Apazicyja stvaraje kadravy rezierv. Ci nie mohuć tudy zapisacca ahienty?
Siabra Kaardynacyjnaj rady Juryj Hubarevič patłumačyŭ, jak jany adbirajuć ludziej u kadravy rezierv.
Juryj Hubarevič raspavioŭ na «Biełsacie», što inicyjatyva «Kadravy rezierv» praduhledžvaje padrychtoŭku na budučyniu administrataraŭ na roznyja pasady ŭ sistemie dziaržaŭnaha kiravańnia. Pry hetym nie tolki ŭ centralny aparat, roznyja ministerstvy i viedamstvy, ale ŭ rehijony.
Hubarevič adznačaje važnaść pošuku inicyjatyŭnych ludziej, jakija b chacieli pryjści na dziaržaŭnyja pasady i być častkaj pieramienaŭ:
«Kali ŭ Biełarusi adbuducca źmieny, buduć patrebnyja novyja ludzi, jakija nie zaplamleny ŭ tych złačynstvach, jakija zaraz robić biełaruski režym, jakija nie zvalniali padnačalenych za palityčnyja pohlady, nie arhanizoŭvali falsifikacyj na vybarach. U niekatorych śfierach nieabchodna budzie tatalnaja zamiena. I hetych ludziej patrebna adniekul brać i pažadana, kab jany byli padrychtavanyja, razumieli, jak pracuje dziaržaŭnaja sistema, jak prymajucca rašeńni, jak kiravać kalektyvami».
Juryj Hubarevič ličyć całkam mahčymym, što svaje zajaŭki im dasyłajuć i ahienty śpiecsłužbaŭ. «Na siońnia my majem bolš za 650 čałaviek u składzie inicyjatyvy. I my nie vyklučajem, što siarod ich jość supracoŭniki KDB, jakija adsočvajuć, što my robim. I my ŭžo atrymali ad ich «vysokuju adznaku», kali «Kadravy rezierv» u mai hetaha hoda byŭ pryznany ekstremisckim farmavańniem».
U toj ža čas, jak adznačaje Hubarevič, śpiecsłužby nie majuć dostupu da asabistych danych ludziej. «Kali my atrymlivajem zajaŭki, to adździalajem asabistyja danyja ad asnoŭnaha masivu, jaki ŭtrymlivaje źviestki pra adukacyju, dośvied pracy, čakańni čałavieka (u jakim miescy sistemy dziaržkiravańnia jon siabie bačyć), i pracujem tolki z asnoŭnym masivam».
Pa słovach Juryja Hubareviča, na roznych etapach roznyja padychody da pravierki kandydataŭ.
«Kali heta anłajn-prahramy, to vialikaj pravierki jany nie patrabujuć. Kali ž my pravodzim afłajn-mierapryjemstvy, dzie źbirajucca nievialikija kalektyvy pa 15-20 čałaviek, ryzyka deananimizacyi ŭzrastaje. I my prosim kožnaha adznačyć (kali jany dajuć zhodu na ŭdzieł u takich prahramach), što jany razumiejuć hetyja ryzyki».
Hubarevič adznačaje, što arhanizatary inicyjatyvy imknucca rabić usio mahčymaje, kab udzielnik inicyjatyvy byli ŭ biaśpiecy. Ale całkam jaje harantavać jany nie mohuć:
«Čałaviek moža sam zrabić nieabačlivyja dziejańni. My raim vykarystoŭvać VPN, nie padavać zajaŭki sa svajoj piersanalnaj pošty. Takija patrabavańni kožny sam pavinien adsočvać. My nie možam harantavać, što va ŭdzielnikaŭ nie znojduć niejkuju infarmacyju na piersanalnym kampjutary. Asabliva ŭ Biełarusi, dzie 30% udzielnikaŭ inicyjatyvy».
Čytajcie jašče:
Siłaviki prychodzili pa miescy rehistracyi kiraŭnika ruchu «Za svabodu»
Kamientary