, ale mohuć pracavać) prosta viaduć palavańnie. Kab zrabić try administratyŭki (zaraz ja ŭžo viedaju, dźvie) i adpravić u ŁPP.

Voś byŭ u nas vypadak, kali čałaviek, jaki adbyvaŭ 15 sutak za toje, što jaho zatrymali pjanym — jak kazaŭ, pałovu butelki vypiŭ, pajšoŭ za dabaŭkaj, i tut jakraz jechała milicyja: «Aha, dychni, pajechali da nas». I kali jaho 15 sutak skončylisia — i što vy dumajecie? — na nastupny dzień jon znoŭ «zajazdžaje» ŭ kamieru.

A jon zajmaŭsia tym, što źbiraŭ mietałałom (i pry hetym byŭ invalid druhoj hrupy — to-bok jamu nielha pracavać pa zakonie), tamu jon žyŭ za košt taho, što źbiraŭ mietałałom i zdavaŭ jaho na prapusknych punktach. I voś jon pryjšoŭ na prapuskny punkt — i tam jaho ŭžo śpiecyjalna čakali. Pryčym na miedkamisii jahonaja druhaja hrupa raptam pieratvaryłasia ŭ treciuju, ź jakoj možna pracavać».

Ź Illoj razam siadzieli i ludzi, jakija ŭžo pabyvali ŭ ŁPP. Jany dzialilisia svaimi ŭražańniami:

«Byŭ adzin u kamiery, jaki adsiadzieŭ 15 hod u kałonii. I pamiž saboj razmaŭlali, jak u ŁPP i kałonii, i jon kaža: «U kałonii prosta raj u paraŭnańni z ŁPP». Bo tam turemny režym, tam navat kali ŭ ciabie tempieratura 37,5 hradusaŭ — heta nie ličycca: «Ty simuluješ, idzi na pracu», a praca nie apłačvajecca. To-bok farmalna ŭ ŁPP jany nie źniavolenyja, ale tam umovy horšyja, čym u kałonii, jak ja zrazumieŭ ź ich raskazu».

Illa ŭspaminaje, što adzin raz u CIPie byŭ vypadak, jak čałaviek z ałkaholnym apjanieńniem pamior. Jaho na noč adpravili ŭ «stakan» — maleńkaje pamiaškańnie, kudy źmiaščali i dziela taho, kab ludzi ćvierazieli.

«Heta ja ŭžo čuŭ ad tych, chto z prahułki viartaŭsia (kamu možna było na ich chadzić — to-bok niepalityčnyja), što ŭviečary kahości pryvieźli, na ranicu pryjšli tam achoŭniki ŭ «stakan» tarmasić jaho, a jon užo chałodny».

Pryjechaŭ za pašpartam i trapiŭ pad kryminałku

Jašče adna historyja śviedčyć ab tym, jak niebiaśpiečna moža być viartańnie ŭ Biełaruś, kab pamianiać pašpart. Takoha čałavieka Illa sustreŭ, kali byŭ u IČU:

«Čałaviek, jaki pryjechaŭ mianiać pasport i zavis na «chimii». Jon daloki ad palityki, pracavaŭ u Sankt-Pieciarburhu. I na 8 sakavika jon padvypiŭ i adkryŭ svoj «VKontaktie», a tam vinšavańni z 8 sakavika žančyn ad načalnika milicyi i načalnika DAI našaha horada. I jon niešta tam padpisaŭ kštałtu: «Opiať eti mordy korrupcionnyje povyłazili». I zabyŭsia pra heta.

A praź niekalki tydniaŭ pajechaŭ u naš horad, dzie jon prapisany, mianiać pašpart.

Zajšoŭ u «pašpartny stoł», i jak tam heta supracoŭnica razharnuła pašpart, to adrazu «Oj, iźvinitie, u nas kompjutier zavis» — i niekudy pajšła. Potym da jaho pryjšli i pačali havaryć, što ŭ jaho mašyna nie ŭ tym miescy pryparkavanaja, što jon zatrymany na 72 hadziny da vyśviatleńnia abstavin.

Jon spačatku padumaŭ, što niejkaja drobiaź, užo dumaŭ, jak tut štraf niejki daduć, jak jon pajedzie zabirać mašynu, jak jamu treba na pracu… I tut za paŭsutak da skančeńnia 72 hadzin u karmušku hrukajuć i padnosiać jamu padpisać jašče adzin list: «Vy v otdielenii milicii ruhaliś matom, čiem diezorhanizovali vsiu rabotu otdielenija».

U jaho vočy na łob: «Ja nie łajaŭsia matam» — «A ŭ nas jesť pokazanija našieho sotrudnika, kotoromu my nie možiem nie vieriť».

I jaho potym zabrali. Jon užo zrazumieŭ, u suviazi z čym. A potym ja daviedaŭsia, što jamu ci to dva, ci to dva z pałovaj hady «chimii» dali ŭ vyniku za źniavahu supracoŭnikaŭ adpaviednych orhanaŭ».

Čytajcie taksama:

«Adsiedzieŭ niezrazumieła navošta». Padletak, jakoha zatrymali praz 2 hady paśla pratestaŭ, raskazaŭ svaju historyju

Aleh Kuleša: «Spyniacca nielha. Bo ŭ biełaruskich viaźnicach i siońnia, i zaŭtra ludzi ŭstanuć rankam i buduć hrebci śnieh»

Paźbieh vojska, admoviŭsia vinšavać AMAP na videa, asudžany za abrazu Łukašenki. Były palitviazień Valeryj Pankratovič raskazaŭ svaju historyju

• 2
• 0
• 0
• 2
• 2
• 3
• 24
• 0