Internet z dapamohaj VPN — ci nasamreč heta biaśpiečna?
Biełarusy ciapier masava vykarystoŭvajuć virtualnyja pryvatnyja sietki, abo VPN, dla naviedvańnia internet-sajtaŭ. Ci niasie VPN ryzyki?
Kali karystalniki nie mohuć atrymać dostup da cikavych sabie sajtaŭ abo nie chočuć, kab ułady bačyli, jakija sajty jany naviedvajuć, karystalniki źviartajucca da samaha prostaha rašeńnia — VPN.
VPN byli raspracavanyja dla taho, kab kampanii, niezaležna ad miescaznachodžańnia, mahli padklučacca da svaich unutranych sietak praź internet pa zašyfravanych kanałach. Adnak ciapier VPN usio čaściej vykarystoŭvajecca pryvatnymi asobami, što dazvalaje im adklučycca ad sietki, jakaja kantralujecca ŭradam, i atrymać dostup da sierviera ŭ svabodnym internecie.
VPN-dadatki ciapier dastupnyja ŭsim, i ich stanovicca ŭsio bolš. Usie jany abiacajuć biaśpiečny dostup da internetu, dzie vašy asabistyja źviestki nie zmohuć pierachapić złamyśniki. Bolš za toje, z VPN možna karystacca patokavymi servisami ź inšych krain, abychodzić dziaržaŭnuju cenzuru i atrymlivać dostup da zabłakavanych sajtaŭ.
VPN ustaloŭvaje zašyfravany tuniel ad vašaha smartfona abo kampjutara da VPN-sierviera, jaki, jak praviła, znachodzicca ŭ inšaj krainie. I kali vy znachodziciesia ŭ internecie z VPN, apieratary veb-sajtaŭ bačać nie vaš IP-adras, a VPN-siervier. Kali vy karystajeciesia smartfonam u Biełarusi, ale vaš VPN-siervier znachodzicca ŭ Hiermanii, to apieratary sajtaŭ, jakija vy naviedvajecie, buduć dumać, što vy znachodziciesia ŭ Hiermanii, tłumačyć vydańnie Deutsche Welle.
Urad, jaki kantraluje internet-trafik, moža vyjavić, što chtości vykarystoŭvaje VPN, ale niemahčyma zrazumieć, jakija mienavita źviestki karystalnik atrymlivaje praz VPN-tuniel.
Tamu niekatoryja dyktatury zabaraniajuć vykarystańnie VPN i błakujuć dostup da VPN-siervieraŭ za miažoj. Adnak heta zrabić nadzvyčaj składana, bo VPN-siervieraŭ u śviecie bieźlič i vyličyć IP-adras kožnaha amal niemahčyma.
Mnohija pierakananyja, što VPN zabiaśpiečvaje kanfidencyjalnaść źviestak u internecie. Adnak heta nie zusim tak: usie asabistyja źviestki karystalnika jość u VPN-pravajdara — u kampanii, pra jakuju vy chutčej za ŭsio ničoha nie viedajecie.
Pakolki pravajdar kiruje tunielem, kampanija bačyć, jakija sajty naviedvaje karystalnik i jak časta. Pravajdar taksama moža bačyć niezašyfravany źmiest vašych paviedamleńniaŭ, naprykład, u elektronnych listach.
Hetyja źviestki mohuć zachoŭvacca, a zatym kampanii pradajuć ich u markietynhavych metach. Dla pravajdaraŭ VPN heta paśpiachovaja biznes-madel. Akramia taho, što niekatoryja ź ich biaruć hrošy za vykarystańnie VPN, u toj ža čas jany pradajuć źviestki karystalnikaŭ rekłamnaj industryi.
U horšym vypadku, hetyja źviestki mohuć pradavacca dziaržaŭnym orhanam. Tamu samaja biaśpiečnaja sistema — taja, jakaja nie źbiraje asabistych źviestak uvohule.
Siarod takich — svabodnaje i adkrytaje prahramnaje zabieśpiačeńnie Tor. Tor buduje trajny tuniel niepasredna praz braŭzier Tor. Nivodny z hetych tunielaŭ nie zachoŭvaje vašych asabistych źviestak, tamu da hetaj infarmacyi nichto nie maje dostupu.
Tor — heta niekamiercyjny prajekt, nad jakim pracujuć mnohija vałanciory, tamu jon całkam biaspłatny dla karystalnikaŭ. Adnak jaho hałoŭny niedachop — časam drennaje złučeńnie. Tor zabiaśpiečvaje maksimalnuju kanfidencyjalnaść, ale sastupaje VPN z punktu hledžańnia chutkaści i zručnaści.
Tamu kali vy chočacie karystacca chutkim internetam z dapamohaj svajho braŭziera i nie majecie patreby ŭ maksimalnaj achovie asabistych źviestak, lepš vykarystoŭvać VPN-servisy. Adnak varta vybirać taho pravajdara, jakomu vy daviarajecie bolš za ŭsio. Tamu jość sens u kansultacyi z ekśpiertami ŭ ličbavaj biaśpiecy.
Žycharcy Mahilova pahražajuć kryminałkaj za toje, što źniała ranišniuju čarhu ŭ rehistraturu1
Kamientary